بۇگىندە ەۋروپا ەلدەرىندە ەكولوگيالىق تازا ونىمدەرگە سۇرانىس وتە جوعارى. سوندىقتان دا جەر جۇزىندە ورگانيكالىق ونىمدەر ءوندىرۋ اسا ماڭىزدى سالالاردىڭ ءبىرى بولىپ وتىر.
2015 جىلى ەلىمىزدە «ورگانيكالىق ونىمدەردى ءوندىرۋ تۋرالى» زاڭعا قول قويىلىپ, بۇل باعىتتاعى جۇمىستار قولعا الىنعان بولاتىن. قازاق ەگىنشىلىك جانە وسىمدىك شارۋاشىلىعى عىلىمي-زەرتتەۋ ينستيتۋتىندا وتكەن «ورگانيكالىق اۋىل شارۋاشىلىعى – ەكولوگيالىق تازا ونىمدەردى ءوندىرۋدىڭ نەگىزى» اتتى حالىقارالىق كونفەرەنتسيادا وسى ماسەلە جان-جاقتى تالقىلاندى.
رەسەي, گەرمانيا, موڭعوليا, بەلارۋس, تۇركيا جانە قىرعىزستاننىڭ اۋىل شارۋاشىلىعى سالاسىنىڭ عالىمدارى قاتىسقان كونفەرەنتسيانىڭ العاشقى كۇنى ينستيتۋتتىڭ تاجىريبەلىك القاپتارىنا ەگىلگەن ءداندى داقىلدار مەن ماي بۇرشاقتاردىڭ ءوسۋ بارىسى قاداعالاندى. ينستيتۋت عالىمدارى وزدەرىنىڭ ناتيجەلى جەتىستىكتەرىن شەتەلدىك ارىپتەستەرىنە كورسەتىپ, جوعارى باعاسىن الدى.
كونفەرەنتسيانىڭ ەكىنشى بولىمىندە قازاق ەگىنشىلىك جانە وسىمدىك شارۋاشىلىعى عىلىمي-زەرتتەۋ ينستيتۋتى ديرەكتورى سەرىك بارمانبەك ۇلى عىلىمي شارالارىنىڭ ءمان-ماقساتىنا توقتالىپ ءوتتى.
اتالعان كونفەرەنتسيا بارىسىندا عالىمدار ءبىر-بىرىمەن تاجىريبە الماسىپ, عىلىمي ىزدەنىس ناتيجەلەرىن ورتاعا سالدى. ورگانيكالىق ءونىم ءوندىرۋدىڭ باعىت-باعدارى, ونىڭ جۇزەگە اسۋى تۇرعىسىنداعى ارتىقشىلىقتار مەن كەمشىلىكتەر بارىسى دا تالقىلاندى. بۇل باعىتتاعى قولدانىلىپ جاتقان جاڭا تەحنولوگيالار دا نازار اۋدارارلىق.
كونفەرەنتسيا بارىسىندا انىق بولعانىنداي, وتاندىق عالىمداردىڭ زەرتتەۋلەرى بويىنشا ەلىمىزدەگى ەگىس القاپتارى مەن باقشا داقىلدارى ەگىلگەن اۋماقتاردىڭ 85-90 پروتسەنتى ەكولوگيالىق تازا اۋماق بولىپ تابىلادى. بۇل كورسەتكىش 2000 جىلدارى 11 ملن گەكتاردى قۇراسا, بۇگىندە ەكولوگيالىق تازا القاپتار 60 ملن گەكتارعا جۋىقتاعان. عالىمداردىڭ بولجامىنا وراي ورگانيكالىق ءونىم ءوندىرۋ جىل سايىن 12-15 پروتسەنتكە ءوسىپ كەلەدى.
ەلۆيرا سەرىكقىزى,
«ەگەمەن قازاقستان»
الماتى