بولات باقاۋوۆ وبلىستىق ءماسليحات دەپۋتاتتارى الدىندا ەسەپ بەردى

وبلىس كاسىپورىندارى وندىرىستىك جاڭارتۋ, جاڭعىرتۋ شارالارى بويىنشا 21 جوبانى جۇزەگە اسىرۋدا. جىلدىڭ سوڭىنا دەيىن جالپى ينۆەستيتسيا كولەمى 96 ملرد. تەڭگەنى قۇرايتىن 6 جوبا ىسكە قوسىلادى.

بۇل كۇندەرى  «پاۆلودار» ەكونوميكالىق ايماعىندا اليۋميني كلاستەرىن وركەندەتۋ جولىندا 2 كاسىپورنى جۇمىس جاساۋدا.

ءوز سوزىندە بولات باقاۋوۆ ينۆەستورلاردى قولداۋ قاجەتتىلىگىن جانە وبلىسقا 160 ملرد. ينۆەستيتسيا تارتىلعانىن ايتىپ ءوتتى. اۋىل شارۋاشىلىعى سالاسى, مال شارۋاشىلىعىن دامىتۋ ءۇشىن 5 تاۋارلى ءسۇت فەرماسىن, 18 قايتا وڭدەۋ نىساندارى,  3 ازىقتاندىرۋ الاڭىن پايدالانۋعا بەرۋ جوسپارلانۋدا.

وبلىس ورتالىعىندا  2000 گا جەر ۋچاسكەلەرىن قامتيتىن ينفراقۇرىلىم جۇيەلەرى كورسەتىلگەن ەلەكتروندى كارتا جاسالۋدا.

ال, «نۇرلى جول» باعدارلاماسىن جۇزەگە اسىرۋ ءۇشىن 9,6 ملرد. تەڭگە بولىنگەن. باياناۋىلعا دەيىنگى 206 شاقىرىم جول جوندەلۋدە.

بىراق, اۋىلدارعا ءالى سۋ جەتپەي تۇر. بۇل جايىندا جۋىردا وبلىسقا جۇمىس ساپارىمەن كەلگەندە ەلباسى دا ايتىپ ءوتتى.

ۇكىمەتتىڭ قولداۋىمەن وتكەن جىلى 365 شاقىرىم سۋ جەلىسى تارتىلسا, بيىل 270 شاقىرىمى تارتىلماق.  بۇل كۇندەرى 41 اۋىلدا جالپى قۇنى 13,1 ملرد. تەڭگەنى قۇرايتىن  37 جوبا جۇزەگە اسىرىلۋدا.  وتكەن جىلى ەرتىس اۋدانى, بەلوۆود توپتىق سۋ قۇبىرلارىنىڭ 1-ءىنشى كەزەڭى پايدالانۋعا بەرىلدى. قازىر اۋىلدارىندا اۋىلىشىلىك جەلىلەر سالىنا باستادى. ماي اۋدانىندا توپتىق سۋ قۇبىرلارى جەلىسىندە ماگيسترالدى قۇبىر جەلىسى مەن تازارتۋ ستانسالارىن سالۋ قاجەت.

وبلىس اكىمىنىڭ ءوز ەسەبىندە  300 مىڭ شارشى مەتر تۇرعىن ءۇي پايدالانۋعا بەرىلەتىنىن ايتتى. ەسەپتىڭ اتى ەسەپ. بىراق, جوبالار سوزبەن ەمەس, ورىندالۋىمەن ماڭىزدى. «نۇرلى جەر» باعدارلاماسى بويىنشا 252 تۇرعىن پاتەر الدى. جىلدىڭ سوڭىنا دەيىن 1009 پاتەر بەرىلەدى. بۇگىنگى كۇنى تۇرعىن ۇيلەردىڭ قۇرىلىسى «سارىارقا» اۋدانىندا قارقىندى ءجۇرىپ جاتىر. جىلدىڭ اياعىنا دەيىن بۇل اۋداندا 9 ءۇي پايدالانۋعا بەرىلەدى.

فاريدا بىقاي

«ەگەمەن قازاقستان»

پاۆلودار

سۋرەتتى تۇسىرگەن: ۆالەري بۋگاەۆ