تاياۋدا استاناداعى س.سەيفۋللين اتىنداعى قازاق اگروتەحنيكالىق ۋنيۆەرسيتەتىنە قىتاي اۋىلشارۋاشىلىعى عىلىمدارى اكادەمياسىنىڭ پرەزيدەنتى تانگ حۋادجۋن كەلدى. دەلەگاتسيا قۇرامىندا ماقتا شارۋاشىلىعى ينستيتۋتىنىڭ ديرەكتورى لي فۋگۋان, حاربين ۆەتەرينارلىق ينستيتۋتىنىڭ ديرەكتورى بۋ جيگاو, باۋ-باقشا ينستيتۋتىنىڭ ديرەكتورى تساو يۋنشەن, حالىقارالىق ىنتىماقتاستىق بيۋروسىنىڭ ديرەكتورى گۋن سيفەن, قاشعا پرەزيدەنتىنىڭ حاتشىسى سيۋە پەنفەي بولدى.
دەلەگاتسيانى باسقارما توراعاسى ا.كۇرىشباەۆ, باسقارما توراعاسىنىڭ ستراتەگيالىق جوسپارلاۋ, عىلىم جانە حالىقارالىق بايلانىستار جونىندەگى ورىنباسارى س.موگيلنىي, ۆەتەريناريا جانە مال شارۋاشىلىعى تەحنولوگياسى فاكۋلتەتىنىڭ دەكانى س.ابدراحمانوۆ قارسى الدى.
رەكتور ا.كۇرىشباەۆ ۋنيۆەرسيتەتتىڭ حالىقارالىق قىزمەتىمەن قىسقاشا تانىستىرىپ, بۇل كەزدەسۋ قازاتۋ قابىرعاسىندا اۋىلشارۋاشىلىق سالاسىندا جوعارى تەحنولوگيالاردى دامىتۋ ارقىلى كەڭ اۋقىمدى ماسەلەلەردى تالقىلاۋعا مۇمكىندىك بەرەتىنىن, وسىلايشا قازاقستان مەن قىتايدىڭ ءوزارا ءتيىمدى حالىقارالىق قاتىناستارىندا اگروونەركاسىپتىك كەشەندى دامىتۋعا جاڭا سەرپىن جاسايتىنىن اتاپ ءوتتى.
كەزدەسۋ بارىسىندا قازاق-قىتاي بيوقاۋىپسىزدىك زەرتحاناسىنىڭ تۇساۋكەسەر ءراسىمى وتكىزىلدى. زەرتحانا اۋىل شارۋاشىلىعى جانۋارلارىنىڭ اۋرۋلارىن سەرولوگيالىق, باكتەريولوگيالىق جانە مولەكۋليارلى-گەنەتيكالىق (پتر) دياگنوستيكالاۋ مەن ساپالى انىقتاۋعا باعىتتالعان. سونداي-اق ورگانيكالىق, قىتايعا ەكسپورتتالاتىن تاعام قاۋىپسىزدىگىن باقىلايتىن بولادى. قۇرىلعان زەرتحانا BSL-2 حالىقارالىق قاۋىپسىزدىك ستاندارتتارىنا سايكەس كەلەدى, بىراق ونىڭ قۇرىلىمى, بارلىق ينجەنەرلىك كوممۋنيكاتسيالارى مەن جابدىقتارى BSL-3 قاۋىپسىزدىك ستاندارتتارىنا ساي جاساقتالعان.
ەكى تاراپ اراسىندا ءوزارا ىنتىماقتاستىق جونىندە كەلىسسوزدەر جۇرگىزىلدى. سونداي-اق قىتاي اۋىل شارۋاشىلىعى عىلىمدار اكادەمياسىنىڭ پرەزيدەنتى تانگ حۋادجۋنعا س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ قۇرمەتتى پروفەسسورى اتاعى بەرىلدى.
«ەگەمەن-اقپارات»