تۇركىستانعا كوشۋ باستالدى

العاشقىلاردىڭ ءبىرى بولىپ مەملەكەتتىك كىرىستەر دەپارتامەنتى كوشتى باستاپ, تۇركىستان قالاسىندا قارجى مينيسترلىگىنە قاراستى اۋماقتىق ورگاننىڭ وكىلدىگىن اشتى. اشىلۋ سالتاناتىندا قارجى مينيسترلىگىنىڭ جاۋاپتى حاتشىسى ب.تورتاەۆ مينيسترلىكتىڭ وبلىستىق ورگاندارىنىڭ وكىلدىلىگىڭ جاڭا وبلىس ورتالىعىندا اشۋدىڭ نەگىزگى ماقساتى — مەملەكەتتىك ورگانداردى عيماراتتارمەن قامتاماسىز ەتۋ, ورنالاستىرۋ جانە كوشىپ كەلەتىن قىزمەتكەرلەرگە الەۋمەتتىك جاعداي جاساۋدى ۇيلەستىرۋ جۇمىستارىن جۇرگىزۋ ەكەندىگىن اتاپ ءوتتى.

ايتا كەتەلىك, تۇركىستان قالاسىنا كوشىپ باراتىن مەملەكەتتىك قىزمەتكەردىڭ ەڭبەك اقىسىنا 20 پايىز قوسىلىپ, جۇمىس كەزەڭى ءۇشىن تولەنەتىن جىل سايىنعى ەڭبەك دەمالىسى كۇنتىزبەلىك 30 كۇنگە قوسىمشا ەكولوگيالىق كۇنتىزبەلىك 7 كۇن مەرزىمىندە ساۋىقتىرۋ دەمالىسى بەرىلەتىن بولادى. سونداي-اق, وبلىس اكىمى ج.تۇيمەباەۆ وبلىس ورتالىعىنىڭ تۇركىستان قالاسىنا كوشىرىلۋىنە بايلانىستى وبلىس اكىمى اپپاراتى مەن باسقارمالاردىڭ قىزمەتكەرلەرىمەن كەزدەسۋىندە ەڭبەك دەمالىسىن بەرۋمەن بىرگە جىل سايىن ساۋىقتىرۋعا ارنالعان تولەمدەردىڭ ۇستىنە ءبىر ايلىق كورسەتكىش كولەمىندە ماتەريالدىق كومەك بەرىلەتىنىن ءمالىم ەتتى. وسىلايشا مەمقىزمەتكەر ەڭبەك دەمالىسى كەزىندە جالپى 3 ماتەريالدىق ايلىق اقى الاتىن بولادى. بۇدان بولەك, وبلىس اكىمى كوشىپ باراتىن قىزمەتكەرلەرگە جالدامالى ۋاقىتشا تۇراتىن تۇركىستان, كەنتاۋ قالالارىنان پاتەرلەر مەن قوناق ۇيلەردىڭ, جاتاقحانالاردىڭ تىزبەسى انىقتالىپ, جۇمىستاردىڭ جالعاسىپ جاتقاندىعىن ايتتى. «بۇل ۇيلەردى جالداپ تۇرۋدا رەسپۋبليكالىق بيۋدجەتتەن ءار قىزمەتكەرگە اي سايىن 81 600 تەڭگەدەن جاردەماقى بەرىلەدى. سونداي-اق, كەلىسىم شارت نەگىزدە جۇمىس ىستەيتىن بارلىق قىزمەتكەرلەر دە جاتاقحانالارمەن قامتىلاتىن بولادى. جانە ەلباسىنىڭ حالىققا ۇندەۋىنىڭ ءبىرىنشى باعىتى «7-20-25» باعدارلاماسى اياسىندا وسى جىلى تۇركىستان قالاسىندا جەكە سالۋشىلار ەسەبىنەن 6 كوپقاباتتى تۇرعىن ءۇي, ياعني, 15,6 مىڭ شارشى مەتر بولاتىن 288 پاتەردىڭ قۇرىلىسى باستالعان. 2019 جىلى قۇرىلىسى ءبىتىپ, پايدالانۋعا بەرۋدى جوسپارلاپ وتىرمىز, سوندىقتان دا جاس مەملەكەتتىك قىزمەتكەرلەردى وسى باعدارلاماعا قاتىسۋعا شاقىرامىن»,- دەدى ج.تۇيمەباەۆ.

ءوڭىر باسشىسىنىڭ ايتۋىنشا, الداعى 1,5 جىل ىشىندە بارلىق قىزمەتكەرلەر قىزمەتتىك پاتەرلەرمەن قامتاماسىز ەتىلەدى, ال ەڭبەك ءوتىلى 10 جىلدان جوعارى, مەنشىگىندە پاتەر تىركەلمەگەن جاعدايدا, ءتيىستى ەرەجەگە سايكەس قىزمەتكەرلەرگە قالدىق سومماسىمەن قىزمەتتىك پاتەرلەردى جەكە مەنشىككە بەرۋ ماسەلەسى ارنايى كوميسسيادا قاراستىرىلاتىن بولادى. كەلەسى جىلى مەملەكەتتىك اكىمشىلىك قىزمەتشىلەرگە ەڭبەكاقى تولەۋ جۇيەسىنە پيلوتتىق رەجيم ەنگىزىلمەك. ياعني جۇمىس ساپاسى مەن ناتيجەسىنە قاراي قىزمەتكەرلەردىڭ ايلىق جالاقىسى 1,5 مەن 2,5 ەسەگە دەيىن كوتەرىلەدى.

ەركىن دوسىمباي,

تۇركىستان وبلىسى