قازاقتىڭ كورنەكتى جازۋشىسى, قازاقستان رەسپۋبليكاسى مەملەكەتتىك سىيلىعىنىڭ يەگەرى اكىم تارازي بيىل 85 جاسقا تولادى. قازاق وقىرمانىنا ءوزىنىڭ «ۇلكەن اۋىل», «قىز ماحابباتى», «قيانسوقپاق», «تاسجارعان» جانە وزگە دە شىعارمالارىمەن تانىمال قالامگەر تۋعان توپىراعىنا كەلىپ, حالىقپەن جۇزدەستى. اۋليەاتالىقتار جەرلەس قالامگەردى يگى نيەتپەن قارسى الىپ, لايىقتى قۇرمەت كورسەتتى.
بۇگىن تاراز قالاسىنداعى جامبىل اتىنداعى «رۋحانيات» ورتالىعىندا وبلىستىق ىشكى ساياياسات باسقارماسىنىڭ ۇيىمداستىرۋىمەن جازۋشى اكىم تارازيمەن كەزدەسۋ ءوتتى. كەزدەسۋگە پارلامەنت سەناتىنىڭ دەپۋتاتى ابدالى نۇراليەۆپەن قاتار اۋليەاتا وڭىرىندە تۇراتىن نەسىپبەك ءداۋتاي ۇلى, قايىربەك اسانوۆ, شىرىن ماماسەرىكوۆا جانە باسقا دا اقىن-جازۋشىلار قاتىستى. اتالعان ادەبي شارانى وبلىستىق ىشكى ساياسات باسقارماسىنىڭ باسشىسى بەرىك ءۋالي جۇرگىزىپ وتىردى.
ەركىن فورماتتا وتكەن كەزدەسۋ بارىسىندا اكىم تارازي ءوزىنىڭ ءومىر جانە شىعارماشىلىق جولىنان اڭگىمە ءوربىتتى. سونىمەن قاتار, قالامگەر كوپشىلىككە تۋعان جەر تۋرالى تولعانىسىن, ادەبيەت تۋرالى ويلارىن جەتكىزدى. كەڭەستىك كەزەڭدە ءماجيت بەگاليننىڭ رەجيسسەرلىگىمەن تۇسىرىلگەن «تۇلپاردىڭ ءىزى» كينوفيلمىنىڭ تاعدىرى تۋرالى دا اڭگىمەلەدى. سونداي-اق, جازۋشى ءوز ومىرىندە ەرەكشە ماڭىزعا يە كەزەڭدەرگە توقتالىپ, لەنينگراد ۋنيۆەرسيتەتىنىڭ كىتاپحاناسىنان قاسيەتتى قۇران كىتابىن سۇراعانى ءۇشىن قۋعىنعا تۇسكەنىن دە ايتتى. سول ارقىلى كەڭەستىك كەزەڭنىڭ قيىن بولعانىن, سوندا دا بولاشاق ۇرپاقتىڭ يگىلىگى ءۇشىن شىعارمالار جازعانىن اڭگىمەلەدى. الپىسىنشى جىلدارى ادەبيەتكە قاتار كەلگەن قاليحان ىسقاق, سايىن مۇراتبەكوۆ, رامازان توقتاروۆ سياقتى قالامداستارى تۋرالى ەستەلىكتەر ايتىپ, ولاردى ساعىنىشپەن ەسكە الدى. بۇل رەتتە جازۋشى «مەن دوستارىمدى ءوزىم تاڭدادىم» دەپ اعىنان جارىلدى. «تۋعان جەرگە كەلىپ, حالىقپەن جۇزدەسۋدىڭ ءوزى مىڭ وردەنگە تاتيدى. تۋعان توپىراعىم مەن ءۇشىن ءاردايىم ىستىق ءارى قاستەرلى» دەدى جازۋشى ءوز سوزىندە. اڭگىمە بارىسىندا جازۋشىنىڭ جارى, بەلگىلى جازۋشى روزا مۇقانوۆا اكىم ءتارازيدىڭ ءومىرى مەن شىعارماشىلىعىنداعى جۇلدىزدى ساتتەرگە توقتالدى.
اۋليەاتا وڭىرىندە بۇگىننەن باستاپ اكىم ءتارازيدىڭ 85 جىلدىعىنا ارنالعان شارالار باستالىپ كەتتى. قازاق ءسوز ونەرىندە ايتۋلى بيىككە كوتەرىلگەن قالامگەرگە دەگەن قۇرمەت ەشقاشان تولاستامايدى.
حاميت ەسامان,
«ەگەمەن قازاقستان»
جامبىل وبلىسى