بيىل 4-سىنىپتى بىتىرگەن ريددەرلىك سانجار ساعىندىقوۆتىڭ الەمگە ايگىلى نەمىس كومپوزيتورى ليۋدۆيگ ۆان بەتحوۆەن سەكىلدى ەستۋ قابىلەتى ناشار بولسا دا, مۋزىكاعا دەگەن قۇشتارلىعى عالامات. ارنايى قۇرىلعى كومەگىمەن داۋىستىڭ 50 پايىزىن عانا ەستيتىن 11 جاستاعى تالانتتى ءبۇلدىرشىن فورتەپيانو مەن گيتارادا قاتار وينايدى ەكەن.
اتا-اناسى ونىڭ قۇلاعى دۇرىس ەستىمەيتىنىن 4 جاسىندا ءبىلىپتى. مۋزىكاعا قىزىعۋشىلىعىن 6 جاسىندا اڭعارىپ, قالاداعى مۋزىكا مەكتەبىنە بەرىپتى. « ۇلىمىز ءبىرىنشى سىنىپتا جۇرگەندە 5-سىنىپقا ارنالعان بەتحوۆەننىڭ «ەليزاعا» دەگەن شىعارماسىن فورتەپيانودا وينادى. بۇل مۋزىكانى ءبىر جەردەن ەستىگەن بولۋى كەرەك: «وسى مۋزىكادا ويناعىم كەلەدى» دەپ ءوتىندى بىزگە. بىردەن نوتاسىن تاۋىپ, قاعازعا شىعارىپ بەردىك. لەزدە ۇيرەنىپ الدى. وقىتۋشىسى بۇعان قاتتى تاڭىرقادى», دەيدى بالعىن مۋزىكانتتىڭ اناسى ءسانيا.
سانجار وسى ۋاقىتقا دەيىن وبلىس, رەسپۋبليكانى قويىپ, حالىقارالىق بايقاۋلارعا دا قاتىسىپ ۇلگەرىپتى. لاتيف حاميدي اتىنداعى حالىقارالىق بايقاۋدىڭ ءۇش مارتە گران-ءپريىن يەلەنىپتى (ەكەۋى – فورتەپيانودان, بىرەۋى گيتارادان). 2016, 2017 جىلدارى رەسەيدىڭ بارناۋل قالاسىندا وتكەن گيتاراشىلار بايقاۋىندا I جانە II ورىنداردى جەڭىپ الىپ, تەرىسكەيدەگى كورشىلەرىمىزدى ونەرىمەن ءتانتى ەتىپتى. «رۋحاني جاڭعىرۋ» باعدارلاماسى اياسىندا ۇيىمداستىرىلعان «تاڭعى شۇعىلا» بايقاۋىنىڭ وبلىستىق, رەسپۋبليكالىق كەزەڭدەرىندە دە توپ جارىپتى. بيىل بۋرابايدا بولعان «Burabay Summer Fest» حالىقارالىق بايقاۋىندا 400 بالانىڭ ىشىنەن I ورىندى قانجىعاسىنا بايلاپ, اقش-تىڭ لوس-اندجەلەس قالاسىنا جولداما بەرگەن گران-پريگە قول سوزىم جەردەن قايتىپتى. ء«بىزدىڭ بالامىز قۇلاعى 50 پايىز ەستىسە دە, دەنى ساۋ بالالارمەن بىرگە ءتۇرلى ونەر سايىستارىنا قاتىسىپ ءجۇر. بىراق جەڭىلدىك جاساپ, ەلەپ-ەسكەرىپ جاتقان ەشكىم جوق», - دەيدى سانجاردىڭ اناسى.
ريددەر قالاسىنداعى فيزيكا-ماتەماتيكا مەكتەبىندە وقيتىن ونەرلى ورەن ءوزىنىڭ مۋزىكالىق قابىلەتىن كۇننەن كۇنگە ۇشتاپ, جاستىعىنا, ەستۋىنىڭ ناشارلىعىنا قاراماستان كۇردەلى شىعارمالاردى تەز يگەرىپ الاتىن كورىنەدى. ءتىپتى بار-جوعى 10-15 مينۋتتا نوتالاردى وقىپ, شەدەۆر تۋىندىلاردى جارتى ساعاتتا ۇيرەنىپ الادى ەكەن.
فورتەپيانو مەن گيتارانىڭ قۇلاعىندا وينايتىن وقۋشىنىڭ اكە-شەشەسى قاراپايىم. ەكەۋى دە تەمىرجولدا جۇمىس ىستەيدى. «سانجاردىڭ ەكى ارمانى بار. ەكى جىلدا ءبىر رەت ءار ەلدە ءوتىپ وتىراتىن چايكوۆسكي اتىنداعى بايقاۋ مەن ءوزىمىزدىڭ ەلوردادا ءوتىپ جۇرگەن جاس پيانيستەردىڭ «Astana Piano Passion» حالىقارالىق فەستيۆال-بايقاۋىنا قاتىسقىسى كەلەدى. اسىرەسە دەنيس ماتسۋەۆتى ءبىر كورىپ, جۇزدەسۋدى قاتتى ارمانداپ ءجۇر», - دەيدى ونەرپاز بالانىڭ اكەسى تالعات ساعىندىقوۆ.
«سانجاردى ەمدەتۋ ويلارىڭىزدا جوق پا؟» دەگەن ساۋالىمىزعا اتا-اناسى: «نەرۆ جۇيەسى جانسىزدانىپ قالعان دەيدى. ەشقايدا اپارىپ, دۇرىستاپ تەكسەرۋدەن دە وتكىزگەن جوقپىز» دەپ جاۋاپ بەردى. بالكىم, ەمدەتۋگە مۇمكىندىكتەرى بولماي جاتىر ما؟ ول جاعىن اشىپ ايتپادى.
تالانت – مەملەكەت بايلىعى. ەندەشە, الداعى ۋاقىتتا تالانتتى بالعىندى شەت ەلگە جىبەرىپ, ەمدەتۋ جاعىن دا ويلاستىرۋ كەرەك بولار.
ازامات قاسىم,
«ەگەمەن قازاقستان»
شىعىس قازاقستان وبلىسى,
ريددەر قالاسى