مادەنيەت جانە سپورت مينيسترلىگى مەن «قازاقستان حور ديريجەرلەرى» رەسپۋبليكالىق قوعامدىق بىرلەستىگى ەلوردانىڭ 20 جىلدىعى اياسىندا اۋقىمدى مۋزىكالىق جوبا – «استانا – الەم داۋىسى» حالىقارالىق فەستيۆالىن ۇيىمداستىرۋدا.
قازان ايىنىڭ 10-11 كۇندەرى استاناعا بەس كونتينەنتتەن جينالعان ءارتۇرلى دىندەر مەن كونفەسسيالاردى بىلدىرەتىن 500 ءارتىس كەلەدى. بەيبىتشىلىك جانە كەلىسىم سارايىنىڭ ساحناسىندا تۇڭعىش رەت بىرىڭعاي شىعارماشىلىق ىرعاعىندا سوعىسسىز جانە تەرروريزمسىز بەيبىتشىلىك ءۇشىن ءان ايتىلادى.
الداعى فەستيۆال «دىندەردىڭ كوشباسشىلارى قاۋىپسىز الەم ءۇشىن» تاقىرىبىنا ارنالعان دۇنيەجۇزىلىك جانە ءداستۇرلى دىندەردىڭ كوشباسشىلارىنىڭ VI سەزدى شەڭبەرىندە وتەدى. پرەزيدەنت نۇرسۇلتان نازارباەۆ باستاماسىمەن ۇيىمداستىرىلعان سەزد بەيبىتشىلىك, كەلىسىم جانە توزىمدىلىك ورتالىعى رەتىندە استانا مارتەبەسىن نىعايتۋدا ماڭىزدى ءرول اتقارادى.
تىڭدارماندار الەمنىڭ 20 ەلىنەن ياعني, اقش, وار, يزرايل, ماجارستان, تۇركيا, بولگاريا, رەسەي, بەلارۋس رەسپۋبليكاسى, گرۋزيا, ازەربايجان, وزبەكستان, قىرعىزستان, شري-لانكا, يندونەزيا, قۇر, جانە باسقا ەلدەردەن كەلگەن ولەڭ ۇجىمدارىنىڭ ونەرىن تاماشالاي الادى.
«فەستيۆال اياسىندا تىڭدارماندار مۋزىكانىڭ ءارتۇرلى جانرلارى مەن ءارتۇرلى باعىتىمەن تانىسا الادى. ءبىر سوزبەن ايتقاندا, سىزدەردى ۇلكەن مۋزىكا مەرەكەسى كۇتەدى. فەستيۆال اندەرى ءارتۇرلى تىلدەردە ورىندالاتىنىنا قاراماستان, ادامدارعا ءبىر ءبىرىن جاقسى تۇسىنۋگە كومەكتەسەتىنىنە سەنىمدىمىن», دەيدى جوبا اۆتورى گۇلميرا كۇتتىباداموۆا.
بەيبىتشىلىكتى قولداۋ ءۇشىن مۋزىكا مەرەكەسى الەم دەڭگەيىندەگى ديريجەرلار مەن اتاعى شىققان حالىقارالىق سىيلىقتاردىڭ لاۋرەاتى - كومپوزيتور جانە ورىنداۋشى اميكاەلا گاستون (اقش), ديريجەرلار - گابور حوللەرۋنگ (ماجارستان), زيمفيرا پولوز (كانادا), قر ەڭبەگى سىڭگەن قايراتكەرى بەيىمبەت دەمەۋوۆ, گۇلميرا قۇتتىباداموۆا جانە باسقالاردىڭ قاتىسۋىمەن وتەدى.