امەريكالىق «World Wide Motion Pictures Corporation» كومپانياسى مادەنيەت جانە سپورت مينيسترلىگى تاپسىرىسى بويىنشا ش.ايمانوۆ اتىنداعى «قازاقفيلم» اق جانە «نوۆىي مير» پروداكشن» جشس-ءىنىڭ بىرلەسە تۇسىرگەن «اناعا اپارار جول» ءفيلمىنىڭ سولتۇستىكامەريكالىق وڭىردە ديستريبۋتسيالاۋ قۇقىعىن ساتىپ الدى. ەستەرىڭىزگە سالا كەتەيىك, اتالعان فيلم بىلتىر قازاقستان اتىنان «وسكار» جانە «التىن گلوبۋس» «ۇزدىك شەتەل ءفيلمى» اتالىمىنا ۇسىنىلعان ەدى.
باس پروديۋسەرى ءاليا نازارباەۆا, رەجيسسەرى اقان ساتاەۆ بۇل فيلمگە كىل جۇلدىزداردى جيناعان. «اناعا اپارار جول» فيلمىندە ەلىمىزدىڭ تانىمال اكتەرلەرى – التىناي نوگەربەك, ءادىل احمەتوۆ, ارۋجان جازىلبەكوۆا, بەرىك ايتجانوۆ, بولات ءابدىلمانوۆ تۇسكەن. بۇل ەپيكالىق فيلمنەن كورەرمەن قازاق وتباسىنىڭ 1930 جىلداردان باستاپ, كۇنى بۇگىنگە دەيىنگى باستان كەشكەن تاعدىرىن كورە الادى.
«پروديۋسەرلەرىمىزگە, ءتۇسىرىلىم توبىن جانە ماعان دا ءفيلمدى اقش كينوتەاترلارىندا كورسەتۋ – ۇلكەن ابىروي. «World Wide Motion Pictures Corporation» كومپانياسى فيلمدەگى شىنايىلىقتى كورىپ, ونداعى وقيعا جەلىسى الەمنىڭ بارلىق اۋديتورياسىنا ۇعىنىقتى بولاتىنىنا سەنىم بىلدىرگەنىنە قۋانىپ وتىرمىن», دەدى بۇل جونىندە رەجيسسەر اقان ساتاەۆ.
«بىرنەشە ۇرپاقتىڭ تاريحىن باياندايتىن, ونىڭ ۇستىنە «وسكار» سىيلىعىنا ىلگەرىدە ۇسىنىلعان تەرەڭ درامانى پروكاتتاۋدى ماقتان سانايمىز. امەريكالىق وتباسىلار, اسىرەسە انالار قاۋىمى جانعا جىلۋ سىيلايتىن ءفيلمدى قۋانا كورەدى», دەدى «World Wide Motion Pictures Corporation» كومپانياسىنىڭ باس ديرەكتورى پول د.حەنكوك.
«اناعا اپارار جول» ءفيلمى اقش-تا شەكتەۋلى پروكاتقا بيىل كۇزدە ازيا-امەريكالىق ۇيىمداردىڭ قولداۋىمەن شىعادى.
ايتا كەتەلىك, «اناعا اپارار جول» ءفيلمىنىڭ تۇساۋكەسەرى 38-ءشى حالىقارالىق ماسكەۋ كينوفەستيۆالىندە ءوتىپ, سىنشىلاردىڭ وڭ باعاسىن العان. سونىمەن قاتار, فيلم ءتۇرلى كينوفەستيۆالدەردەن جۇلدە الىپ, حالىقارالىق كورسەتىلىمدەرى وتكەن. 19 شىلدە كۇنى وسىنداي كورسەتىلىم ۆاشينگتونداعى كارنەگي ينستيتۋتىندا «رۋحاني جاڭعىرۋ» باعدارلاماسى اياسىندا ءوتتى.
باعاشار تۇرسىنباي ۇلى,
«ەگەمەن قازاقستان»