پارلامەنت سەناتىنىڭ دەپۋتاتتارى داۋرەن ادىلبەكوۆ پەن راشيت اكىموۆ اقمولا وبلىسىنا جۇمىس ساپارى اياسىندا پرەزيدەنتتىڭ بەس الەۋمەتتىك باستاماسىنىڭ ورىندالۋ بارىسىمەن تانىستى. پارلامەنتشىلەر باستامانىڭ ءار تارماعى بويىنشا وزەكتى ماسەلەلەردى, پىكىرلەر مەن ۇسىنىستاردىڭ توپتاماسىن جيناقتاۋدى جوسپارلاپ وتىر.
وبلىستىق ءماسليحاتتىڭ وتىرىسىندا وڭىردە جۇرگىزىلگەن جۇمىستاردىڭ ارالىق ناتيجەلەرى ساراپقا سالىندى. جيىنعا وبلىستىق باسقارمالار باسشىلارى, ەكىنشى دەڭگەيدەگى بانكتەردىڭ وكىلدەرى قاتىستى. وبلىس اكىمىنىڭ ورىنباسارى قانات ىدىرىسوۆ رەسپۋبليكالىق بيۋدجەتتەن 2019-2021 جىلدارعا ارنالعان تۇرعىن ءۇي قۇرىلىسىنا بولىنەتىن قارجى ەسەبىنەن «7 – 20 – 25» باعدارلاماسى بويىنشا ينجەنەرلىك كوممۋنيكاتسيا قۇرىلىسىنا جوسپار جاسالعانى تۋرالى حاباردار ەتتى.
ەلباسىنىڭ باسقا باستامالارى بويىنشا دا بەلسەندى جۇمىس جۇزەگە اسۋدا. ەسەپتەۋلەر بويىنشا وبلىستاعى ەڭبەكاقىسى تومەن 22 مىڭ جۇمىسشىعا ەڭبەكاقىسىن كوتەرۋ ءۇشىن سالىق ازايتىلاتىن بولادى. ستۋدەنتتەرگە ارنالعان جاتاقحانالار سالۋ تەتىكتەرى ازىرلەنۋدە. قازىرگى ۋاقىتتا وبلىستا 2 870 ستۋدەنتتى ورنالاستىرۋ ءۇشىن 11 جاتاقحانا سالۋ قاجەت. كوكشەتاۋ قالاسىنىڭ اكىمدىگى 4,5 گەكتاردان استام ىڭعايلى جەر تەلىمىن بەلگىلەدى. شاعىن جانە ورتا بيزنەسكە شاعىن نەسيە بەرۋدى ۇلعايتۋعا قارجى ءبولۋ جوسپارلانىپ وتىر. سونىمەن قاتار گازبەن قامتاماسىز ەتۋدىڭ جول كارتاسى ازىرلەندى. ارشالى اۋدانىندا 40 مىڭنان استام تۇرعىنى بار 17 ەلدى مەكەن, تسەلينوگراد اۋدانىندا 90 مىڭنان استام تۇرعىنى بار 7 ەلدى مەكەن گازبەن قامتاماسىز ەتىلمەك.
دەپۋتاتتارعا كەزدەسۋلەر بارىسىندا «7 – 20 – 25» باعدارلاماسى بويىنشا نەسيە بەرۋ كەزىندە جاس ەرەكشەلىكتەرىنىڭ ەسكەرىلۋىنە, باعدارلامانىڭ اۋىلدىق جەرلەردە ءۇي ساتىپ الۋ مۇمكىندىگىنە, العاشقى جارنانىڭ تۇرعىن ءۇي باعاسىنىڭ 20 پايىزدان اسۋىنا قاتىستى ساۋالدار ءجيى قويىلدى.
سونداي-اق «7 – 20 – 25» باعدارلاماسى بويىنشا وبلىستا ءبىر عانا بانكتىڭ ەكى نەسيە بەرگەنى ايتىلدى. ەندى بولىمشەلەر اۋقىمى كەڭ ءىرى بانكتەردىڭ قوسىلۋى ارقىلى نەسيەلەندىرۋ اياسىن ۇلعايتۋ قاجەتتىگى بەلگىلى بولىپ وتىر. باعدارلاماعا ەكىنشى دەڭگەيلى جەتى بانك قاتىسۋى ءتيىس.
باعدارلامالىق قۇجاتتىڭ باسقا تارماقتارى دا جان-جاقتى قارالدى. وبلىستىق ءماسليحات دەپۋتاتتارى مەن مەملەكەتتىك ورگانداردىڭ باسشىلارىنا بەس الەۋمەتتىك باستامانى ناقتى جاعدايعا مەيلىنشە بەيىمدەۋگە كومەكتەسەتىن ناقتى ۇسىنىستار ايتىلدى.
«نۇر وتان» پارتياسى دەپۋتاتتىق فراكتسيا مۇشەلەرى ءابدىماناپ بەكتۇرعانوۆ, ومارحان وكسىكباەۆ, زاعيپا باليەۆا مەن مارات بوپازوۆ باستاعان ءبىر توپ ءماجىلىس دەپۋتاتتارى قاپشاعاي قالاسىنداعى ش.ءۋاليحانوۆ اتىنداعى ورتا مەكتەپتىڭ جانىنداعى سپورت الاڭدارىنىڭ جۇمىسىمەن تانىستى.
كەزدەسۋگە وبلىستىق ءماسليحات دەپۋتاتتارى, اكىمدىك وكىلدەرى, جاس سپورتشىلار مەن مەكەمە ۇجىمى قاتىستى. بىلتىر مەكتەپ جانىنداعى فۋتبول جانە ۆولەيبول الاڭدارىنىڭ, باسكەتبول, ۆوركاۋت, بوكسەرلىك الاڭ, دۋش جانە كيىم اۋىستىراتىن ارنايى بولمەلەر سالىنىپ, قولدانىسقا بەرىلگەن. سونداي-اق روليك تەبەتىن الاڭ مەن ستاديون الدىندا 45 جەڭىل اۆتوكولىككە تۇراق سالىنعان. وعان قوسا, بيىل جاڭا پارتيالىق جوبا اياسىندا قوسىمشا 14 ملن تەڭگە قاراجاتقا جۇگىرۋ جولدارى, باسكەتبول الاڭدارى مەن فۋتبول الاڭىنىڭ قورشاۋىن جاساۋ جوسپارلانۋدا. ءماجىلىس دەپۋتاتى ءابدىماناپ بەكتۇرعانوۆ سپورت الاڭدارىن قايتا جاڭعىرتۋ جۇمىسى, ودان بولەك ستۋدەنتتەردىڭ ىستىق تاماقپەن قامتىلۋى, ولاردىڭ جاتاقحانا ماسەلەسىنىڭ شەشىلۋى حالىق قالاۋلىلارىنىڭ نازارىنان تىس قالمايتىنىن ايتىپ ءوتتى.
اتىراۋعا ارنايى ىسساپارمەن كەلگەن ءماجىلىس دەپۋتاتى باقتيار ماكەن دينا نۇرپەيىسوۆا اتىنداعى مۋزىكا كوللەدجى جاتاقحاناسىنىڭ قۇرىلىسىمەن تانىستى.
تاياۋدا پايدالانۋعا بەرىلەتىن 100 ورىندىق جاتاقحانادا وبلىستىڭ شالعاي اۋداندارىنان كەلگەن ستۋدەنتتەر ورنالاساتىن بولادى. كوللەدج ديرەكتورىنىڭ ورىنباسارى ا. سۇندەتقاليەۆانىڭ ايتۋىنشا, بىلتىرعى وقۋ جىلىندا 217 ستۋدەنتتىڭ 116-سىنا جاتاقحانا جەتىسپەۋشىلىگى تۋىنداعان. زاماناۋي ۇلگىدە سالىنىپ جاتقان عيماراتتا ستۋدەنتتەر ءۇشىن بارلىق جاعداي قاراستىرىلعان. ايتا كەتۋ كەرەك, ەلباسىنىڭ بەس الەۋمەتتىك باستاماسى اياسىندا اتىراۋ وبلىسىندا ستۋدەنتتەردىڭ جاتاقحانا ماسەلەسىن شەشۋ ماقساتىندا بىرقاتار شارالار قولعا الىنعان. مىسالى, «قازترانسويل» اق-تىڭ باتىس فيليالى كومپانياعا قاراستى 700 ورىندىق جاتاق- حانانى ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنە سىيعا تارتىپ, قازىر اتالعان وقۋ ورنى بويىنشا جاتاقحانا ماسەلەسى تولىق شەشىلدى. ال اتىراۋ ينجەنەرلىك-گۋمانيتارلىق ينستيتۋتى ستۋدەنتتەرىنىڭ جاتاقحاناعا دەگەن سۇرانىسىن قامتاماسىز ەتۋ ماقساتىندا بيىل ارنايى جەر تەلىمى ءبولىنىپ, كەلەسى جىلى قۇرىلىس جۇمىستارى باستالماق. پارلامەنت دەپۋتاتى باقتيار ماكەن قۇرىلىس نىسانىن ارالاپ بولعان سوڭ, جاستار مەن جاستار ۇيىمدارىنىڭ باسشىلارىمەن كەزدەستى.
دايىنداعان ۆەنەرا تۇگەلباي, «ەگەمەن قازاقستان»