قازاقستاندىق وقۋشىلار ۇلىبريتانيانىڭ اەروكوسموس مەكتەبىنە بارادى

ەكىنشى رەت وتكەلى وتىرعان كونكۋرستىڭ ماقساتى – كولىك سالاسىنا دەگەن قىزىعۋشىلىقتى ارتتىرۋ جانە ءبىلىمدى تەرەڭدەتۋ, سونىمەن قاتار وقۋشىلاردىڭ ماماندىقتى سانالى تۇردە تاڭداۋعا ىنتالاندىرۋ.

ەلىمىزدە وڭىرلىك ىرىكتەۋ تۋرلارىن وبلىس اكىمدىكتەرى مەن استانا, الماتى جانە شىمكەنت قالالارىنىڭ اكىمدىكتەرى وتكىزدى. فينالدىق ىرىكتەۋ كەزەڭىنە 85 ادام كەلدى. ءار كوماندا 4 وقۋشىدان جانە 1 كوماندا جەتەكشىسىنەن تۇرادى. فينالدىق ىرىكتەۋ تۋرىن استانادا 24-26 شىلدە ارالىعىندا كرەندفيلد ۋنيۆەرسيتەتىنىڭ وكىلدەرى وتكىزدى.

فينالدىق ىرىكتەۋدىڭ قورىتىندىسى بويىنشا 40 وقۋشى 19-26 تامىز ارالىعىندا كرەنفيلد ۋنيۆەرسيتەتىنىڭ ( ۇلىبريتانيا) اەروكوسموس مەكتەبىنە وقۋ-تانىمدىق ساپارعا جىبەرىلەدى.

كونكۋرستى ۇيىمداستىرۋعا ادىلەت مينيسترلىگى, قر تۇڭعىش پرەزيدەنتى – ەلباسىنىڭ قورى مەن ۇلتتىق زياتكەرلىك مەنشىك ينستيتۋتى,  نازارباەۆ ۋنيۆەرسيتەتى جانە كرەنفيلل ۋنيۆەرسيتەتى دە اتسالىسىپ وتىر.

فينالدىڭ اشۋ سالتاناتىنا قر تۇڭعىش پرەزيدەنتى – ەلباسى قورىنىڭ اتقارۋشى ديرەكتورىنىڭ ورىنباسارى سۇلتان ايتجانوۆ, ادىلەت ۆيتسە-ءمينيسترى ناتاليا پان, ۇلىبريتانيانىڭ قازاقستانداعى ەلشىسى مايكل دجون گيففورد, نازارباەۆ ۋنيۆەرسيتەتىنىڭ ۆيتسە-پرەزيدەنتى ەردەن قۇسايىن قاتىسىپ, ءسوز سويلەدى. كرەنفيلد ۋنيۆەرسيتەتىنىڭ ( ۇلىبريتانيا) اەروكوسموس مەكتەبىنىڭ وكىلدەرى يان حوللينگۆورت اەروكوسموس ديناميكاسى تۋرالى, فرەنك يۋكەس ۇشاقتاردى مودەلدەۋ جايلى, لەيتەنانت – پولكوۆنيك ەندريۋ حوۋلتون تىكۇشاق وپەراتسيالارى تۋرالى اڭگىمە ايتىپ بەردى.

«اتالعان كونكۋرس بالالارعا تەحنيكالىق ماماندىقتاردى دۇرىس تاڭداۋعا, اعىلشىن ءتىلىنىڭ دەڭگەيىن ارتتىرۋعا كومەكتەسەدى, سونداي-اق الەمنىڭ ۇزدىك اەروكوسموس مەكتەبىنە بارۋعا مۇمكىندىك بەرەدى. ءبىزدىڭ باستى مىندەتىمىز - جاس ونەرتاپقىشتارعا قولداۋ كورسەتۋ», - دەدى قر تۇڭعىش پرەزيدەنتى – ەلباسى قورىنىڭ اتقارۋشى ديرەكتورىنىڭ ورىنباسارى سۇلتان ايتجانوۆ.