بۇگىندە اقتوبە وڭىرىندە تەرىس ءدىني اعىمداردىڭ جەتەگىندە جۇرگەن جاندارعا ارنالعان كەڭ اۋقىمدى ءتۇسىندىرۋ جۇمىستارى جۇرگىزىلۋدە. ءارى ولاردىڭ بۇرىس جولعا تۇسۋىنە اسەر ەتكەن جايتتارعا دا جان-جاقتى ءارى تەرەڭ تالداۋ جاسالۋدا. سونىڭ باستى سەبەبىنىڭ ءبىرى, جۇمىسسىزدىق سالدارى ەكەنى بەلگىلى بولىپ وتىر. وسىندايدا ۇلى ابايدىڭ «جۇمىسى جوقتىق, تاماعى توقتىق – ازدىرار ادام بالاسىن» دەگەن ولەڭ جولدارى ەرىكسىز ەسكە تۇسەدى.
سوندىقتان وڭىردە ءدىني اعىمداردى ۇستانۋشىلاردى جۇمىسقا ورنالاستىرۋ مەن كاسىپكەرلىك ىسكە تارتۋ جونىندە ءىس-شارالار كەشەنى بەلگىلەندى. وبلىستاعى لاڭكەستىككە قارسى كوميسسيانىڭ ماجىلىسىندە وسىنداي شەشىم قابىلداندى. اتالعان كوميسسيانىڭ توراعاسى, وبلىس اكىمى بەردىبەك ساپارباەۆتىڭ ءوزى ەكەنىن ەسكەرسەك, كوميسسيا شەشىمى ناتيجەسىز ءارى اياقسىز قالمايتىنىنا ۇلكەن سەنىم ارتۋعا بولادى.
بەردىبەك ماشبەك ۇلىنىڭ مالىمدەۋىنشە, ماسەلەگە ءدال وسى تۇرعىدان كەلە ءبىلۋدىڭ ءوزى الەۋمەتتەندىرۋدىڭ وڭ ءادىسى بولماق. ال وبلىستاعى ءدىن ىستەرى جونىندەگى باسقارمانىڭ دەرەكتەرىنە سۇيەنسەك, وڭىردە ءدىني اعىمداردى ۇستانۋشىلاردىڭ اراسىندا 300-دەي جۇمىسسىز بار. سونداي-اق جازاسىن وتەپ جاتقاندار اراسىندا ءدىني ەكسترەميزم مەن لاڭكەستىكتىڭ الدىن الۋعا قاتىستى جۇمىستاردى جۇيەلى جولعا قويۋ قاجەتتىگى دە ايقىن بايقالادى. وسى ورايدا اقتوبە قالاسى مەن العا جانە بايعانين اۋداندارىنداعى لاڭكەستىككە قارسى كوميسسيالار ءوز ىستەرىن شيراتا تۇسۋگە ءتيىس. قىسقاسى, قازىرگى كەزدە وبلىستا ءدىني ەكسترەميزم مەن لاڭكەستىككە قارسى ءىس-ارەكەتتەر اۋقىمى ارتا تۇسۋدە. مۇنداعى باستى ماقسات كۇش قولدانۋعا ەمەس, كەرىسىنشە اتقارىلاتىن جۇمىستاردىڭ تيىمدىلىگىن كوتەرۋگە باعىتتالعان.
تەمىر قۇسايىن,
«ەگەمەن قازاقستان»
اقتوبە