سوناۋ بالالىق شاعىمىزدىڭ ەڭ ءبىر قالتارىستارىندا قالعان ويىندار كەيدە قۇددى بولاشاعىمىزدى دا باعدارلاپ بەرگەندەي بولادى دا تۇرادى. كوزىن تىرناپ اشقاننان دارىگەر بولىپ, ينە شانشىپ وينايتىن زامانداستارىمىزدىڭ كەيبىرى شىنىندا دا ۋاقىت وتە كەلە تالايلاردىڭ العىسىنا بولەنگەن ساۋاپتى ماماندىق يەسىنە اينالدى.
ءومىردىڭ ويىنعا, ويىننىڭ تاعدىرعا اسەر ەتەتىنى تالاس تۋدىرماس؟! اسەر ەتەدى دەمەكشى, «قىز جىبەك» ءفيلمى ەكرانعا شىققان كەزدە اۋىلدىڭ بالالارى تولەگەن مەن بەكەجان بولىپ وينايتىنى ەسكە تۇسەدى. بىرەۋى – تولەگەن, ەكىنشىسى – بەكەجان, ورتاسىندا جىبەك بولىپ كىشكەنتاي ءبىر قىز شاشى جالبىراپ, اراشا سۇراپ جۇگىرىپ بارا جاتقان كورىنىس ءالى دە كوز الدىمىزدا.
كەشە عانا اينالدىرعان 2-3 اقپارات كوزىنىڭ ءبىرى – تەلەديدارعا تەلمىرىپ وتىراتىن بالانى كورمەيتىن ەدىك. قالانىڭ بالاسى دا, دالانىڭ بالاسى دا قولى قالت ەتسە ويىن وينايدى. قاراڭعى ءتۇسىپ, قارنى اشسا دا قىزىققا تويماي, اكە-شەشەسى شاقىرعان سوڭ ارەڭ ۇيگە قايتاتىن سول ۇرپاققا ويىن تۇرلەرى تۋرالى ايتساڭ, ارقايسىسى بالالىق شاعىنا ساپار شەگىپ, تەرەڭ ويعا بەرىلىپ, قايتىپ ورالمايتىن كۇندەردىڭ ساعىنىشىن تولعايتىنى ءسوزسىز.
قىزىلوردالىق تانىمال ءفوتوتىلشى بولات وماراليەۆتىڭ فوتووبەكتيۆىنە ىلىنگەن مىنا نوستالگيالىق سۋرەتتى كورىپ وتىرىپ, قيالىڭىز تالاي قىردى شارلايتىنى انىق. ءساتى كەلىسكەن كادرداعى ويىن بالالارى بۇگىندە ەلۋدى ەڭسەرگەن, ياكي قىرىقتىڭ قىرقاسىنا شىققان كىسىلەر بولار. ولار اراعا جارتى عاسىرعا جۋىق ۋاقىت سالىپ جاريالانعان فوتودان وزدەرىن تاني ما ەكەن؟
– ءار زاماننىڭ ءوز ءانى, ءوز ويىنى بار. ءبىز دە بالا بولىپ كوردىك. ەر بالالار كوبىنەسە اتىس-شابىس ويىندارىنا بەيىم. ۇل بولعاسىن كوبىنەسە ەرتەلى-كەش ەرمەگىمىز وسى سوعىس ويىنى بولىپ كەلەتىن. مۇنىڭ ءبارى ءبىر جاعىنان باسىنان جاۋگەرشىلىك ارىلماعان حالقىمىزدىڭ ءجۇرىپ وتكەن جولى. سوناۋ زامانداردان بەرى, ودان كەيىنگى ۇلتازاتتىق سوعىسى, ازامات سوعىسى, ۇلى وتان سوعىسى سول زاماننىڭ بالاسىنىڭ ساناسىندا, جۇرەگىندە قالادى. قازاقستاننىڭ شەجىرەسىنە دە قاراساڭ, سوعىستان كوز اشپاعان. قۇدايعا شۇكىر, قازىر سوعىس ويىنىن ويناپ جۇرگەن بالا كورمەيسىڭ.
ال بۇل فوتونى شامامەن 1975 جىلدارى تۇسىرسەم كەرەك. كەلە جاتسام, اۋىلدىڭ جايلاۋىندا قيقۋ سالىپ, شايقاسىپ جاتقان بالالاردى كوردىم. ەس بىلگەلى بەرى ەرىپ كەلە جاتقان تانىس كورىنىس كوزىمە وتتاي باسىلدى. اتوي سالىپ ويناپ جاتقان بالالاردىڭ ىشىنەن ءوزىمدى كورگەندەي, ءوزىمدى تاۋىپ العانداي ءسال اسەرلەنىپ تۇردىم دا, مەن دە كوك شوپكە جاتا كەتىپ, «فوتو مىلتىعىمدى» الا سالىپ, بالالارعا باعىتتاپ, وسى كادردى «اتىپ الدىم», دەيدى تاجىريبەلى ءفوتوتىلشى.
ايناش ەسالي,
«ەگەمەن قازاقستان»
الماتى