ورال قالاسىندا جاستارعا قىزمەت كورسەتەتىن ارنايى ورتالىق اشىلدى. ول باتىس قازاقستان وبلىستىق جاستارمەن جۇمىس جونىندەگى رەسۋرستىق ورتالىعىنىڭ جانىنان قۇرىلعان.
«جاڭا ورتالىقتا جاستار جۇمىسقا ورنالاسۋ, ءوز كاسىبىن اشۋ سياقتى ماسەلەلەردە پايدالى كەڭەس, ناقتى كومەك الادى. ارنايى ورتالىق ماماندارى جاستار كوپ جينالاتىن جەرلەرگە وزدەرى شىعىپ تا قىزمەت كورسەتپەك. قازىر مۇندا 4 مامان بار, بولاشاقتا سۇرانىسقا قاراي ونىڭ سانى كوبەيۋى مۇمكىن», - دەيدى جاستارمەن جۇمىس جونىندەگى رەسۋرستىق ورتالىق باسشىسى مەرجان ابىلقاس.
ورال قالاسىندا قىزمەتىن باستاعان وسىنداي ورتالىق ەندى ءاربىر اۋداندا دا اشىلادى. باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ وڭىردەگى بارلىق اۋدان اكىمدەرىنە وسىنداي تاپسىرما بەردى.
ايتا كەتەيىك, بۇگىندە باتىس قازاقستان وبلىسى تۇرعىندارىنىڭ 21,0%-ى جاستار. ياعني 14 پەن 29 جاس ارالىعىنداعى جاستاردىڭ سانى 136 مىڭنان اسادى. ولاردىڭ جارتىسىنا جۋىعى اۋىلدا تىركەلگەن.
«2018 جىلدىڭ 1 توقسانىندا جاستار اراسىنداعى جۇمىسسىزدىق دەڭگەيى - 4,0% بولدى. جالپى باتىس قازاقستان وبلىسىندا ەش جەردە وقىمايتىن, جۇمىس ىستەمەيتىن جاستاردىڭ ۇلەسى – 2018 جىلدىڭ 1 توقسانىندا 2,8 پايىز. قازىرگى ۋاقىتتا بۇل رەسپۋبليكا بويىنشا ەڭ تومەنگى كورسەتكىش» دەلىنگەن وڭىردەگى جاستارمەن جۇمىس جونىندەگى رەسۋرستىق ورتالىعى تاراتقان مالىمدەمەدە.
2018 جىلدىڭ العاشقى جارتىسىندا 3573 جاس ءتۇرلى قىزمەت ىزدەپ, جۇمىسپەن قامتۋ ورگاندارىنا جولىققان ەكەن. ولاردىڭ 2889-ى جۇمىسقا ورنالاسقان. تاراتىپ ايتار بولساق, 1425 ادام دەرەكقوردا بار تۇراقتى جۇمىسقا كىرگەن, 902 ادام الەۋمەتتىك جۇمىس ورىندارى مەن جاستار تاجىريبەسىنە جىبەرىلسە, 562 جاس قوعامدىق جۇمىسقا تارتىلعان.
جىل باسىنان بەرى باتىس قازاقستان وبلىسىندا 3 مىڭعا جۋىق جاس مامان مەملەكەتتىك باعدارلامالار جانە جوبالاردىڭ يگىلىگىن كورگەن ەكەن. سونىڭ ىشىندە 747 مامان «جاستار تاجىريبەسى» باعدارلاماسى اياسىندا قىزمەتكە الىنسا, 383 مامان «ديپلوممەن اۋىلعا» اتتانعان. ولارعا تيىسىنشە 246,7 ملن تەڭگە كولەمىندە كوتەرمە جاردەماقى بەرىلىپتى. ال 236 جاس مامان ءوزى بارعان اۋىلدارعا تامىر جايىپ, باسپانالى بولعان, ولارعا بەرىلگەن جەڭىل نەسيە كولەمى 802 ملن.تەڭگە.
جاستاردىڭ جۇمىسقا ورنالاستىرۋ مۇمكىندىگىن كەڭەيتۋ, جۇمىسسىز جاستاردى جۇمىسقا ورنالاستىرۋ, جۇمىس بەرۋشىلەرگە – اشىلعان بوس جۇمىس ورىندارىنا لايىقتى جۇمىسشى ىرىكتەۋگە جاردەم بەرۋ, ىقپالداسۋ ماسەلەلەرىمەن بقو جاستار ساياساتى ماسەلەلەرى باسقارماسى مەن بقو جاستارمەن جۇمىس جونىندەگى رەسۋرستىق ورتالىعى تىكەلەي اينالىسىپ وتىر. ماسەلەن, ءدال بۇگىن, 20 شىلدە كۇنى «Uralsk job fair-2018» بوس جۇمىس ورىندارى جارمەڭكەسى ءوتىپ جاتىر. ونىڭ ناتيجەسى ءسال كەيىن بەلگىلى بولادى.
قازبەك قۇتتىمۇرات ۇلى
«ەگەمەن قازاقستان»
باتىس قازاقستان
سۋرەتتى تۇسىرگەن ايباتىر نۇراش