دەنساۋلىق ساقتاۋ ءمينيسترى ەلجان ءبىرتانوۆ ۇكىمەت ۇيىندە وتكەن ءباسپاسوز ءماسليحاتىندا قازاقستانداعى انا ءولىمى جاعدايى تۋرالى ايتتى, دەپ حابارلايدى قازاقپارات.
ءمينيستردىڭ ايتۋىنشا, العاشقى جارتىجىلدىقتا بوسانۋعا دەيىن جانە بوسانعاننان كەيىن انا ءولىمى كورسەتكىشى بىلتىرعى دەڭگەيدەن وسكەن. اتاپ ايتقاندا, جىل باسىنان بەرى رەسپۋبليكا پەرزەنتحانالارىندا 31 ايەل كوز جۇمعان.
«قاڭتار ايىنان بەرى رەسپۋبليكادا 31 انا كوز جۇمدى. جىل سايىن رەسپۋبليكامىزدا 50-60 ايەل كوز جۇمادى. رەسمي ستاتيستيكا بار, ودان بولەك جىل سايىن قۇپيا اۋديتتەر جۇرگىزەمىز, ياعني باسقا دياگنوز بويىنشا تىركەلگەندەردى تەكسەرەمىز. قۇپيا اۋديت ەسەبىمەن انا ءولىمى 100 مىڭ جاڭا بوسانعان ايەلدەر اراسىندا ورتا ەسەپپەن 14-15 ايەلدى قۇرايدى. قازىرگى ۋاقىتتا ءاربىر جاعدايعا قاتىستى قوعامدىق دەنساۋلىق ساقتاۋ كوميتەتى تەرگەۋ جۇرگىزىپ جاتىر», - دەدى ەلجان ءبىرتانوۆ ۇكىمەت ۇيىندە وتكەن ءباسپاسوز ءماسليحاتىندا.
سونىمەن بىرگە, ەلجان ءبىرتانوۆ انا ءولىمى سەبەپتەرىن ەكى نەگىزگى توپقا ءبولىپ كورسەتتى.
ء«بىرىنشى - تىكەلەي بوسانۋ جاعدايىنا, ەكىنشىسى - جاراقات, تاماقتان ۋلانۋ سەكىلدى جۇكتىلىككە قاتىسى جوق جاعدايعا بايلانىستى. انا ءولىمىنىڭ كوبەيۋى ايەلدەردىڭ دەنساۋلىعىنا دا بايلانىستى بولىپ وتىر. وكىنىشكە قاراي, جىلدىق ەسەپپەن ايەلدەردىڭ 20 %-ءى كەش ەسەپكە تۇرادى. سوندىقتان ولاردى باقىلاۋ قيىن. قايتىس بولعاندار اراسىندا بۇل كورسەتكىش 50-60%-كە دەيىن جەتەدى. ياعني, كوز جۇمعان ايەلدەردىڭ باسىم بولىگى ۋاقىتىندا ەسەپكە تۇرماعاندار», - دەدى ول.
سونداي-اق, ءمينيستردىڭ ايتۋىنشا, مەديتسينالىق قىزمەتكەرلەردىڭ ايەلدەرگە جۇكتىلىك كەزىندە جانە بوسانعاننان كەيىن قالاي قاراعانى دا ماڭىزدى.
«بۇگىن ءبىز پرەمەر-مينيسترگە جەرگىلىكتى اتقارۋشى ورگاندار مەن دەنساۋلىق ساقتاۋ باسقارمالارى تاراپىنان باقىلاۋدىڭ جەتكىلىكسىزدىگى سياقتى ماسەلەلەردى باياندادىق. وڭىرلەردە وسى سالا بويىنشا جاۋاپ بەرەتىن باسشىلار از, ولار جۇمىستان شىعىپ كەتكەن. 8 وبلىستا ورىنباسارلار جوق. كادر تاپشىلىعىنا كەلەر بولساق, وڭىرلەردە 340 اكۋشەر-گينەكولوگ جەتىسپەيدى. سول سەبەپتى اكىمدىكتەر مامانداردىڭ ءبىلىمىن جەتىلدىرۋ جونىندە ءىس-شارالاردى كۇشەيتۋ قاجەت», - دەدى ەلجان ءبىرتانوۆ.
ايتا كەتەيىك, ۇكىمەتتىڭ بۇگىنگى وتىرىسىندا دەنساۋلىق ساقتاۋ ءمينيسترى ەلجان ءبىرتانوۆ پەن استانا قالاسىنىڭ اكىمى اسەت يسەكەشەۆ ەلوردا پەرزەنتحاناسىنداعى انا ءولىمى بويىنشا جاۋاپ بەردى.
كەشە استانانىڭ №2 پەريناتالدى ورتالىعىندا جاس بوسانعان كەلىنشەك كوز جۇمدى. ول - استانا پەرزەنتحانالارىندا قايتىس بولعان ءتورتىنشى ادام.