تاۋەلسىزدىك مەرەكەسى قارساڭىندا ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىندە جاعىمدى جاڭالىق بولدى. ۋنيۆەرسيتەتتە ۇزدىك تەحنولوگيامەن سالىنعان زاماناۋي سپورت كەشەنى پايدالانۋعا بەرىلدى. 150 ميلليون تەڭگەگە تۇسكەن بۇل قۇرىلىستى ۋنيۆەرسيتەت ءوز قارجىسىنا, ءوز كۇشىمەن سالدى.
ەلباسى نۇرسۇلتان نازارباەۆ قازاقستان حالقىنا جولداۋىندا سالاماتتى ءومىر سالتىن ناسيحاتتاۋ كەرەكتىگىنە جانە حالىقتىڭ 30 پايىزىن سپورتقا تارتۋعا ەرەكشە ماڭىز بەرگەن بولاتىن.
– جاڭا سپورت كەشەنى جاستاردىڭ بەتىن سپورتقا اۋدارۋعا جانە بۇقارالىق سپورت تۇرلەرىنىڭ كەڭ جايىلۋىنا وزىندىك ۇلەسىن قوسادى دەگەن سەنىمدەمىن, – دەيدى ۋنيۆەرسيتەت رەكتورى اسقار نامەتوۆ.
جاڭا سپورت كەشەنى ستۋدەنتتەردىڭ دەنەشىنىقتىرۋ ساباعىنىڭ وتۋىنە لايىقتالعان. ونىڭ ىشىندە ويىن الاڭى, ترەناجەر زالى, كورەرمەندەر ورنى, كيىم اۋىستىراتىن, جۋىناتىن, سانيتارلىق بولمەلەر بار. سونىمەن قاتار سپورت كەشەنىنە جاساندى كىلەم توسەلگەن جازعى ويىن الاڭى دا كىرەدى.
بۇل ءبىلىم ورداسىنداعى ءبىرىنشى سپورت كەشەنى ەمەس. قالانىڭ كجبي شاعىن اۋدانىندا ورنالاسقان جاراتىلىستانۋ فاكۋلتەتتەرىندە جالپى سپورت شارالارىنا ارنالعان جانە كۇرەس, تەننيس زالدارى, شاحمات كلۋبى بار. ەندى قالانىڭ ورتالىعىندا ورنالاسقان فاكۋلتەتتەردىڭ وقىتۋشىلارى مەن ستۋدەنتتەرى سپورتزال ءۇشىن قوستانايدىڭ ەكىنشى شەتىنە ات سابىلتپايتىن بولادى. جاتاقحانادا جاتاتىن ستۋدەنتتەر ءۇشىن جاڭا سپورت كەشەنى قارعا ادىم عانا جەردە ورنالاسقان.
ۋنيۆەرسيتەتتەگى سپورت كەشەنىنىڭ اشىلۋىنا كەلگەن وبلىس اكىمى سەرگەي كۋلاگين قالالار مەن اۋدانداردا بەرىلىپ جاتقان تۇرعىن ۇيلەردىڭ اۋلاسىندا وسىنداي سپورت الاڭدارى مەن كەشەندەرى قوسا سالىنۋى كەرەكتىگىن ايتتى. قوستاناي قالاسىندا ونىڭ جارقىن مىسالدارى قازىردىڭ وزىندە بار. جاڭادان سالىنعان «ناۋرىز» شاعىن اۋدانىنداعى سپورت الاڭى تۇرعىنداردىڭ يگىلىگىنە اينالعان.
ۋنيۆەرسيتەت ۇجىمى تاۋەلسىزدىك مەرەكەسى قارساڭىندا وزدەرىنە وسىنداي تاماشا سىيلىق جاسادى.
ءنازيرا جارىمبەتوۆا,
قوستاناي.