فۋتبولدان ەۋروكۋبوك ويىندارى اراعا جىل سالىپ قازاقستانعا قايتا ورالدى. بيىل ادەتتەگىدەي «استانا» كومانداسى چەمپيوندار ليگاسىندا باق سىناسا, الماتىنىڭ «قايرات», قوستانايدىڭ «توبىل» جانە پاۆلوداردىڭ «ەرتىس» كلۋبى ەۋروپا ليگاسىندا دوپ تەبەدى. ازىرشە ەۋروماۋسىم قازاقستاندىق كوماندالار ءۇشىن ءساتتى باستالدى. «توبىل» العاش سىرت الاڭدا گرۋزيانىڭ «سامترەديا» كومانداسىن 1:0 ەسەبىمەن جەڭسە, «استانا» ءدال وسىنداي ەسەپپەن ءوز الاڭىندا چەرنوگوريانىڭ «سۋتەسكا» كومانداسىنان باسىم ءتۇستى.
ەۋروكۋبوك ويىندارىنىڭ 2017/2018 جىلعى ماۋسىمىندا ەۋروپانى ءدۇر سىلكىندىرىپ, ەۋروپا ليگاسىنىڭ پلەي-وفف كەزەڭىنە جولداما العان «استانا» كومانداسىندا بيىل بىرقاتار وزگەرىستەر بولدى. كوماندانى ءتورت جىل باسقارىپ, ءبىر رەت چەمپيوندار ليگاسىنىڭ, ەكى رەت ەۋروپا ليگاسىنىڭ توپتىق كەزەڭىنە شىعارعان بولگاريالىق مامان ستانيمير ستويلوۆ جىل باسىندا «استانامەن» اراداعى كەلىسىمشارتىن ءبىر جىلعا سوزعانىمەن, ناۋرىز ايىنىڭ باسىندا قازاقستان ۇلتتىق قۇراماسىنىڭ باس جاتتىقتىرۋشىسى اتاندى.
ونىڭ ورنىنا كومەكشىسى گريگوري بابايان كوماندانىڭ باس باپكەرلىگىنە تاعايىندالىپ, ماۋسىمدى ءساتتى باستاعان ەدى. ءتىپتى قازاقستان سۋپەركۋبوگىندە الماتىنىڭ «قايرات» كومانداسىن 3:0 ەسەبىمەن جەڭگەن-ءدى. الايدا ءبىرىنشى ماۋسىم كۇنى «استانا» كلۋبىنىڭ پرەزيدەنتى سايان حاميتجانوۆ ۋكراينالىق رومان گريگورچۋكتى كلۋبتىڭ جاڭا باپكەرى رەتىندە تانىستىردى. 53 جاستاعى مامان بۇعان دەيىن لاتۆيا, ۋكراينا جانە ازەربايجان كوماندالارىندا جۇمىس ىستەپ, ەۋروكۋبوك ويىندارىندا مول تاجىريبە جيناعان جاتتىقتىرۋشىلاردىڭ ءبىرى. ماسەلەن, ۋكراينانىڭ «چەرنومورەتس» كومانداسىن كلۋب تاريحىندا العاش رەت ەۋروپا ليگاسىنىڭ پلەي-وفف كەزەڭىنە, ازەربايجاندىق «گابالا» كلۋبىن ءتورت جىلدىڭ ىشىندە ەكى رەت ەۋروپا ليگاسىنىڭ توپتىق كەزەڭىنە شىعارعان.
سونداي-اق «استانا» كومانداسى ەۋروماۋسىم الدىندا قۇرامىن ازىرشە ەكى لەگيونەرمەن كۇشەيتتى. ازىرشە دەۋىمىزدىڭ سەبەبى, قازاقستاندا ترانسفەر ماۋسىمى ەندى عانا اشىلعانىن ەسكەرسەك, ءالى بىرنەشە ويىنشىنى ساتىپ الۋعا مۇمكىندىكتەرى بار. «استانانىڭ» العاشقى ترانسفەرى رەسەيدە ءوتىپ جاتقان الەم چەمپيوناتىنا قاتىسقان سەربيا قۇراماسى مەن يسپانيالىق «ۆيلياررەال» كومانداسىنىڭ قورعاۋشىسى انتونيو رۋكاۆينا بولدى. سەربيالىق فۋتبولشى «استاناعا» ەركىن اگەنت رەتىندە تەگىن كەلدى. سونداي-اق شىققان تەگى برازيليالىق, ازاماتتىعى ازەربايجاندىق فۋتبولشى ريچارد المەيداعا دا قارجى شىعىندالعان جوق. ال «استانا» ساپىندا بىرنەشە جىل دوپ تەپكەن بەلورۋسسيالىق قورعاۋشى يگور شيتوۆتىڭ كوماندامەن كەلىسىمشارتى اياقتالىپ, ءوز ەلىنە قايتا ورالدى.
چەمپيوندار ليگاسىنىڭ ءبىرىنشى ىرىكتەۋ كەزەڭى اياسىنداعى «استانا ارەنا» ستاديونىندا وتكەن «استانا» – «سۋتەسكا» ماتچىنا توقتالساق. ويىن الدىنداعى ءباسپاسوز ءماسليحاتىنا قاتىسقان كوماندانىڭ باس جاتتىقتىرۋشىسى رومان گريگورچۋك تە, جارتىلاي قورعاۋشى يۆان ماەۆسكي دە «سۋتەسكاعا» قارسى وتەتىن ماتچ قيىنعا سوعاتىنىن, بالتىق جاعالاۋىنىڭ كوماندالارى ەشكىم كۇتپەگەن ويىن وتكىزەتىنىن ايتقان بولاتىن. ەكەۋىنىڭ دە كۇدىگى بەكەر ەمەس ەكەن. كەشەگى ويىندا سوعان كوز جەتكىزدىك. بۇكىل كوماندا بولىپ قورعانعان «سۋتەسكا» «استانا» ويىنشىلارىن تىرپ كەتكىزبەي, ءوز ايىپ الاڭدارىنا ەش جولاتپادى. «استانا» ساپىندا قارسىلاستىڭ قورعانىسىن بۇزىپ-جاراتىن, شابۋىلدى سوڭىنا دەيىن جەتكىزىپ, ناتيجەلى اياقتاي الاتىن شابۋىلشىنىڭ ورنى ويسىراپ تۇردى. نەگىزگى قۇرامدا شىققان دجوردجە دەسپوتوۆيچ تە, ەكىنشى تايمدا ويىنعا تىڭنان قوسىلعان الەكسەي ششەتكين دە ەشتەڭە ىستەي العان جوق. تەك ويىننىڭ 29-مينۋتىندا رومان مۋرتازاەۆتىڭ پەنالتيدەن سوققان جالعىز گولى «استاناعا» جەڭىس سىيلادى. ماتچ بارىسىندا گول سوعاتىن بىرنەشە مۇمكىندىك بولعانىمەن, ونى فۋتبولشىلار دۇرىس پايدالانا المادى. سىرت الاڭدا وتەتىن قارىمتا ويىن الدىندا 1:0 ەسەبى وتە قاۋىپتى بولعانىمەن, رومان گريگورچۋك كەلەسى اپتا جيناقى ويىن كورسەتىپ, جەڭىسكە جەتەمىز دەپ وتىر. «ماتچ بارىسىندا گول سوعاتىن بىرنەشە مۇمكىندىك بولعانىمەن, ءبارى ناتيجەسىز اياقتالىپ جاتتى. بۇگىنگى كەزدەسۋدە بىزگە 1-2 گول جەتىسپەدى. ەگەر تاعى ەكى گول سوعىلعان جاعدايدا, جۋرناليستەرمەن باسقاشا اڭگىمەلەسكەن بولار ەدىك. دەگەنمەن سىزدەر الاڭداماساڭىزدار دا بولادى. سەبەبى بارلىعى جاقسى دەپ سەنىممەن ايتا الامىن. ءبىز ءوز ويىنىمىزدى جاقسارتۋ ءۇشىن قولدان كەلگەننىڭ بارلىعىن جاسايمىز», دەدى ويىن سوڭىنداعى ءباسپاسوز ءماسليحاتىندا.
ال «سۋتەسكا» باس جاتتىقتىرۋشىسى نيكولا راكوەۆيچ بۇل جۇپتىڭ ءفاۆوريتى «استانا» بولعانىمەن, كەلەسى كەزەڭگە وتۋگە مۇمكىندىكتەرى بار ەكەنىن اتاپ ءوتتى. ء«بىز «استانا» كومانداسىنىڭ ءبىرىنشى نومىرمەن ويناپ, قىسپاققا الاتىنىن الدىن الا بىلگەن ەدىك. سەبەبى ولار ماۋسىم باسىنان باستاپ 19 ويىن وتكىزىپ ۇلگەرگەندىكتەن, ناعىز سپورتتىق بابىندا. ال ءبىز ويىنعا ەندى عانا كىرىسىپ جاتىرمىز. ءبىز تەك قورعانۋ تۋرالى ويلاعان جوقپىز. الايدا, قارسىلاس كوماندانىڭ وتە جاقسى ويىن كورسەتۋى, ءبىزدى سوعان ماجبۇرلەدى. «استانا» ءالى دە بۇل جۇپتىڭ ءفاۆوريتى. دەگەنمەن بىزگە ۇمىتتەنۋگە ەشكىم كەدەرگى بولا المايدى», دەدى ول. ەكى كوماندا اراسىنداعى قارىمتا كەزدەسۋ 18 شىلدە كۇنى چەرنوگوريادا وتەدى.
قازاقستاندىق كوماندالار اراسىندا ەۋروپا ليگاسىنىڭ ىرىكتەۋ كەزەڭدەرىن باستاپ بەرگەن قوستانايدىڭ «توبىل» كومانداسى سىرت الاڭدا گرۋزيا چەمپيوناتىندا ءۇشىنشى ورىن العان «سامترەديا» كلۋبىن جەڭگەنىن جوعارىدا ايتىپ وتتىك. ويىنداعى جالعىز گولدى ماتچتىڭ 95-مينۋتىندا ماكسيم فەدين سوقتى. ەۋروپا ليگاسىنىڭ جەرەبە تارتۋ راسىمىنەن سوڭ فۋتبول ساراپشىلارى بۇل جۇپتا «سامترەديا» انىق فاۆوريت دەپ ايتقان بولاتىن. ەكى ويىن قورىتىندىسى بويىنشا, گرۋزيا كومانداسى ەش قيىندىقسىز كەلەسى كەزەڭگە وتەتىنىن بولجاعان. دەگەنمەن «توبىل» وتكەن ماتچتا جيناقى ويىن كورسەتىپ, سوڭعى ساتتە جىگەرلى كوماندانىڭ جەڭىسكە جەتەتىنىن فۋتبول ساراپشىلارىنا دالەلدەپ بەردى. قارىمتا كەزدەسۋ 19 شىلدە كۇنى قوستانايدا وتەدى.
ءالي بيتورە,
«ەگەمەن قازاقستان»