ءار الەم چەمپيوناتىندا كەم دەگەندە ەكى-ءۇش سەنساتسيا بولاتىنى قالىپتى جاعداي. تەك سول كوماندالار قانشا جەرگە دەيىن جەتە الار ەكەن دەپ تاعات تاپپاي كەتەمىز. ال بۇل جولى حورۆاتيا قۇراماسى توپتان 9 ۇپاي جيناپ, ءبىرىنشى ورىنمەن شىققانىمەن قويماي, جارىستىڭ فينالىنا جولداما الدى. سوڭعى ماتچتا باعى جانىپ, بابى قاتار شاپسا, شاقپاق جەيدەلىلەر التىن كۋبوكتى باستارىنا كوتەرۋى مۇمكىن.
ەكىنشى جارتىلاي فينال ويىنى قيان-كەسكى ماتچقا ۇلاستى. بۇل ويىندا ءبىرىنىڭ ارتىنان ءبىرى كۇتپەگەن وقيعالار ورىن الدى. جاسىل الاڭعا شىققان فۋتبولشىلار مۇمكىندىكتەرىن اسىرا پايدالانعانىنا ەشكىمنىڭ ءشۇباسى جوق شىعار. جاستاردان جاساقتالعان انگليا قۇراماسى العاشقى بولىپ ەسەپ اشتى. كيران تريپەر ايىپ دوبىن مۇلتىكسىز ورىنداپ, قاقپاشىنى قاپىدا قالدىردى. بريتانيالىقتار بىلگەنىنەن جاڭىلماي ويىن تىزگىنىن وزدەرىندە ۇستادى. شاقپاق جەيدەلىلەردىڭ شابۋىلعا شىعۋىنا دا دىم مۇمكىندىك بەرمەدى.
تەك 68-مينۋتتا شيمو ۆرسالكو كوتەرگەن پاستى يۆان پەريشيچ جوق جەردەن سوققىمەن جالعادى. قورعاۋشى باسپەن قايتارعالى تۇرعان دوپتى گول قىلعان يۆان پەريشيچ تارازى باسىن تەڭەستىردى. «ينتەر» ساپىندا جارقىراي ونەر كورسەتكەن پەريشيچ بىرىنشىلىك بارىسىندا ءوزىنىڭ بار شەبەرلىگىن كورسەتە الماي تاسادا ءجۇردى. تەك جارتىلاي فينالدا عانا جارق ەتتى دەسەك, ارتىق ەمەس. سەبەبى ويىن تەڭ اياقتالىپ, سونىڭ گولىنىڭ ارقاسىندا حورۆاتيا ماتچتى ەكسترا-تايمعا ۇلاستىرىپ جىبەردى. ال ەكسترا-تايمنىڭ ەكىنشىسى باستالا بەرگەن تۇستا ءدال سول پەريشيچ دوپقا تالاسىپ باسپەن كەرەمەت پاس شىعاردى. قورعانىس اڭداماي قالعان جەردە زىپ بەرىپ اتىپ شىققان ماريو ماندجۋكيچ دجوردان پيكفوردتىڭ قاقپاسىنا ەكىنشى گولدى سوقتى. ال قالعان 10 مينۋت بويى زلاتكو داليچ شاكىرتتەرى ۋاقىت سوزۋمەن اينالىستى. انگليا شابۋىلعا شىققانىمەن, دانيەل سۋباشيچ قورعاعان قاقپاعا دوپ دارىتا المادى. حورۆاتيا ءوزىنىڭ تاريحىندا تۇڭعىش رەت الەم چەمپيوناتىنىڭ فينالىنا شىقتى.
«G» توبىندا بىرگە بولعان انگليا مەن بەلگيا ەندى قولا جۇلدە ءۇشىن تالاسادى. جۇبانىش ماتچى دەپ اتالاتىن كىشى فينالدا ەكى كوماندانىڭ جولى قايتا ءتۇيىستى. توپ ىشىندەگى ماتچتا بەلگيا 1:0 ەسەبىمەن جەڭىپ ەدى. ول كەزدە انگليا باپكەرى گارەت ساۋتگەيت جەڭىلىپ, ەكىنشى ورىن يەمدەنۋ ءۇشىن ادەيى جەڭىلدى دەگەن دە تۇجىرىم بار. قارسىلاستاردىڭ وسالداۋى تۇسەتىن وڭاي جولدى تاڭداعان ساۋتگەيتتىڭ ساۋاتتىلىعى, قىراعىلىعى جونىندە دە كوپ جازىلدى. ۇلىبريتانيالىقتار ءۇشىن شىنىن ايتقاندا بارلىعى جاقسى باستالدى. الدىمەن كولۋمبيانى ارتقا تاستاپ, كەيىننەن كەلگەن شۆەتسيانى دا وڭاي جەڭدى. حورۆاتيانى دا تاس-تالقان ۇتىپ جۇرگەندىكتەن, وسى ويىننىڭ ءفاۆوريتى سانالدى. الايدا وقيعا كۇتپەگەن جەردەن باسقا ارنامەن جالعاستى. ەندى امال جوق, ءۇشىنشى ورىن ءۇشىن بەلگيادان باسىم ءتۇسۋ كەرەك. ەكى كوماندا دا بۇل جولى نەگىزگى قۇرامدى شىعارىپ, اجەپتاۋىر تارتىستى ويىن كورسەتەرى انىق. ايتپاقشى بۇل ويىندا سونىمەن قاتار مۋنديالدىڭ ۇزدىك سۇرمەرگەنى باسەكەسىنىڭ دە نۇكتەسى قويىلادى. 6 گول سوققان حارري كەين مەن 4 گول سوققان رومەلۋ لۋكاكۋدىڭ جەكە تارتىسى دا ورىن الارى انىق. بۇل ماتچ 14 شىلدە كۇنى استانا ۋاقىتىمەن 20:00-دە باستالادى.
ال فينالعا شىققان فرانتسيا مەن حورۆاتيا اراسىنداعى ويىندى ميللياردتاعان ادام كورەتىنى انىق. مىسالى, 2014 جىلى برازيليادا بولعان فينالدى 2,5 ميلليارد ادام تاماشالاپ ەدى. حورۆاتيانىڭ ەرلىك جاساپ وسى كەزەڭگە دەيىن جەتكەنىنە قاراماستان, فينالدىڭ ءفاۆوريتى فرانتسيا ەكەنى داۋسىز. بۇل كوماندا ءبىرىنشى كەزەكتە جارتىلاي فينالىن ءبىر كۇن ەرتە وينادى. ەكىنشىدەن, حورۆاتيا سەكىلدى قىرىلىسىپ, كوپتەگەن قاقتىعىسقا ءتۇسىپ, 120 مينۋت شايقاسىپ تا جۇرمەدى. فرانتسيا سوققان ءبىر گولىنىڭ ارقاسىندا قورعانىستى مىقتاپ ۇستاپ, ەش جاراقاتسىز, سارى قاعازسىز فينالعا شىعىپ الدى. ال حورۆاتيا ساپىنداعى فۋتبولشىلاردىڭ قالاي شارشاعانىن كوزىمىز كوردى. بىرنەشە ويىنشىنىڭ جاراقاتى دا جوق ەمەس. سوندىقتان فينالدا فرانتسيا باسىمدىققا يە بولۋى ءتيىس. بىراق حورۆاتيا پرەزيدەنتى ءار ويىننان كەيىن فۋتبولشىلارىمەن جەكە-جەكە قۇشاقتاسىپ, باستارىن سيپاپ, ارقالارىن قاعادى. كوليندا كيتاروۆيچتىڭ قولداۋى الاقانداي حورۆاتيانىڭ اياقدوپشىلارىن كەزەكتى ارمانعا جەتەلەۋى بەك مۇمكىن. دەگەنمەن فينالعا وسال كوماندا شىقپايتىنى بەلگىلى عوي. التىن كۋبوك بۇل جولى كىمنىڭ قولىندا بولاتىنىن 15 كۇنى كەشكە انىقتايمىز.
ەرمۇحامەد ماۋلەن,
«ەگەمەن قازاقستان»