اۋىل شارۋاشىلىق سالاسىنداعى ىنتىماقتاستىقتى نىعايتۋ ءۇشىن باتىس قازاقستان وبلىسىنىڭ دەلەگاتسياسى ۇلىبريتانيادا بولدى, دەپ حابارلايدى باتىس قازاقستان وبلىسى اكىمدىگىنىڭ ءباسپاسوز قىزمەتى.
ۇلىبريتانياداعى قازاقستان ەلشىلىگى مەن قر اۋىل شارۋاشىلىق مينيسترلىگىنىڭ قولداۋىمەن باتىس قازاقستان وبلىسىنداعى ءۇش ءىرى كومپانيا – «كۋبلەي», «جايىق ەت» جانە «باتىس-پاۋەر» كاسىپورىندارىنىڭ باسشىلارى ۇلىبريتانياعا باردى.
وبلىس دەلەگاتسياسى 2018 جىلعى استانا ەكونوميكالىق فورۋمى بارىسىندا قول قويىلعان مەموراندۋمدى جۇزەگە اسىرۋدىڭ ءتيىمدى مەحانيزمىن ازىرلەۋ ءۇشىن «Dunbia» كومپانياسىمەن كەلىسسوز جۇرگىزدى.
ءوڭىر دەلەگاتسياسى كومپانيانىڭ وندىرىستىك نىساندارىن (سويۋ, وراۋ, وڭدەۋ تسەحتارىن) ارالادى. «Dunbia» كومپانياسىنىڭ باس كەڭسەسىندە ەت وڭدەۋدىڭ تولىق تسيكلى بويىنشا جوبانىڭ ىسكە اسىرىلۋ بارىسى تالقىلاندى.
«پرەزيدەنت نۇرسۇلتان ءابىش ۇلى نازارباەۆ اتاپ وتكەندەي, اگرارلىق سەكتور ەكونوميكانىڭ جاڭا قوزعاۋشى كۇشى بولۋى كەرەك. ءبىزدىڭ ءوڭىر اۋىل شارۋاشىلىعىندا, اسىرەسە مال شارۋاشىلىعىندا ۇلكەن الەۋەتكە يە. سوندىقتان ءبىز سىزدەرمەن بىرگە ايماقتىڭ اگروونەركاسىپتىك كەشەنىن دامىتۋ ماقساتىندا جەمىستى ىنتىماقتاستىق ورناتۋعا نيەتتىمىز. ءبىزدى قالدىقسىز ءوندىرىس تەحنولوگياسى جانە ەت ونىمدەرىن تەرەڭ وڭدەۋدى قولدانۋ اياسىنداعى تاجىريبەڭىز وتە قىزىقتىرىپ وتىر», - دەدى باتىس قازاقستان وبلىسىنىڭ اكىمى التاي كولگىنوۆ.
«Dunbia» كومپانياسى باتىسقازاقستاندىق كاسىپكەرلەرمەن ارىپتەس بولۋعا, ماركەتينگ سالاسىندا ءوز تاجىريبەسىمەن بولىسۋگە دايىن ەكەنىن ءبىلدىردى. اتاپ ايتقاندا, كومپانيا قىتاي, يران جانە تاياۋ شىعىستىڭ نارىقتارىنا قازاقستاندىق ەتتى ىلگەرىلەتۋدى قامتاماسىز ەتۋگە مۇددەلى. «جايىك ەت» قازاقستاندىق كومپانياسىنىڭ ديرەكتورى ت.ەسكەندىروۆ اتاپ وتكەندەي, «Dunbia» سياقتى جاھاندىق كومپانيالاردىڭ قازاقستاندىق جوبالاردى ىسكە اسىرۋى مەن ينۆەستيتسيالاۋى قازاقستاندىق كاسىپورىنداردىڭ دەڭگەيىن ەلەۋلى تۇردە كۇشەيتىپ, باسقا شەتەلدىك ينۆەستورلار ءۇشىن ۇلگى بولا الادى.
قوس تاراپ وكىلدەرى اۋىل شارۋاشىلىعىن تسيفرلاندىرۋ سالاسىن دامىتۋ ماقساتىندا وتكەن جۇمىس ساپارىن وتە جەمىستى بولعانىن اتاپ ءوتتى.
باتىس قازاقستان دەلەگاتسياسى «Farm Wizard» كومپانياسىنىڭ وندىرۋشىدەن تۇتىنۋ كومپانيالارعا ءونىمنىڭ جەتكىزىلۋىن قاداعالاۋ جۇيەسىمەن تانىستى. بۇل باعدارلاما تۇتىنۋشىعا جانۋاردىڭ (قاي ۇيىردەن, قاي شارۋاشىلىقتان ەكەندىگىن) تۋعاننان باستاپ, ەتىنىڭ ۇستەل باسىنا كەلگەنگە دەيىنگى بۇكىل ءومىرىن باقىلاۋعا مۇمكىندىك بەرەدى. بۇل جۇمىس اۋىل شارۋاشىلىعىن تسيفرلاندىرۋ ءۇشىن قويىلعان مىندەتتەرگە سايكەس جۇزەگە اسىرىلاتىن بولادى.
ايتا كەتسەك, «Dunbia» قىزىل ەت ونىمدەرىن قايتا وڭدەۋ بويىنشا جەتەكشى كومپانيالاردىڭ ءبىرى, ونىڭ ىشىندە بولشەك جانە كوتەرمە ساۋدادا سيىر ەتى, قوي ەتى مەن شوشقا ەتىن ءوندىرۋ, جەرگىلىكتى, ۇلتتىق جانە حالىقارالىق دەڭگەيدە تاماقتاندىرۋمەن اينالىسادى. اتالعان كومپانياعا ۇلىبريتانيا مەن يرلانديا ەلدەرىنەن 25 كاسىپورىن كىرەدى, وندا 1 ميلليوننان استام ءىرى قارا مال جانە 3 ميلليوننان استام قوي بار. وندىرىستە 30 مىڭنان استام فەرمەر جانە 7 مىڭ ادام جۇمىسپەن قامتىلعان. كومپانيانىڭ الەمنىڭ ءارتۇرلى ەلدەرىندە 50-دەن استام وكىلدىگى بار. كاسىپورىن تۇراقتى ەكونوميكالىق ءوسىمدى كورسەتە وتىرىپ, اينالىم قاراجاتى 2 ملرد. ەۆرونى قۇراپ وتىر. «Dunbia» ەۋروپالىق نارىققا جوعارى ساپالى ءونىم جەتكىزۋشى بولىپ تابىلادى, ونىڭ ىشىندە «McDonalds», «Tesko», «Spar», «M&S» ءىرى ساۋدا جەلىلەرىمەن جۇمىس جاسايدى. سونداي-اق, كومپانيا اگروونەركاسىپتىك كەشەندە ماماندار دايىندايتىن ەۋروپالىق ۋنيۆەرسيتەتتەرمەن جۇمىس ىستەيدى, كومپانيا ءۇشىن گرانتتار تاعايىنداۋمەن اينالىسادى. «Dunbia» كومپانياسى ءوز ونىمدەرىن جاقسارتۋ ماقساتىندا عىلىمي زەرتتەۋلەر مەن ازىرلەمەلەردى ارتتىرۋ جۇمىستارىن بەلسەندى تۇردە ينۆەستيتسيالايدى. نەگىزگى باعىتى تۇقىمداردى اسىلداندىرۋ, تۇراقتاندىرۋ رەجيمى مەن راتسيونعا ارنالادى.
قازبەك قۇتتىمۇرات ۇلى,
«ەگەمەن قازاقستان»