ءماجىلىس دەپۋتاتتارى ابزال ەراليەۆ, باقىتبەك سماعۇل, گەنادي شيپوۆسكيحتىڭ سىر وڭىرىنە ساپارى جاڭاقورعان اۋدانىنان باستالدى. ولار اۋدانداعى سكز-U كۇكىرت قىشقىلى زاۋىتىنىڭ جۇمىسىمەن تانىسىپ, جۇمىسشى ۇجىممەن كەزدەستى.
«سكز-U» زاۋىتى – كۇكىرت قىشقىلىن دايىندايتىن سىر بويىنداعى اۋقىمدى ءوندىرىس ورىندارىنىڭ ءبىرى. شەتەلدىك وزىق ءارى ءتيىمدى, قورشاعان ورتا ءۇشىن قاۋىپسىز تەحنولوگيالاردى قولداناتىن زاۋىت مەملەكەتتىڭ ۇدەمەلى – يندۋستريالدى يننوۆاتسيالىق دامۋ باعدارلاماسى اياسىندا 2007 جىلى قۇرىلىسى باستالىپ, 2011 جىلى پايدالانۋعا بەرىلگەن. مۇندا تاۋلىگىنە 1500, جىلىنا 500 000 توننا كۇكىرت قىشقىلى وندىرىلەدى. بۇگىندە زاۋىتتا 277 ادام جۇمىس ىستەيدى. ونىڭ 65 پايىزى – جەرگىلىكتى تۇرعىندار.
– مەملەكەت باسشىسى ۇكىمەتكە ەنەرگيا ۇنەمدەۋ سالاسىندا ىشكى جالپى ءونىمدى ۇنەمدەۋدى 2020 جىلعا قاراي 25 پايىزعا تومەندەتۋ بويىنشا مىندەت جۇكتەگەن بولاتىن. بۇل باعىتتا ءبىزدىڭ كاسىپورىننىڭ قوسىپ وتىرعان ۇلەسى قوماقتى. ياعني زاۋىت قىشقىلدى ءوندىرۋ بارىسىندا شىعاتىن بۋدان ساعاتىنا 18 مۆت ەلەكتر ەنەرگياسىن ءوندىرىپ وتىر, – دەدى زاۋىت باسشىسىنىڭ ورىنباسارى ساۋلەبەك دۇيسەنبەكوۆ.
ماجىلىسمەندەر, سونداي-اق تۇرعىنداردىڭ وتىنىشتەرىن تىڭداپ, پارلامەنتتە اتقارىلعان جۇمىستاردى, سونىمەن بىرگە ەلباسى جولداۋى مەن «پرەزيدەنتتىڭ بەس الەۋمەتتىك باستاماسىنان» تۋىندايتىن مىندەتتەردىڭ جۇزەگە اسىرىلۋىنا كەڭىنەن توقتالدى.
***
ايماقتارعا ساپار اياسىندا ءبىر توپ ءماجىلىس دەپۋتاتى باتىس قازاقستان وبلىسىنا كەلدى. ەۆگەني كوزلوۆ, گلەب ششەگەلسكي, سەرگەي سيمونوۆ جانە سنەجاننا يماشەۆا مامانداندىرىلعان حالىققا قىزمەت كورسەتۋ ورتالىعىنىڭ جۇمىسىمەن تانىستى.
بيىل 31 مامىردا اشىلعان بۇل حقو كۇنىنە شامامەن 500-600 تۇرعىنعا قىزمەت كورسەتىپ, ايىنا 8 مىڭعا جۋىق ءوتىنىشتى قابىلدايدى. بۇل رەتتە ءماجىلىس دەپۋتاتى سنەجاننا يماشەۆا ورتالىقتىڭ جۇمىسىنا جوعارى باعاسىن بەردى. ونىڭ ايتۋىنشا, بۇل ساپارلار پارلامەنتتىڭ كەزەكتى سەسسياسىنىڭ قورىتىندىسى بويىنشا پارلامەنت جۇمىسى جانە مەملەكەت باسشىسىنىڭ باستامالارىنىڭ قالاي جۇزەگە اسىرىلىپ جاتقانىن ءتۇسىندىرۋ ماقساتىندا وتكىزىلۋدە. «وسى ماقساتتا ءبىز وبلىستاعى مامانداندىرىلعان حالىققا قىزمەت كورسەتۋ ورتالىعىن ارالادىق. ورتالىقتىڭ جۇمىسى كوڭىلىمىزدەن شىقتى. اسىرەسە ەلەكتروندى قىزمەت بارلىق جەردە كورسەتىلىپ ستاندارتتارعا ساي جۇمىس ىستەۋدە», دەدى ول.
كەزدەسۋ بارىسىندا دەپۋتاتتار پارلامەنتتىڭ زاڭ شىعارۋشىلىق جۇمىسىمەن جانە مەملەكەت باسشىسىنىڭ الەۋمەتتىك باستامالارىنىڭ جۇزەگە اسىرىلۋ بارىسى تۋرالى ايتىپ بەردى.
***
ءماجىلىس دەپۋتاتتارى پاۆەل كازانتسەۆ, باقىتجان ەرتاەۆ جانە جانات وماربەكوۆا استانا قالاسىنداعى «ەۆروكوپتەر قازاقستان ينجينيرينگ» جشس-نە بارىپ, جۇمىس بارىسىمەن تانىستى.
استاناداعى ەڭ ءىرى كاسىپورىن سانالاتىن «ەۆروكوپتەر قازاقستان ينجينيرينگ» تىكۇشاق قۇراستىرۋمەن اينالىسادى. كاسىپورىننىڭ جۇمىس بارىسىمەن تانىسقان دەپۋتات پ.كازانتسەۆ زاۋىتتىڭ وزگە ەلدەردىڭ نارىعىنا جول تابۋدا ىلگەرى دامىپ كەلە جاتقان كاسىپورىنداردىڭ ءبىرى ەكەنىن ايتا كەلىپ, كاسىپورىن قۇراستىراتىن تىكۇشاقتارعا دەگەن سۇرانىس كورشىلەس قىرعىز ەلىنەن كوپ تۇسەتىنىنە توقتالدى.
سونىمەن قاتار زاۋىت شەڭبەرىندە ورتالىق ازيا مەن ەلىمىزدىڭ ايماقتارىنا قاجەتتى مامانداردى دايارلايتىن اۆياتسيالىق ءبىلىم بەرۋ ورتالىعى جۇمىس ىستەيدى. بۇل الەم بويىنشا ۆ1 تەحنيكالىق ءدارىس پەن ەس145 تىكۇشاعىن باسقاراتىن ۇشقىشتاردى دايارلايتىن جالعىز ورتالىق بولىپ سانالادى. قازىرگى تاڭدا ورتالىقتا 8 ادام ءبىلىم الۋدا.
زاۋىت ورنالاسقان ايماقتا سەرۆيس ورتالىعى دا بار. بۇل جەردە كاسىبي مامان يەلەرى جاڭا تىكۇشاقتاردىڭ ۇشۋعا دايىندىعىن تەكسەرىپ, جوندەۋ جۇمىستارىن جۇرگىزەدى. ءوز كەزەگىندە «ەۆروكوپتەر قازاقستان ينجينيرينگ» جشس كوممەرتسيالىق ديرەكتورى تيمۋر تيلينين ورتالىقتا ۇشقىشتار دايارلاۋمەن عانا اينالىسپايتىنىن, مۇندا ماماندىققا قاجەتتى تەحنيكا قىزمەتكەرلەرى مەن اۆيونيكتەردى وقىتاتىنىن جەتكىزدى.
***
پارلامەنت سەناتىنىڭ دەپۋتاتتارى سەرىك جاقسىبەكوۆ پەن ەدىل مامىتبەكوۆ جۇمىس بابىنداعى ساپار اياسىندا «استانا – جاڭا قالا» ەركىن ەكونوميكالىق ايماعىنداعى №1 يندۋستريالىق پاركتىڭ نىساندارىن ارالادى.
سەناتورلار ساپار بارىسىندا قاعاز ونىمدەرىن وندىرەتىن «Ipek Kagit Asia» كاسىپورنىندا, «تاۋ-كەن التىن» اففيناج زاۋىتىندا, «GLB» ءۇي قۇرىلىسى كومبيناتى مەكەمەلەرىندە بولدى. كەزدەسۋ قورىتىندىسى بويىنشا ەركىن ەكونوميكالىق ايماقتىڭ ودان ءارى دامۋىنا كەدەرگى كەلتىرەتىن زاڭ شىعارۋ سيپاتىنداعى بىرقاتار وزەكتى ماسەلەلەر ايقىندالدى.
پارلامەنتشىلەر سەناتتىڭ بۇدان كەيىنگى جۇمىستارى بارىسىندا مۇددەلى تاراپتارمەن بىرلەسە وتىرىپ وزەكتى ماسەلەلەردى شەشۋ جانە ينۆەستورلاردىڭ ۇسىنىستارىن جۇزەگە اسىرۋ جونىندەگى ءىس-قيمىلدى جالعاستىرۋعا نيەتتەنىپ وتىر.
***
قاراعاندى وبلىسىنا ساپارلاپ كەلگەن ءماجىلىس دەپۋتاتتارى گۇلنار بيجانوۆا مەن سەرىك ساپيەۆ ءوڭىر حالقىمەن كەزدەستى.
دەپۋتاتتار بۇقار جىراۋ اۋدانىنداعى قۋشوقى اۋىلىنا بارىپ, «بوتاقارا جىلۋ» كاسىپورنىنىڭ ەڭبەك ۇجىمىمەن كەزدەستى. مۇندا 120-عا جۋىق ادام جۇمىس ىستەيدى. كاسىپورىن سۋمەن, جىلۋمەن جابدىقتاۋ جانە سۋدى بۇرۋ جەلىلەرى جۇمىسىن جۇزەگە اسىرادى. ورتالىق جىلىتۋ جۇيەسىنە اۋدان ورتالىعىنداعى 316 ءۇي, ونىڭ ىشىندە 16 كوپقاباتتى تۇرعىن ءۇي, 5 بيۋدجەتتىك ۇيىم مەن جەكەمەنشىك كاسىپورىندار دا قوسىلعان. كەزدەسۋدىڭ باستى تاقىرىبى مەملەكەت باسشىسىنىڭ بەس الەۋمەتتىك باستاماسى تۋرالى بولدى.
كەزدەسۋدە بۇدان وزگە تۇرعىندار كوكەيىندە جۇرگەن وزەكتى ماسەلەلەر كوتەرىلدى. تۇرعىندار ءماجىلىس دەپۋتاتتارىنا قۋشوقى اۋىلىنا گاز قۇبىرىن تارتۋ, «7 – 20 – 25» باعدارلاماسى بويىنشا تۇرعىن ءۇي الۋدىڭ تەتىكتەرى جانە باسقا دا ماڭىزدى سۇراقتارىن قويدى. سونداي-اق 60 جىلداردىڭ باسىندا سالىنعان جەرگىلىكتى سۋ جەلىلەرىن قالپىنا كەلتىرۋ مەن جەدەل جاردەم بولىمشەسىنىڭ جابىلۋى سياقتى پروبلەمالارىن نازارعا الۋدى سۇرادى. ءوز كەزەگىندە ءماجىلىس دەپۋتاتتارى بۇل ماسەلەلەردى دەربەس باقىلاۋلارىنا الدى.
***
ءماجىلىس دەپۋتاتى ناتاليا جۇمادىلداەۆا ايماقتارعا جۇمىس ساپارىن شىمكەنتتەگى وبلىستىق اسسامبلەيا جانىنداعى قۇرىلىمداردىڭ جەتەكشىلەرىمەن, ەتنومادەني بىرلەستىكتەردىڭ توراعالارىمەن جانە ءوڭىر تۇرعىندارىمەن كەزدەسۋدەن باستادى.
كەزدەسۋدە دەپۋتات ەلباسىنىڭ قازاقستان حالقىنا ارناعان بيىلعى جولداۋىندا ايتىلعان باسىمدىقتاردىڭ ىسكە اسىرىلۋ بارىسىمەن تانىسىپ, «پرەزيدەنتتىڭ بەس الەۋمەتتىك باستاماسى» شەڭبەرىندە اتقارىلىپ جاتقان جۇمىستاردى تالقىلادى.
سونداي-اق ن.جۇمادىلداەۆا شىمكەنت قالاسىنداعى س.ەرۋباەۆ اتىنداعى №24 مەكتەپ-ليتسەيىنىڭ جانە قالالىق وقۋشىلار سارايىنىڭ جۇمىسىمەن تانىسىپ, ۇستازدارمەن كەزدەستى. ۇستازدارمەن اڭگىمە بارىسىندا ەلىمىزدەگى ءبىلىم بەرۋ سالاسىنداعى رەفورمالار مەن مۇعالىمدەردى الەۋمەتتىك قورعاۋ ماسەلەلەرىنە نازار اۋدارىلدى.
ءماجىلىس دەپۋتاتى بۇدان ءارى تۇركىستان وبلىسىنداعى سايرام, تولەبي, ورداباسى, ماقتاارال, سارىاعاش اۋداندارىنداعى بىرقاتار الەۋمەتتىك جانە وندىرىستىك نىسانداردى ارالاپ, ەڭبەك ۇجىمدارىمەن, جەرگىلىكتى تۇرعىندارمەن كەزدەسۋلەر مەن جەكە قابىلداۋلار وتكىزبەك.
دايىنداعان ۆەنەرا تۇگەلباي,
«ەگەمەن قازاقستان»