بۇگىن قالا اكىمدىگىندە ءبىرىنشى جارتىجىلدىقتاعى نەگىزگى الەۋمەتتىك ەكونوميكالىق قورىتىندى شىعارىلدى. ماسەلەن, تەك العاشقى التى ايدا 5,2% ينۆەستيتسيا تارتىلعان, وتكەن جىلدىڭ ۇقساس مەرزىمىمەن سالىستىرعاندا ءوسىم بار, دەپ حابارلايدى استانا قالاسى اكىمدىگىنىڭ رەسمي سايتى.
«بۇگىن قالانىڭ ساياساتى جەكە كاسىپكەرلىكتى قولداۋعا جانە ينۆەستيتسيالار تارتۋعا باعىتتالعان جانە وسى باعىت جاقسى ناتيجەلەر كورسەتۋدە. مىسالى, جىل باسىنان بەرى 443,1 ملرد تەڭگە ينۆەستيتسيا تارتىلدى. وتكەن جىلمەن سالىستىرعاندا 5,2% وسكەن. شاعىن جانە ورتا بيزنەس سالاسىندا جۇمىس ىستەپ تۇرعان سۋبەكتىلەردىڭ سانى 10,7%-عا ارتىپ, 106,5 مىڭعا جەتتى», - دەدى ءا.يسەكەشەۆ.
شاعىن جانە ورتا بيزنەستى بەلسەندى قولداۋدىڭ ارقاسىندا اي سايىن استانا قالاسىندا شامامەن 2200 جاڭا شاعىن جانە ورتا بيزنەس سۋبەكتىلەرى اشىلادى. 2018 جىلدىڭ قاڭتار-مامىر ايلارى ارالىعىندا ولاردان بيۋدجەتكە شامامەن 188 ملرد تەڭگە سالىقتىق تۇسىمدەر تۇسكەن.
ەكونوميكا سەكتورىندا 11 046 جاڭا جۇمىس ورنى اشىلدى, بۇل وتكەن جىلدىڭ وسى كەزەڭىمەن سالىستىرعاندا 18,5% - عا ارتىق.
«جالپى استانا قالاسىنىڭ الەۋمەتتىك-ەكونوميكالىق دامۋىنىڭ جوسپارلانعان نىسانالى ينديكاتورلارىنا قول جەتكىزۋ بويىنشا جۇمىس جالعاسادى», - دەپ قورىتىندىلادى ءا. يسەكەشەۆ.
سونىمەن قاتار, ونەركاسىپتە 2,3%-عا (285,9 ملرد تەڭگە), وڭدەۋ ونەركاسىبىندە -2,6 پايىزعا ءوسىم بار.