اتىراۋدا مارافون جارىسى ءجيى ۇيىمداستىرىلادى. بۇقارالىق سپورتتى دامىتۋعا باعىتتالعان شارالارعا قاتىسۋشىلار قاتارى دا كوبەيىپ كەلەدى. بىراق بۇل جولعى بايگە باسقاشا, تۇنگى اتىراۋدىڭ كوشەلەرىنەن 2000-عا جۋىق جەلاياق جۇگىرىپ ءوتتى. ۇيىمداستىرۋشىلار دودا استانانىڭ 20 جىلدىعىنا ارنالعان شارالار قاتارىنا ەنگىزىلگەنىن ايتادى.
– تۇنگى مارافون بۇعان دەيىن بولماپ ەدى. جارىس تۋرالى جاريالانعان كۇننەن باستاپ قىزىعۋشىلىق تانىتقاندار كوپ بولدى, بۇل بىزگە شابىت بەردى. جاستار عانا ەمەس, ەگدە جاستاعى تۇرعىندار دا جارىس الاڭىنا شىقتى, – دەيدى «Atyrau Marathone-2018» ۇيىمداستىرۋ كوميتەتىنىڭ ۆيتسە-پرەزيدەنتى يۋري پونومارەۆ.
بەس شاقىرىمدىق جولدى العاشقى بولىپ جۇگىرىپ وتكەن بازارباي داۋتاليەۆ جەڭىسكە جەتتى. 24 جاستاعى بازارباي اتىراۋدا وتەتىن مارافوندارعا تۇراقتى قاتىسىپ ءجۇر. مارەگە الدىمەن كەلگەن ون قاتىسۋشىعا ارنايى سىيلىقتار تابىستالدى. ەندىگى مارافون كۇزدە بولادى, سونداي-اق جەلاياق بالالار اراسىندا جارىس وتكىزۋ دە جوسپاردا بار.
باقىتگۇل باباش, «ەگەمەن قازاقستان»
اتىراۋ