تورتكۇل دۇنيەنىڭ ەڭ تاڭداۋلى تەننيسشىلەرىنىڭ باسىن قوسقان ۋيمبلدون ءتۋرنيرىنىڭ اياقتالۋىنا ساناۋلى عانا كۇندەر قالدى. «ۇلكەن دۋلىعا» ساناتىنداعى ايتۋلى جارىستا قازاقستاننىڭ قوس ويىنشىسى ونەر كورسەتكەنىمەن, ەكەۋى دە ەكىنشى اينالىمنان اسا المادى. اتاپ ايتساق, سول مەجەدە ميحايل كۋكۋشكين الەمنىڭ ءبىرىنشى راكەتكاسى, يسپانيالىق رافاەل نادالدان ۇتىلسا, يۋليا پۋتينتسەۆا رەسەيلىك داريا كاساتكيناعا جول بەردى.
ۋيمبلدون ءتۋرنيرىنىڭ تۇساۋى سوناۋ 1877 جىلى كەسىلدى. العاشىندا ەرلەر ءوزارا شەبەرلىك بايقاسسا, ارادا جەتى جىل وتكەننەن سوڭ ولاردىڭ قاتارىنا ايەلدەر قوسىلدى. ودان كەيىن جۇپتىق جانە ارالاس جۇپتار اراسىندا سايىستار ۇيىمداستىرىلا باستادى. جىلدار وتكەن سايىن ۋيمبلدوننىڭ بەدەلى كۇرت ارتىپ, ول «ۇلكەن دۋلىعا» ساناتىنداعى ءمانى مەن ماڭىزى زور ءارى جۇلدەلىك قورى اسا مول جارىستاردىڭ بىرىنە اينالدى.
ۇلىبريتانيا تورىندە تالاي رەكوردتىق كورسەتكىش ورناتىلدى. ماسەلەن, شۆەيتساريانىڭ ماقتانىشى رودجەر فەدەرەر جەكەلەگەن سايىستا 8 مارتە توپ جارسا, اقش-تىڭ قوس سەركەسى – ۋيليام رەنشوۋ مەن پيت سامپراس 7 رەتتەن جەڭىمپاز اتاندى. ال ايەلدەر اراسىنداعى ەڭ ۇزدىك ناتيجە حح عاسىردىڭ جەتپىسىنشى جانە سەكسەنىنشى جىلدارى اتوي سالعان مارتينا ناۆراتيلوۆاعا تيەسىلى. اۋەلى چەحوسلوۆاكيانىڭ تۋى استىندا ونەر كورسەتىپ, كەيىننەن اقش ازاماتتىعىن العان ايگىلى تەننيسشى 9 تۋرنيردە قارسىلاس شىداتپادى. امەريكالىق حەلەن ۋيللس-مۋدي 8 مارتە تەڭدەسسىز دەپ تانىلسا, ۇلىبريتانيالىق دوروتەيا لامبەرت-چامبەرس, گەرمانيالىق شتەففي گراف جانە اقش-تىڭ تاعى ءبىر جۇلدىزى سەرەنا ۋيليامس 7 رەتتەن دارا شىقتى.
ۋيمبلدوننىڭ ەرلەر تۋرنيرىندە امەريكالىق گاردنار ماللويدىڭ ەسىمى ەڭ قارت چەمپيون رەتىندە تىركەلدى. ول 43 جاستان اسقان شاعىندا شاشاسىنا شاڭ جۇقتىرمادى. گەرمانيالىق بوريس بەككەرگە بۇل بەلەس نەبارى 17 جاسىندا باعىندى. وسىلايشا نەمىس جىگىتىنىڭ ەسىمى ەڭ جاس چەمپيون رەتىندە سپورتتىق شەجىرەگە جازىلدى. ايەلدەر اراسىندا مارتينا ناۆراتيلوۆاعا تاڭدانباۋ مۇمكىن ەمەس. ول 46 جاسىندا جاسىنداي جارقىراسا, شۆەيتساريانىڭ جاس جۇلدىزى مارتينا حينگيس 16 جاسىندا الدىنا جان سالمادى.
2010 جىلى امەريكالىق دجون يزنەر مەن فرانتسيالىق نيكوليا مايۋ اراسىندا وتكەن ماتچ باقانداي 11 ساعات 5 مينۋتكە سوزىلدى. «جان الىسىپ, جان بەرىسكەن» بۇل ايقاس 6:4, 3:6, 6:7, 7:6, 7:6 ەسەبىمەن العاشقىسىنىڭ پايداسىنا شەشىلدى. ءدال سول جىلى اقش ويىنشىسى تەيلور دەنتتىڭ باعىتتاعان دوبى ساعاتىنا 238 شاقىرىمدىق جىلدامدىقپەن زىمىراعان ەكەن. مىنە, وسىلاي تىزبەكتەي بەرسەك, 141 جىلدىق تاريحى بار ۋيمبلدون تۋرنيرىندە تالاي تاڭداي قاعارلىق رەكوردتاردىڭ تىركەلگەنىنە قانىق بولامىز.
بيىلعى ءتۋرنيردىڭ جۇلدە قورى 34 ميلليون فۋنت ستەرلينگتى (44 617 810 دوللار) قۇراپ وتىر. قازىرگى كەزدە جارىس جولىندا كىل مىقتىلار عانا قالدى. سولاردىڭ اراسىنان كىمنىڭ وزاتىنى الداعى كۇندەرى انىقتالادى. ءبىر انىعى, ەرلەر مەن ايەلدەردىڭ جەكەلەگەن سايىسىندا جەڭىمپاز اتانعان ويىنشى 2 250 ميلليون فۋنت ستەرلينگتى يەلەنەدى. فينالدا ۇتىلعان تەننيسشى سول سومانىڭ تەڭ جارتىسىن ەنشىلەيدى. جارتىلاي فينالعا جولداما العاندار 562 مىڭدى ولجالاسا, شيرەك فينالعا شىققاندار 281 مىڭعا يەلىك ەتەدى. قازاقستاننىڭ قوس تەننيسشىسى ۋيمبلدوننىڭ ەكىنشى اينالىمىندا ونەر كورسەتكەنى جايىندا جوعارىدا ايتتىق. سول مەجەگە جەتكەنى ءۇشىن ميحايل كۋكۋشكين مەن يۋليا پۋتينتسەۆانىڭ ەسەپشوتىنا 63 مىڭ فۋنت ستەرلينگ اۋدارىلدى.
عالىم سۇلەيمەن, «ەگەمەن قازاقستان»