ادامزات قاسىرەتى تۋرالى شىعارما

يادرولىق سىناققا ىڭعايلى جەر ىزدەگەن كەڭەستىك عالىمدار ۇسىنىلعان الدەنەشە ايماقتان سەمەي ءوڭىرىن تاڭداۋى; انىعىندا ولار ەلسىز قيىردى ىزدەۋگە ءتيىس ەدى, امال نە, عالىمدار كوميسسيا­سى قازاقتار ەجەلدەن قونىس ەتكەن دەگەلەڭ باۋرايىن پوليگونعا قولايلى ساناپ, سول ايماقتى قاعاز جۇزىندە ءشول دالاعا اينالدىرىپ, ۇكىمەتكە جالعان مالىمەت ۇسىنعان. شىندىعىندا سول ايماق حالىق ءجيى قونىستانعان, مال-جانعا قولايلى, قاينار بۇلاقتارى سارقىلمايتىن, تال-قايىڭى جەلكىلدەگەن شۇرايلى ولكە بولاتىن. 

پوليگون باسشىلارى جانە اسكەري ءبولىم مىڭ شاقىرىم قيىرداعى سولتۇستىك مۇزدى مۇ­حيتقا سارقىلماي قۇياتىن, جاعاسىنا ىرگەلى قالالار مەن ەلدى مەكەندەر ءجيى ورنالاسقان ەرتىس جاعاسىنا توقتاپ, مەكەنجاي سالدى, بەرتىندە سول كۋرچاتوۆ قالاسى اتاندى. ال ايدىنى شالقار وزەننىڭ وڭ جاعالاۋى مىڭداعان جىلدار بويى اسا بويشاڭ قاراعاي ورمانى وسەتىن-ءدى, جال-جال قۇمى دا ەرەكشە قۇنارلى, ەمدىك قاسيەتى دە بولاتىن. ناق وسى وڭىردە قازاقتىڭ قۇدىرەتتى ءسوزىن جاڭا بەلەسكە كوتەرگەن اباي, شا­كارىم, اۋەزوۆ سىندى ءھام ولار­دان دا وزگە اقىلگوي ويشىلدارى مەن اقىن-جىراۋلارى ءومىر ءسۇردى. كەڭەس وداعى وسىلايشا الەم­دەگى قارۋ باسەكەسىندە قازاق دالا­سىنىڭ توز-توزىن شىعارىپ, بەيبىت حالىقتىڭ قاسىرەت شەگۋىنە اكەلدى.

جازۋشى مەدەۋ سارسەكەنىڭ «سە­مەي قاسىرەتى» اتتى كىتابى جاقىندا اعىلشىن تى­لىندە «Thە Biggest made Catastrorhe» اتاۋىمەن جارىققا شىق­تى. حالىقارالىق تىلدە باسىل­عان شىعارمانىڭ جاھان جۇرت­شىلىعى ءۇشىن اقپاراتتىق ماڭى­زى جوعارى بولماق. ويتكەنى الەم حالقى حيروسيما جانە ناگاساكي قالالارىنا تاستاعان ەكى اتوم بومباسىنىڭ قۋاتىنان سەمەي پوليگونىنداعى جارىلىستار 2500 ەسە اسىپ تۇسكەنىنەن حاباردار بولۋى كەرەك.

سەمەي قاسىرەتىن جاھانعا جەتكىزۋدە اعىلشىن تىلىندە باسىلعان كىتاپتاعى دەرەكتەر, ياعني ادامزات قاسىرەتى تۋرالى شىعارما الەم جۇرتشىلىعىنا يادرولىق قارۋ قانداي زارداپ اكەلەتىندىگىن بايانداپ بەرەدى. بالكىم, وركەنيەتتى الەم وسىدان كەيىن ويلاناتىن شىعار؟

نۇرديدار جۇماعاليەۆ