پاۆلودار – سەمەي تاس جولى بويىنداعى نوۆويامىشەۆو جانە چەرنورەتسك اۋىلدارىندا كولىكپەن جانە زاماناۋي مەديتسينالىق قۇرىلعىلارمەن جابدىقتالعان جەدەل جاردەم بەكەتتەرى اشىلدى. جەدەل-جاردەم بەكەتىنىڭ اشىلۋىنىڭ الدىندا عانا نوۆويامىشەۆو اۋىلىنا جاقىن جەردە كولىك اپاتى بولىپ, ءبىر ادام اۋىر جاراقاتتانعان ەدى. ناۋقاس دەرەۋ جاڭا سانيتارلىق اۆتوكولىكپەن وبلىس ورتالىعىنا جەتكىزىلدى.
جەدەل-جاردەم بەكەتتەرىنىڭ اشىلۋىنا قاتىسقان سانيتارلىق اۆياتسيا رەسپۋبليكالىق ورتالىعىنىڭ ديرەكتورى نۇرجان وتارباەۆتىڭ ايتۋىنشا, جەدەل مەديتسينالىق جاردەم جۇيەسىن جاڭعىرتۋ اياسىندا ەلىمىزدە بارلىق جەدەل قىزمەت تۇرلەرىن ءبىر جۇيەگە بىرىكتىرۋ مىندەتى قويىلعان. ماقسات – 10 مىڭ ادامنان از تۇرعىنى بار اۋىلداردى دا جەدەل جاردەممەن قامتاماسىز ەتۋ. ءتىپتى, شاعىن بولىمشەلەردىڭ تۇرعىندارىنا دا مەديتسينالىق كومەك قولجەتىمدى بولۋى كەرەك. سونداي-اق اۋىلدىق دارىگەرلەرمەن بىرلەسە قىزمەت ەتۋ ارقىلى جەدەل جاردەم دارىگەرلەرى جاردەم بەرۋدىڭ حالىقارالىق ستاندارتى بويىنشا تاجىريبە الماسادى.
ال وڭىردە قاي جەردەن بولسىن جەدەل جاردەم شاقىرسا, بارلىق اقپارات ءبىر جۇيەگە ءتۇسىپ, كىم جىلدامىراق كومەكتەسە الادى, ۇشاق نەمەسە تىكۇشاق قاجەتتىگىن انىقتاي الادى. وبلىس ورتالىعىنداعى جەدەل مەديتسينالىق جاردەم ورتالىعى ەلىمىزدەگى بارلىق ستانسالاردىڭ قىزمەتى ساراپقا سالىنعان رەسپۋبليكالىق بايقاۋدا ۇزدىك تە اتاندى. بۇل كۇندەرى جەدەل-جاردەم ورتالىعى GPS-ناۆيگاتسياسى جۇيەسىن پايدالانۋدا. باسقارۋ جۇيەسى اۆتوماتتاندىرىلعان تۇردە جۇمىس ىستەيدى.
جالپى, GPS-ناۆيگاتسياسى جۇيەسى قازىر وبلىس ورتالىعىنان تىس اۋماقتاردا دا قولدانىلۋدا. باقىلاۋشى ماماندار اۋدان ورتالىقتارىن, اۋىلداردى مونيتور تەرەزەسى ارقىلى قاداعالاي الادى. توسىن وقيعا ورىن الىپ, ادامدار زارداپ شەككەن بولسا, دەرەۋ سول جاققا جەتەدى نەمەسە جاقىن ورنالاسقان امبۋلاتوريالىق اۋرۋحاناعا حابارلاسادى. بۇل قوندىرعىلار ەنەرگياسىز ەكى ساعات جۇمىس ىستەي الادى ەكەن. قوڭىراۋ شالعان ادامنىڭ بايلانىس ءنومىرى اۆتوماتتى تۇردە ساقتالادى. جان-جاقتى جابدىقتالعان رەانوموبيلدەگى ارنايى قۇرالدار ارقىلى رەانيماتسياعا جەتكىزىلۋى ءتيىس ناۋقاستارعا العاشقى كومەك كورسەتىلەدى. ءدارى-دارمەك, وتتەگى اپپاراتى, رەانيماتسيالىق سومكە, ءار دارىگەردە پلانشەت بار.
باس دارىگەر قانادان احمەتجانوۆتىڭ ايتۋىنشا, ءۇش جىل بۇرىن وبلىستىق جەدەل جاردەم ستانساسىنا سانيتارلىق اۆياتسيا ەنگىزىلدى. وڭىردە «جەدەل جاردەم» كلاستەرى قۇرىلدى. وسىلايشا جەدەل جاردەم قىزمەتىنىڭ اۋداندىق بولىمشەلەرى وبلىس ورتالىعىنداعى ورتالىققا بىرىگىپ, جاڭا دەڭگەيدە جۇمىس ىستەۋدە. ورتالىق قۇرامىندا «فولكسۆاگەن» 4 سانيتارلى اۆتوكولىگى «ان-2» ۇشاقتارى جانە «ەۆروكوپتەر» بار.
وڭىردەگى بارلىق اۋداندار, قوسالقى ستانسانىڭ جەدەل جاردەم كولىكتەرىمەن, زاماناۋي مەديتسينالىق جابدىقتارمەن جانە ءبىر رەت قولداناتىن قۇرالدارمەن جابدىقتالعان. تۇرعىندارعا ساپالى مەديتسينالىق كومەك كورسەتۋ ءۇشىن كارديومەترلەر, كۋۆەزدەر, ۋزي-اپپاراتتار جانە ەحونتسەفالوگراف ساتىپ الىنىپتى. مىسالى, 26 بريگادا كۇنىنە 550 شاقىرتۋعا بارادى. جەدەل جاردەم ورتالىعىندا 76 دارىگەر, 170 فەلدشەر, بارلىعى 544 قىزمەتكەر كۇنى-ءتۇنى قىزمەت ەتەدى. وتكەن جىلى 11 جاس دارىگەر كەلىپتى. ورتالىق جانىنان اۋدانداردان كەلەتىن دارىگەرلەر ءۇشىن وقۋ ورتالىعى اشىلعان. جەدەل-جاردەم دارىگەرى سەرگەي گريششۋك بيىل رەسپۋبليكا بويىنشا «ۇزدىك فەلدشەر» اتاندى.
ال جەدەل جاردەم بەكەتتەرى اشىلعان ەكى اۋىل وبلىسارالىق, رەسپۋبليكالىق ماڭىزى بار پاۆلودار – سەمەي تاس جولىنا جاقىن ورنالاسقان. بۇل جول ارالىعى ايتارلىقتاي قاۋىپتى جول بولىگى سانالدى. بىلتىر بۇل جەردە 50 جول-كولىك اپاتى ورىن الىپتى. ەندى جاڭادان اشىلعان بۇل بەكەتتەر ءوڭىر, اۋدان جولدارىنداعى جول اپاتى كەزىندەگى ءولىم-ءجىتىمدى ازايتۋعا سەپتىگىن تيگىزەدى. جەتەر ۋاقىتتارى دا قىسقاردى. الداعى ۋاقىتتا تاعى دا 5 جاڭا جەدەل مەديتسينالىق جاردەم بەكەتىن اشۋ جوسپارلانۋدا.
فاريدا بىقاي, «ەگەمەن قازاقستان»
پاۆلودار