ونەر قونعان اۋلەتتىڭ ونەگەسى

كورمە «نۇر وتان» پار­تيا­سىنىڭ قولداۋىمەن سۋرەتشى اماندوس Aقاناەۆتىڭ 70 جىل­دىق مە­رەيتويى مەن شى­عارماشى­لى­عى­نىڭ 50 جىل­دىعىنا جانە اس­تا­نانىڭ 20 جىلدىق تورقالى تو­يىنا وراي «رۋحاني جاڭعىرۋ» باع­دارلاماسى اياسىندا ۇيىم­داس­تىرىلىپ وتىر. اقاناەۆتار اۋلەتىنەن شىققان سۋرەتشىلەر مەن باسقا دا قىلقالام شە­بەر­لەرىنىڭ ەڭبەكتەرى قويىلعان كورمەگە «نۇر وتان» پارتياسى تورا­عاسىنىڭ ءبىرىنشى ورىنباسارى ماۋلەن اشىمباەۆ, استانا قا­لاسى اكىمىنىڭ ورىنباسارى ەر­مەك امانشاەۆ, ەلىمىزگە بەلگى­لى سۋرەتشىلەر مەن ونەر قايرات­كەرلەرى قاتىستى.

ءىس-شارا بارىسىندا «نۇر وتان» پارتياسى توراعاسىنىڭ ءبىرىنشى ورىنباسارى حالقىمىز ءۇشىن مادەنيەت پەن ونەردىڭ الار ورنى قاشاندا ەرەكشە ەكەنىن ايتتى. سول سەبەپتى دە ەلباسىمىز بۇل سالاعا ايرىقشا ءمان بەرىپ, ونىڭ قارقىندى دامۋىنا بارلىق جاعدايدى جاساپ كەلەدى.

– ەلباسىنىڭ «رۋحاني جاڭ­عىرۋ» باعدارلاماسى ۇلتتىق كو­دى­مىزدى ساقتاي وتىرىپ, الەمنىڭ وزىق تاجىريبەلەرىنەن ۇلگى الىپ, بولاشاققا باتىل قادام جاساۋعا باعىتتالعان. ودان بولەك, مەملەكەت باسشىسى الدىمىزعا الەمنىڭ ەڭ دامىعان 30 ەلىنىڭ قاتارىنا قوسىلۋ جونىندە ناقتى مىندەت قويىپ وتىر. بۇل جەردە تەك ەكونوميكا عانا ەمەس, رۋحاني جانە مادەني سالانىڭ دا وركەندەۋىنە باسا ءمان بەرىلەدى. وسى تۇرعىدان كەلگەندە, اماندوس اتىبەك ۇلىنىڭ ەڭبەكتەرى حالقىمىزدىڭ ۇلتتىق كودىن ساقتاپ, ونى وسكەلەڭ ۇر­پاققا ناسيحاتتاۋعا جانە دامى­عان ەلدەرمەن تەرەزەسى تەڭ دارە­جەدە تۇرۋعا مول مۇمكىندىك بەرەدى, دەدى ماۋلەن اشىمباەۆ.

كورمەگە «مەنىڭ زامانداس­تارىم» اتتى جانرلىق پورترەتتەر توپتاماسىنا 20-دان استام تانىمال تۇلعالار بەينەلەنگەن ونەر تۋىندىلارى كىرگەن. سۋرەتشى وسى جوبا بويىنشا ون جىلدان استام ۋاقىتتان بەرى جۇمىس ىستەۋدە جانە ونى الداعى جىلداردا جالعاستىرۋعا نيەتتەنگەن. پورترەتتەر تسيكلى امان­دوس اقاناەۆ پەن ونىڭ وتباسى مۇشەلەرى – «اقاناەۆتار سۋرەت­شىلەر اۋلەتى» اتتى شىعار­ماشىلىق جوباسىمەن تولىق­تى­رىلعان. سونىمەن قاتار كورمەگە قىتاي سۋرەتشىلەر وداعىنىڭ مۇشەسى سيۋي ءينليدىڭ دە تۋىندىلارى قويىلعان.

كورمەگە ءارتۇرلى تەحنيكامەن جاسالعان 70-تەن استام تۋىندى كەنەپ, كوللاج, رەلەفتىك كەسكىندەمە, گرافيكا, قابىرعا سۋرەتتەرى مەن قوندىرعىلارىنىڭ ەسكيزدەرى ارقيلى بەينەلەنگەن.

مادەنيەت پەن رۋحاني قۇن­دىلىقتاردىڭ دامۋى ەكو­نومي­كالىق ءوسىم مەن حالىقتىڭ تۇر­مى­سىن جاقسارتۋ سياقتى ەڭ ماڭىزدى ماسەلەلەرمەن قاتار تۇرادى. سول سەبەپتى دە ەلىمىزدە ەكونوميكالىق, ساياسي, الەۋمەتتىك جانە رۋحاني جاڭعىرۋ باستامالارى جۇيەلى جۇزەگە اسىرىلۋدا. وسىلايشا بۇگىندە قازاقستاندىق مادەنيەتتى الەمدىك مادەني مۇرانىڭ اجىراماس بولىگىنە اينالدىرۋعا ايرىقشا ءمان بەرىلىپ وتىر. ول ءۇشىن ونەردىڭ دامۋىنا تىڭ سەرپىن بەرەتىن وسىنداي ءىس-شارالاردى ءجيى وتكىزىپ, تالانتتاردى قولداۋدىڭ بەرەرى مول ەكەنى انىق.

كورمەنىڭ اشىلۋىندا استانا قالا­سى اكىمىنىڭ ورىن­باسارى ەر­مەك امانشاەۆ, بەلگىلى ديپلو­مات, كوركەمونەر اكادە­مياسىنىڭ اكادەميگى جە­كەن قالي­ ۇلى, قازاق­ستان سۋرەتشىلەر وداعىنىڭ تورا­عاسى جانۇزاق ءمۇساپىر, قازاق­ستاننىڭ ەڭبەك سىڭىرگەن قايرات­كەرى ەرلان ايتۋاروۆ جانە تاعى باسقا قوعام بەلسەندىلەرى مەن بەلگىلى سۋرەتشىلەر ءسوز الىپ, ءىس-شارانىڭ ماڭىزىنا نازار اۋداردى.

«اماندوس اقاناەۆ – بەينەلەۋ ونەرىنىڭ جاڭا ءداستۇرىن قالىپتاستىرعان سۋرەتشى. بۇگىنگى اڭگىمە اقاناەۆتار اۋلەتى تۋرالى بولۋى كەرەك. ويتكەنى اقاناەۆتار وتباسىنىڭ بارلىعى سۋرەتشى جانە ونەر الەمىنە وزىن­دىك ەرەكشەلىكتەرىمەن تانىل­عان. ەلوردامىزدىڭ 20 جىلدىعىنا ارنالعان بۇل كورمە ناعىز بەي­نەلەۋ ونەرىنىڭ شىڭىن كورسە­تەتىن كورمە دەپ ايتۋعا بولادى. سۋرەتشىلەر وتباسى از ەمەس, بىراق اقاناەۆتار وتباسى – بىرەگەي. وزگەگە ۇلگى, ۇرپاق­قا ونەگە», – دەدى جانۇزاق ءمۇسا­پىر. اماندوس اقاناەۆ بارشا ونەر­سۇيەر قاۋىمعا جانە كورمە­نىڭ وتۋىنە اتسالىسقان ازامات­تارعا العىسىن ءبىلدىرىپ, ەرەكشە ريزاشىلىعىن جەتكىزدى.

اماندوس اقاناەۆ – تەك ەلى­مىز­دە عانا ەمەس, ورتالىق ازيادا كەڭىنەن تانىمال شەبەر سۋرەتشى. ونىڭ قايتالانباس, وزىنە عانا ءتان ورنەكتەرى تۇتاس تۇركى جۇر­تىنىڭ اڭىز-ءاپسانالارىنان سىر شەرتەدى. ونىڭ كارتينالارى­نا قاراپ كوشپەلى تۇركى حالىق­تارىنىڭ مادەنيەتىمەن جاقىنى­راق تانىسۋعا مۇمكىندىك تۋادى.

قىلقالام شەبەرىنىڭ ەڭ­بەك­تەرى وسىعان دەيىن الەمنىڭ بىرقاتار ەلدەرىندە وتكەن كوپ­تەگەن كورمەلەرگە قويىلعان. سونىڭ ىشىندە اقش, يسپانيا, گەرمانيا, رەسەي سياقتى ەلدەردى ەرەكشە اتاپ وتكەن ءجون. ودان بولەك, شۆەيتساريا, فرانتسيا, يتاليا, جاپونيا جانە تاعى باس­قا ونداعان ەلدەردىڭ جەكە كول­لەكتسيالارىندا سۋرەتشىنىڭ شىعارمالارى ساقتاۋلى تۇر.

باعاشار تۇرسىنباي ۇلى, «ەگەمەن قازاقستان»