استانادا ينۆەستيتسيالار جانە دامۋ مينيسترلىگى مەن «دامۋ» كاسىپكەرلىكتى دامىتۋ قورى» اق اراسىنداعى قازاقستانداعى بۇۇ دامۋ باعدارلاماسىنىڭ قارجىلاي قولداۋىمەن ەنەرگيا ۇنەمدەۋ ماسەلەلەرىمەن اينالىساتىن كاسىپكەرلەردى قولداۋ جونىندەگى شارالاردى قامتاماسىز ەتۋ بويىنشا ىنتىماقتاستىق تۋرالى بۇعان دەيىن جاسالعان كەلىسىم شەڭبەرىندە ءباسپاسوز ءماجىلىسى ءوتتى.
ءىس-شارا اياسىندا مينيسترلىك وسى كەلىسىم بويىنشا تومەن كومىرتەكتى قالالىق جوبالاردى ىسكە اسىرۋعا كىرىسكەن كاسىپكەرلەرگە «جاسىل» سەرتيفيكاتتار تاپسىردى.
ءباسپاسوز ماجىلىسىنە «دامۋ» كاسىپكەرلىكتى دامىتۋ قورى» اق باسقارما توراعاسىنىڭ ورىنباسارى داۋلەت ابىلقايىروۆ, قر يدم يندۋستريالدى دامۋ جانە ونەركاسىپتىك قاۋىپسىزدىك كوميتەتى توراعاسىنىڭ ورىنباسارى نىعمەدجان ماقاجانوۆ, قازاقستانداعى بىرىككەن ۇلتتار ۇيىمىنىڭ دامۋ باعدارلاماسىنىڭ ۇيلەستىرۋشىسى ۆيكتوريا بايعازينا, قر يدم يندۋستريالدى دامۋ جانە ونەركاسىپتىك قاۋىپسىزدىك كوميتەتىنىڭ وكىلدەرى مەن بۇۇدب ساراپشىلارى جانە مەنەدجەرلەرى قاتىستى.
«تومەن كومىرتەكتى دامۋعا ارنالعان تۇراقتى قالالار» سياقتى وزەكتى جوبالاردى جۇزەگە اسىرۋ − ۇلكەن جانە شاعىن قالالارداعى تۇراقتىلىقتى ساقتاپ, ەنەرگوتيىمدى قالا ينفراقۇرىلىمىنا ينۆەستيتسيا تارتىپ قانا قويماي, قازاقستاننىڭ ءىجو-ءنىڭ ەنەرگيا سىيىمدىلىعىن تومەندەتۋ بويىنشا مىندەتتەردى ورىنداپ, «جاسىل» ەكونوميكاعا وتۋىنە دە ىقپال ەتەدى», − دەدى توراعا ورىنباسارى ن. ماقاجانوۆ.
2018 جىلدىڭ ءبىرىنشى توقسانى سوڭىندا استانا جانە سولتۇستىك قازاقستان وبلىستارىنىڭ عيماراتتارىندا ەنەرگيا تۇتىنۋدى ازايتۋعا باعىتتالعان العاشقى التى جوبا ماقۇلداندى.
جوبالاردىڭ ءبىرى – «Transport Tower» اكىمشىلىك-تەحنولوگيالىق كەشەنى عيماراتىنىڭ جارىقتاندىرۋ جۇيەسىن جاڭعىرتۋ جانە پايدالانۋ» مەملەكەت-جەكەمەنشىك سەرىكتەستىك جوباسى. ونىڭ اياسىندا مينيسترلىك عيماراتىنىڭ جارىقتاندىرۋىن جاڭعىرتۋ جوسپارلانعان.
سۇڭعات ءالىپباي, «ەگەمەن قازاقستان»