قۇرمەتتى نۇرسۇلتان ءابىش ۇلى!
ءسىزدىڭ تۋعان كۇنىڭىزدىڭ استانا قالاسىنىڭ 20 جىلدىق مەرەيتويىمەن تۇسپا-تۇس كەلۋى كەزدەيسوق وقيعا ەمەس. ءسىز جاڭا قازاقستاننىڭ باستى ارحيتەكتورىنا, ەجەلگى مەكەندە بولاشاققا قارىشتاپ قادام باسقان جاڭا قالا سالعان تۇلعاعا اينالدىڭىز.
وتانىڭىزدا ءومىر سۇرەتىن كوپەتنوستى قازاقستان حالقىنىڭ ارمان-تىلەگىن تەرەڭىنەن تۇسىنەتىنىڭىز انىق. وسى ءبىر تۇسىنىستىك ءسىزدىڭ تاريحي باستامالارىڭىزدى جۇزەگە اسىرۋعا كومەكتەستى. 1980-ءشى جىلداردىڭ ورتاسىندا قازاق كسر-ءى ۇكىمەتىنىڭ توراعاسى رەتىندە وتانداستارىڭىزدىڭ سەنىمىنە يە بولىپ, بەدەلىڭىزدىڭ ارقاسىندا رەسپۋبليكاداعى ازاماتتىق بەيبىتشىلىكتى ساقتاپ قالدىڭىز. مۇنى جوعارى باعالاعان جەرلەستەرىڭىز اۋەلى ءسىزدى قازاق كسر-ءنىڭ, كەيىننەن تاۋەلسىز قازاقستاننىڭ پرەزيدەنتى ەتىپ سايلادى.
XX عاسىردىڭ 90-شى جىلدارى جاڭا مەملەكەتتىڭ قالىپتاسۋ كەزەڭىندە سىزبەن تانىسۋدىڭ ءساتى تۇسكەن بولاتىن. ءسىزدىڭ بەدەلىڭىز ورتاق پىكىر ۇستاناتىنداردى جيناپ, قازاقستاننىڭ ەكونوميكاسى مەن الەۋمەتتىك ومىرىندە تۇبەگەيلى وزگەرىستەر جاساۋعا سەپ بولدى. سىزگە حالىق سەندى جانە سەنە بەرەدى. ءسىزدىڭ ستراتەگيالىق ماقساتتاردى كۇندەلىكتى ءومىردىڭ قاجەتتىلىكتەرىمەن قاتار قوياتىن كورەگەندىگىڭىزدى جوعارى باعالايدى. ءسىز حالىقتى وزىڭىزگە سەندىرە الاسىز جانە سوڭىڭىزدان ەرتەتىن قابىلەتكە يەسىز. وسى ءبىر ناعىز كوشباسشىعا ءتان قاسيەتىڭىز قازىرگى قازاقستاندى قالىپتاستىرىپ, زاماناۋي قالا قۇرىلىسىنىڭ جاقۇتىنا اينالعان, الەمنىڭ ەڭ ادەمى قالالارىنىڭ ءبىرى – استانا شاھارىن سالۋعا جاعداي جاسادى.
م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە جاساعان اتاقتى بايانداماڭىزدا مەملەكەتتەر مەن حالىقتاردىڭ ەۋرازيالىق ەكونوميكالىق وداعىن قۇرۋ تۋرالى باستاما كوتەرگەنىڭىز ءالى ەسىمىزدە. بۇگىندە دامۋدىڭ وسى ماڭىزدى تۇجىرىمداماسى شىندىققا اينالىپ, ەلدەرىمىزدىڭ كەلەشەگىن انىقتاپ كەلەدى. وسى قوعامداستىقتىڭ نەگىزى رەتىندە قازاقستان مەن رەسەيدىڭ وداعى ساياسي جانە ەكونوميكالىق بايلانىستارمەن عانا ەمەس, دوستىقپەن, رۋحاني جانە تۋىستىق قارىم-قاتىناسپەن بەكىگەن. رەسەي فەدەراتسياسىنىڭ پرەزيدەنتى ۆلاديمير پۋتينمەن قارىم-قاتىناسىڭىز وسىعان دالەل.
استانا قالاسىنىڭ مەرەيتويى مەن ءسىزدىڭ تۋعان كۇنىڭىزدى قازاقستاندا عانا ەمەس, ءسىزدى جانە قازاقستان مەن حالىقتارىمىزدىڭ يگىلىگى ءۇشىن اتقارعان قىزمەتىڭىزدى جوعارى باعالايتىن رەسەيدە دە اتاپ وتەدى.
سىزگە جانە بارشا قازاقستان حالقىنا گۇلدەنۋ, اماندىق, باقىتتى ءومىر تىلەيمىن!
ميحايل شۆىدكوي, رەسەي فەدەراتسياسى پرەزيدەنتىنىڭ حالىقارالىق مادەني قاتىناستار بويىنشا ارنايى وكىلى