ەلوردادا مەملەكەت باسشىسى نۇرسۇلتان نازارباەۆتىڭ قاتىسۋىمەن «استانا» حالىقارالىق قارجى ورتالىعىنىڭ رەسمي اشىلۋ سالتاناتى بولىپ ءوتتى. ايتۋلى شاراعا ەلۋدەن استام مەملەكەت پەن حالىقارالىق ۇيىمداردىڭ وكىلدەرى قاتىستى. ولاردىڭ قاتارىندا ءابۋ-ءدابيدىڭ تاق مۇراگەرى, ءباا قارۋلى كۇشتەرى جوعارعى باس قولباسشىسىنىڭ ورىنباسارى شەيح مۇحاممەد بەن زايد ءال ناھايان جانە تاتارستان پرەزيدەنتى رۋستام ميننيحانوۆ بار.
الدىمەن قازاقستان پرەزيدەنتى وتاندىق جانە شەتەلدىك كومپانيالاردىڭ تسيفرلى تەحنولوگيالار كورمەسىن ارالاپ كورىپ, تسيفرلى-قارجىلىق تەحنولوگيالار سالاسىنداعى يننوۆاتسيالىق ازىرلەمەلەرمەن تانىستى.
ءىس-شاراعا قاتىسۋشىلار الدىندا سويلەگەن سوزىندە نۇرسۇلتان نازارباەۆ بارشا جۇرتتى «استانا» قارجى ورتالىعىنىڭ رەسمي تۇردە اشىلۋىمەن قۇتتىقتادى.
– ءبىز استانا ءۇشىن وسىناۋ اۋقىمدى ءارى ماڭىزدى شاراعا كوڭىلىمىز ەرەكشە تولقىپ, زور قۋانىشپەن كەلىپ وتىرمىز. قازاقستان – عاسىرلار توعىسىندا كەڭ دالادا اسەم استانا تۇرعىزعان الەمدەگى جالعىز مەملەكەت. «استانا» حالىقارالىق قارجى ورتالىعى – تاۋەلسىز قازاقستان تاريحىنىڭ جاڭا كەزەڭىنىڭ باستاۋى, دەدى نۇرسۇلتان نازارباەۆ.
مەملەكەت باسشىسى قازاق ەلىنىڭ كەمەل كەلەشەگىن قالىپتاستىرۋدا ەكونوميكالىق تۇراقتىلىققا باعىتتالعان شارالاردىڭ جۇيەلى تۇردە اتقارىلىپ وتىرعانىن, ءوز كەزەگىندە «استانا» قارجى ورتالىعىنىڭ اشىلۋى جاھاندىق دەڭگەيدەگى ءىرى بيزنەس ورتالىقتاردىڭ ەل ەكونوميكاسىنىڭ دامۋىنا جوعارعى دەڭگەيدە باعا بەرۋىنە, سەنىم بىلدىرۋىنە نەگىز بولعانىن ايتتى.
– «استانا» حالىقارالىق قارجى ورتالىعى − تاۋەلسىز قازاقستاننىڭ جاڭا پاراعى. ونىڭ اشىلۋى ماڭىزدى قادام, ءبىزدىڭ ەكونوميكانىڭ بەكەم تۇردە دامۋىنىڭ جالعاسى بولماق. جاھاندىق سىن-تەگەۋرىندەرگە جاۋاپ رەتىندە احقو-نى قۇرۋ تۋرالى يدەيانى ەڭ العاش 2015 جىلى ايتقان ەدىم, دەدى نۇرسۇلتان نازارباەۆ.
مەملەكەت باسشىسى ءوز سوزىندە قازىرگى تاڭدا قازاقستاندا اۋقىمدى قۇرىلىمدىق جانە ينستيتۋتسيونالدىق رەفورمالاردىڭ ءساتتى جۇزەگە اسىرىلىپ جاتقانىن, ونىڭ باسەكەگە قابىلەتتىلىگىن ارتتىرۋعا, دامىعان 30 ەلدىڭ قاتارىنا قوسىلۋعا باعىتتالعانىن مالىمدەدى. سونداي-اق احقو قۇرماس بۇرىن, الەمدەگى وزىق قارجى ورتالىقتارىنىڭ تاجىريبەسى نەگىزگە الىنعانىن دا ايتتى.
– قارجى ورتالىعىنىڭ قازاقستاندىق مودەلى الەمدىك قارجى قۇرىلىمدارى قىزمەتتەرىنىڭ ەڭ ۇزدىك تاجىريبەلەرىن باسشىلىققا العان. بۇل ورتالىق قازاقستان رەسپۋبليكاسىنىڭ رەزيدەنتتەرىمەن دە, رەزيدەنت ەمەس سۋبەكتىلەرمەن دە جۇمىس ىستەيتىن بولادى. «استانا» حالىقارالىق قارجى ورتالىعىنىڭ قىزمەتىنە قاتىسۋشىلار قازاقستان مەن ونىڭ وڭىرلەرىنىڭ عانا ەمەس, سونداي-اق بۇكىل الەمنىڭ كاپيتالىنا قول جەتكىزە الادى, دەدى ەلباسى.
پرەزيدەنت بۇعان قوسا, «استانا» حالىقارالىق قارجى ورتالىعىنا حالىقارالىق قاتىسۋشىلاردى تارتۋعا بارلىق جاعدايلار جاسالعانىن, ورتالىقتىڭ قۇقىقتىق مارتەبەسى زاڭ اياسىندا بەكىتىلگەنىن, ونىڭ رەسمي ءتىلى اعىلشىن ءتىلى ەكەنىن ايتتى.
– «استانا» حالىقارالىق قارجى ورتالىعىنىڭ قىزمەتىنە قاتىسۋشىلارعا 50 جىلعا دەيىن سالىقتىق جەڭىلدىكتەر, سونداي-اق جەڭىلدەتىلگەن ۆاليۋتا, ۆيزا جانە ەڭبەك رەجىمدەرى قاراستىرىلعان. احقو اعىلشىن قۇقىعىنا نەگىزدەلگەن بىرەگەي ورتالىققا اينالدى. وندا تاۋەلسىز سوت پەن حالىقارالىق اربيتراج ورتالىعى ادىلەتتى بولۋعا جانە تاراپتاردىڭ قۇقىقتارىن ساقتاۋعا كەپىلدىك بەرەدى, دەدى نۇرسۇلتان نازارباەۆ.
سونىمەن بىرگە ەلباسى «استانا» حالىقارالىق قارجى ورتالىعى بيرجاسىنىڭ قىزمەتىنە دە توقتالىپ ءوتتى.
– قازىرگى ۋاقىتتا «استانا» حالىقارالىق قارجى ورتالىعىنىڭ بيرجاسىندا اكتيۆتەرىنىڭ جالپى كولەمى 34 ميلليارد دوللار بولاتىن 14 جەرگىلىكتى جانە حالىقارالىق بروكەرلەر بار. بۇل كورسەتكىش الداعى ۋاقىتتا ارتا بەرەدى, دەدى مەملەكەت باسشىسى.
بۇل رەتتە, بيىل ورتالىق اياسىندا يسلامدىق قۇندى قاعاز – «سۋكۋكتى» شىعارۋ جوسپارلانىپ وتىرعانى دا بەلگىلى بولدى.
– «استانا» حالىقارالىق قارجى ورتالىعى قىزمەتىنىڭ ماڭىزدى سالاسى – يننوۆاتسيالىق قارجى تەحنولوگيالارىن دامىتۋ ءۇشىن ءتيىمدى ورتا قالىپتاستىرۋ. جاڭا قارجى تەحنولوگيالىق ونىمدەردى سىناقتان وتكىزۋگە مۇمكىندىك بەرەتىن «رەتتەۋشى sandbox» جۇمىس ىستەيتىن بولادى. كاپيتال نارىقتارىن دامىتۋ جانە جەكە تۇلعالاردىڭ قارجىسىن باسقارۋ دا «استانا» حالىقارالىق قارجى ورتالىعىنىڭ باسىمدىعى بولىپ سانالادى, دەدى قازاقستان پرەزيدەنتى.
مەملەكەت باسشىسى, سونىمەن قاتار «استانا» حالىقارالىق قارجى ورتالىعىنىڭ تۇساۋكەسەر ءراسىمىن استانا مەرەيتويى قارساڭىندا وتكىزۋدىڭ سيمۆولدىق ءمانى بار ەكەنىن اتاپ ءوتتى.
– استانا ەۋرازيالىق كەڭىستىكتىڭ مويىندالعان ورتالىعىنا اينالدى جانە قازىرگى زاماننىڭ ەڭ وزەكتى دەگەن ماسەلەلەرى جونىندە حالىقارالىق تۇسىنىستىكتى قالىپتاستىرۋدا ۇلكەن ءرول اتقارادى. مۇندا بيزنەس قارقىندى دامىپ كەلەدى, شامامەن 100 مىڭعا جۋىق كاسىپكەرلىك سۋبەكتىلەر جۇمىس ىستەيدى. سونىمەن بىرگە ەلوردادا تەحنولوگيالىق جانە مەيلىنشە جايلى تىرشىلىك ورتاسىن قالىپتاستىرۋعا باعىتتالعان «اقىلدى قالا» تۇجىرىمداماسى جۇزەگە اسىرىلۋدا, دەدى نۇرسۇلتان نازارباەۆ.
جاڭادان قۇرىلعان ەكسپات ورتالىعى جۇمىسىنىڭ ەرەكشەلىكتەرىنە توقتالعان ەلباسى, ورتالىقتىڭ ۆيزالىق كوشى-قون, سالىق, سونداي-اق حالىققا قىزمەت كورسەتۋ جانە اكىمشىلىك پوليتسيا قىزمەتتەرىنىڭ ءبىر ورتالىقتان قولجەتىمدى بولۋىن قامتاماسىز ەتەتىنىن تىلگە تيەك ەتتى. وندا الەمنىڭ جەتەكشى قارجى ينستيتۋتتارىنىڭ وكىلدىكتەرى اشىلعانىن, مۇمكىندىكتەر مەن رەسۋرستاردىڭ بارلىعى «استانا» حالىقارالىق قارجى ورتالىعىنىڭ ءتيىمدى جۇمىس ىستەۋىنە جاعداي جاسايتىنىن جەتكىزدى.
مەملەكەت باسشىسى شەتەلدىك ينۆەستورلار مەن وتاندىق كاسىپكەرلەردى حالىقارالىق قارجى ورتالىعىنىڭ قىزمەتىن پايدالانۋعا شاقىردى. ەلباسى نۇرسۇلتان نازارباەۆتىڭ سوزىنەن كەيىن جيىندى جۇرگىزۋشى مودەراتور دەنيەل ەرگين پرەزيدەنت پەن قازاقستان حالقىن استانانىڭ 20 جىلدىق مەرەيتويىمەن قۇتتىقتايتىندىعىن ايتتى. سونان كەيىن حالىقارالىق ۆاليۋتا قورىنىڭ ديرەكتورى كريستين لاگارد حانىمنىڭ استانا حالىقارالىق قارجى ورتالىعىنىڭ (احقو) اشىلۋىنا بايلانىستى جولداعان قۇتتىقتاۋ حاتىن وقىپ بەردى. كريستين لاگارد حاتىندا جاڭا حالىقارالىق قارجى ورتالىعىنىڭ قازاقستان مەن ول ورنالاسقان ءوڭىر ءۇشىن كاپيتال نارىقتارىن دامىتۋ مەن تەرەڭدەتۋ جانە ينۆەستيتسيالار تارتۋ ءۇشىن تاماشا الاڭ بولىپ تابىلاتىندىعىن اتاپ كورسەتىپتى. نارىق ءۇشىن اشىق, سەنىمدى جانە قولايلى نورماتيۆتىك بازا, زاماناۋي ينفراقۇرىلىم جانە قۋاتتى ادام كاپيتال بۇل ورتالىققا وڭىرلىك حابقا اينالۋ مۇمكىندىگىن بەرەتىندىگىن جەتكىزگەن.
استانا حالىقارالىق قارجى ورتالىعىن قۇرۋ يدەياسىن العاشقىلار قاتارىندا قولداپ قانا قويماي, سونىمەن قاتار وعان بارىنشا كونسۋلتاتيۆتىك جانە تەحنيكالىق كومەك كورسەتكەن دامۋ ينستيتۋتتارىنىڭ ءبىرى – ەۋروپالىق قايتا قۇرۋ جانە دامۋ بانكى. وسى بانكتىڭ باسشىسى, احقو-نى باسقارۋ كەڭەسىنىڭ مۇشەسى سۋما چاكرابارتيدەن دە قۇتتىقتاۋ بەينە-جولداۋى كەلىپ تۇسكەن. وندا ەقدب باسشىسى استانا حالىقارالىق قارجى ورتالىعىن ءوڭىر بويىنشا وتە ءورشىل جوبا رەتىندە باعالاپتى. بۇل جوبانىڭ ىسكە اسۋى كورپوراتيۆتىك باسقارۋدى ەنگىزۋگە, قارجى قىزمەتىنىڭ جاڭا ستاندارتتارىن مەڭگەرۋگە, ءبىرىنشى سىنىپتى كومپانيالاردى جەكەشەلەندىرۋگە جاقسى جول اشاتىندىعىن مالىمدەگەن. ەقدب-نىڭ وسى باعىتتا قازاقستان ۇكىمەتىنە قولداۋ ءبىلدىرىپ كەلە جاتقاندىعىنا توقتالىپ, سوڭعى جىلدارداعى ونىڭ جەتىستىكتەرىنە وڭ باعا بەرگەن.
احقو-نىڭ الدىنا قويعان ءبىر ماقساتى – يسلامدىق قارجىلاندىرۋدىڭ وڭىرلىك حابى بولۋ ەكەندىگى بەلگىلى. وسىعان وراي ونىڭ جانىنان يسلامدىق قارجىلاندىرۋ بويىنشا حالىقارالىق ساراپشىلار كەڭەسى قۇرىلىپ وتىر. جيىندا ءسوز العان يسلام دامۋ بانكى توپتارىنىڭ پرەزيدەنتى دوكتور باندار حادجار استانا قارجى ورتالىعىنىڭ اشىلۋىمەن ەل باسشىسى نۇرسۇلتان نازارباەۆتى قۇتتىقتاۋ وزىنە زور مارتەبە ەكەندىگىن ايتتى. ول جاڭا حالىقارالىق قارجى ورتالىعىنىڭ پايدا بولۋىن تەك قازاقستان ەمەس, الەمدىك قارجى جۇيەسى ءۇشىن دە ۇلكەن جەتىستىك رەتىندە باعالادى. سونىمەن قاتار بۇل قارجى ورتالىعىنىڭ استانانىڭ 20 جىلدىعىمەن تۇسپا-تۇس كەلۋىنىڭ ۇلكەن سيمۆولدىق ءمانى بارلىعىن جەتكىزدى. ونىڭ ايتۋىنشا جاڭا ەلوردا پايدا بولعاننان بەرى قالانىڭ ىشكى جالپى ءونىمىنىڭ كولەمى 190 ەسە كوبەيگەن. ادامدار جىل سايىن قالاعا اعىلىپ كوشىپ كەلىپ جاتقاندىعىنا قاراماستان, ونداعى جۇمىسسىزدىق دەڭگەيى 3 ەسە قىسقارعان. بۇل – زور جەتىستىك. مەيمان وسىلاي دەي كەلە, جاڭا ورتالىقتا قۇرىلاتىن يسلامدىق قۇرىلىمداردى قولداۋعا وزدەرىنىڭ بارلىق كۇش-جىگەرلەرىن جۇمسايتىندىقتارىن, وسىنىڭ ناتيجەسىندە جانە قازاقستاننىڭ دامۋ ەكپىنىمەن احقو-نىڭ يسلامدىق قارجىلاندىرۋدىڭ وڭىرلىك حابى رەتىندە تەزدەتىپ قالىپتاسۋىنا جاقسى مۇمكىندىكتەر قالىپتاساتىندىعىن مالىمدەدى.
ارينە احقو سەكىلدى ءىرى قارجى جوباسىن ىسكە قوسۋدىڭ وڭاي بولماعانى تۇسىنىكتى. سالتاناتتى جيىندى جۇرگىزگەن دەنيەل ەرگيننىڭ پىكىرىنشە, يدەيادان باستاپ بۇل وڭىردە بۇرىن-سوڭدى بولماعان حالىقارالىق قارجى ورتالىعىن ومىرگە اكەلۋگە دەيىنگى ءجۇرىپ وتكەن جول شەتەلدىك ارىپتەستەر تاراپىنان سەنىم مەن قۇرمەتكە ابدەن لايىق. ال بۇل يدەيا قالاي باستالىپ, قالاي ىسكە اسۋ بيىگىنە كوتەرىلگەن ەدى. وسىعان وراي سالتاناتتى تۇساۋكەسەر جيىنىنا قاتىسۋشىلارعا «يدەيادان ىسكە اسۋعا دەيىن» اتتى بەينەبايان كورسەتىلدى.
وسىدان كەيىن ءسوز العان JPMorgan Chase International كومپانياسىنىڭ باسقارما توراعاسى دجەيكوب فرەنكەل استانانى الەم بويىنشا ەڭ جەدەل دامۋشى قالالاردىڭ ءبىرى دەپ اتادى. ارينە استانانى كوشىرۋ كەزىندە ءتۇرلى كەدەرگىلەردىڭ بولعانى انىق. ەندى استانا حالىقارالىق قارجى ورتالىعىن وركەندەتۋ ىسىندە دە ءتۇرلى پروبلەمالاردىڭ كەزدەسەتىندىگىن دە جوققا شىعارۋعا بولماس. ويتكەنى ۇلكەن يدەيالاردىڭ قاي-قايسىسى وڭايلىقپەن جۇزەگە اسپاعان. بىراق قازىر ءبىر ماسەلە ايقىن: الەم كارتاسىندا جاڭا استانا پايدا بولعان وسىدان جيىرما جىل ۋاقىت بۇرىن الەمدى ناقتى كاپيتال باسقارىپ كەلسە, قازىر بۇل جاعداي وزگەرىپ, ەندى الەم يدەيالاردىڭ باسقارۋىنا قاراي ويىستى. سوندىقتان ەڭ جەدەل دامۋشى قالالاردىڭ بىرىندە حالىقارالىق قارجى ورتالىعىنىڭ پايدا بولۋىنىڭ دا ءوز زاڭدىلىعى بار سەكىلدى. وسىلاي دەپ وي تولعاعان اتاقتى مورگان بانكىنىڭ باسشىسى جاڭا ورتالىقتىڭ تابىستى جۇمىس ىستەپ كەتۋى ءۇشىن ەڭ ءبىرىنشى وعان دەگەن سەنىمدىلىك پەن اشىق جۇمىس ءتارتىبىنىڭ قاجەت بولاتىندىعىن, ۇشىنشىدەن ونىڭ قىزمەتىن دانالىقپەن رەتتەپ وتىرۋدىڭ مول تابىستارعا باستايتىندىعىن اتاپ كورسەتتى. وسى رەتتە ۇلكەن ىستەردى جۇزەگە اسىرىپ جاتقان ۇلى قازاقستان ەلىنە ساتتىلىك تىلەدى.
Boston Consulting Group باسقارما توراعاسى حانس-پول بيۋركنەر جاڭا قۇرىلىپ وتىرعان حالىقارالىق قارجى ورتالىعىنا اعىلشىندىق قۇقىق قاعيداتىنىڭ ەنگىزىلۋى ونى تابىسقا باستايتىن, ينۆەستورلار سەنىمدىلىگىن وياتاتىن باتىل شەشىم ەكەندىگىن اتاپ ءوتتى. وعان اقش-تىڭ NASDAQ, كىتايدىڭ شانحاي قارجى ورتالىقتارىنىڭ قولداۋ كورسەتۋى دامۋدىڭ وزىندىك ءبىر كەپىلىنە اينالماق. دەمەك بۇل جاڭا قارجى ورتالىعى قازاقستان دامۋىنا قوسىمشا سەرپىن بەرەدى دەگەن پىكىرىن ءبىلدىردى.
ءسوز كەزەگىن العان «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ «استانا» قارجى ورتالىعىنىڭ قۇرىلىپ, سەنىمدى دامۋىنا قىتايدىڭ ء«بىر بەلدەۋ – ءبىر جول» جوباسىنىڭ قوسىمشا سەرپىن بەرۋى ءتيىس دەگەن ءۇمىتىن جەتكىزدى.
قايرات كەلىمبەتوۆتىڭ ايتۋىنشا, ەلباسى استانادان جاڭا حالىقارالىق قارجى ورتالىعىن اشۋ نيەتى بارلىعىن نيۋ-يورك پەن لوندوندا ءىرى بيزنەسمەندەرمەن كەزدەسۋىندە مالىمدەگەن كەزىندە بۇل ءىستىڭ جۋىق ماڭدا جۇزەگە اسا قويۋىنا سەنىمسىزدىك تە بىلدىرىلگەن ەدى. بىراق قازاقستان پرەزيدەنتى ءوز سوزىندە تۇردى. كوپ كۇش-جىگەرمەن اقىرى مىنە ونى اشاتىن كەز دە جەتتى.
وتكەن جىلى عانا استانادا ەكسپو حالىقارالىق كورمەسى تابىسپەن وتكەن بولاتىن. كورمە وتكەن الاڭدا ەندى مىنە حالىقارالىق قارجى ورتالىعى ورنالاسىپ وتىر. وسىنىڭ ءوزى تابىسقا قول جەتكىزۋدىڭ ۇزدىكسىزدىگى مەن جاڭا يدەيالارمەن جالعاسۋشىلىعىن بىلدىرسەك كەرەك. ەكسپو-نىڭ قازاقستاندا وتۋىنە جاردەم كورسەتكەن ەلباسىنىڭ دوسى, حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەس استانادا وتكەن ەكسپو-نىڭ شىن دا ادال نيەت جەتەگىندە تىڭ جەردەن ءورىس الىپ, تولىمدى تابىسقا جەتكەندىگىن, ەندى ونىڭ جالعاسىنداي «استانا» قارجى ورتالىعىنىڭ قۇرىلىپ, ءوز ءىسىن باستاعالى وتىرعاندىعىن اتاپ كورسەتكەن. ول استانانى ينۆەستيتسيالىق رۋحتىڭ كەرنەپ تۇرعاندىعىن ايتقان. دەمەك كەزىندە حالىقارالىق كورمەنى وتىزەتىن ورىن رەتىندە استانانىڭ تاڭدالۋىنىڭ ءوزى بەكەر ەمەس. سولاي دەي كەلە جاڭا قارجى ورتالىعىنىڭ تابىسقا جەتەتىندىگىنە سەنىم بىلدىرگەن.
«جىبەك جولى» قورىنىڭ پرەزيدەنتى ۆان يانچجي قۇتتىقتاۋ سوزىندە قىتاي ليدەرى سي ءتسزينپيننىڭ ء«بىر بەلدەۋ-ءبىر جول» جوباسىن حالىقارالىق قاۋىمداستىق الدىندا ەڭ العاش وسى استاناعا كەلگەن ساپارى كەزىندە مالىمدەگەندىگىن ەسكە الدى. وزدەرىنىڭ قازاقستاننىڭ «نۇرلى جول» باعدارلاماسىن جۇزەگە اسىرۋعا بارىنشا قولداۋ كورسەتەتىندىكتەرىن جەتكىزدى.
مودەراتور ءسوز كەزەگىن احقو بيرجاسى باسقارماسىنىڭ توراعاسى تيم بەننەتكە بەردى. ول وزدەرىنىڭ نەگىزگى مىندەتى ينۆەستورلاردى بيرجاعا تارتۋ, ەكوجۇيەنى قۇرۋ, بيرجانىڭ تارتىمدىلىعىن قامتاماسىز ەتۋ ەكەندىگىن اتاپ ءوتتى.
سونداي-اق اقش-تاعى NASDAQ توراعاسىنىڭ ورىنباسارى مەيەر سەندي فرۋچەرا مەن شانحاي قور بيرجاسى باقىلاۋشىلار كەڭەسىنىڭ توراعاسى پان سيۋەسيان دە قازاقستان باسشىلىعى مەن حالقىن «استانا» حالىقارالىق قارجى ورتالىعىنىڭ اشىلۋىمەن قۇتتىقتاپ, ونىڭ جۇمىسىنا ءسات ساپار تىلەدى. سالتاناتتى شارا سوڭىندا ەلباسى نۇرسۇلتان نازارباەۆ «استانا» حالىقارالىق قارجى ورتالىعىنىڭ رەسمي قىزمەتىن ارنايى گونگ سوعۋ ارقىلى ىسكە قوستى.
مەملەكەت باسشىسى «استانا» حالىقارالىق قارجى ورتالىعىنىڭ بارلىق ارىپتەستەرىنە بەلسەندى قولداۋى مەن ورتالىقتى قۇرۋ ىسىنە اتسالىسقانى ءۇشىن زور ريزاشىلىعىن ءبىلدىردى.
– ۇزاق ۋاقىت كۇتكەن ءساتتىڭ تۋىمەن قۇتتىقتايمىن, وسىدان باستاپ ءبىزدىڭ حالىقارالىق قارجى ورتالىعىمىز قىزمەتىنە كىرىستى. بۇل تاريح ءۇشىن قاس-قاعىم ءسات. ءبىزدىڭ حالقىمىز بولاشاق گۇلدەنۋ جولىندا ۇلكەن قادام جاسادى دەپ ويلايمىن. «استانا» حالىقارالىق قارجى ورتالىعى دا وسى ماقساتقا قىزمەت ەتەتىندىگىنە ءۇمىت ارتامىز. ول وڭىردەگى نەگىزگى قارجى حابىنا اينالىپ, كەلەشەكتە ازيانىڭ جەتەكشى قارجى ورتالىقتارىنىڭ قاتارىنا قوسىلۋى كەرەك, – دەدى نۇرسۇلتان نازارباەۆ.
سۇڭعات ءالىپباي, ەركەجان ايتقازى, «ەگەمەن قازاقستان»