اقتوبە ايماعىندا استانانىڭ 20 جىلدىق بيىك بەلەسى قۇرمەتىنە 35 الەۋمەتتىك, وندىرىستىك جانە ساۋدا عيماراتتارى مەن نىساندارى پايدالانۋعا بەرىلدى. اتالعان قۇرىلىستاردى جۇرگىزۋگە تارتىلعان تازا ينۆەستيتسيانىڭ كولەمى ون بەس ميللياردقا جۋىق. سونداي-اق ەلورداعا تارتۋ رەتىندە وبلىس تۇرعىندارىنىڭ يگىلىگىنە بەرىلگەن نىسانداردىڭ تەڭ جارتىسىنا جۋىعى مەملەكەت-جەكەمەنشىك ارىپتەستىگى اياسىندا بوي كوتەرگەن. وسى ارقىلى 350 جاڭا جۇمىس ورنىنىڭ اشىلۋىنا مۇمكىندىك تۋىپ وتىر.
وڭىردە استانانىڭ 20 جىلدىعى قۇرمەتىنە اشىلعان نىسانداردىڭ بىرقاتارى وبلىس اۋداندارىنىڭ ۇلەسىنە تيەدى. اتاپ ايتقاندا ولاردىڭ قاتارىن ورتا مەكتەپ عيماراتتارى, ستاديوندار, زاماناۋي ۇلگىدەگى سپورت پەن ويىن الاڭدارى, فەلدشەرلىك-اكۋشەرلىك جانە مەديتسينالىق قوسىندار, سونداي-اق ءدارىحانالار قۇرايدى. وسىناۋ سان الۋان وزگەرىستەر مەن جاڭالىقتاردىڭ بارىنە بىردەي كۋا بولۋ, ءبارىنىڭ باسى-قاسىنان تابىلۋ مۇمكىن بە؟ البەتتە مۇمكىن ەمەس.
ايتسە دە استانانىڭ 20 جىلدىعى قۇرمەتىنە حرومتاۋ اۋدانىنداعى ءدوڭ اۋىلىندا 800 بالاعا ارنالعان ورتا مەكتەپتىڭ اشىلۋى مەن ءدوڭ-تاۋ كەن بايىتۋ كومبيناتىنىڭ جۇمىسشىلارىنا ارنالعان 120 پاتەرلىك تۇرعىن ءۇيدىڭ پايدالانۋعا بەرۋ راسىمىنە قاتىسۋدىڭ ءساتى تۇسكەن-ءدى. وسىنداي قۋانىشتى ساتتە اقتوبە وبلىسىنىڭ اكىمى بەردىبەك ساپارباەۆ وتكەن جىلى وڭىردە 14 ورتا مەكتەپ عيماراتى پايدالانۋعا بەرىلگەنىن, ال بيىل 26 مەكتەپتىڭ قۇرىلىسى قىزۋ ءجۇرىپ جاتقانىن اتاپ ءوتتى. ونىڭ باسىم بولىگىنىڭ قۇرىلىسى جىل اياعىنا دەيىن اياقتالماق. سونىڭ ىشىندە حرومتاۋ اۋدانىنداعى ءدوڭ اۋىلىندا جوبالىق قۇنى 1 ميلليارد 400 ملن تەڭگە قۇرايتىن مەكتەپ عيماراتىنىڭ پايدالانۋعا بەرىلۋى – ەلوردانىڭ 20 جىلدىعىمەن تۇسپا تۇس كەلىپ وتىر. مۇنىڭ ەلەۋلى نىشاندىق ءمانى بار.
ءبىر بىرىمەن گارپى ۇلگىسىندە تۇيىسكەن قوس وقۋ كورپۋسىنان تۇراتىن ءبىلىم شاڭىراعىندا بارلىق قاجەتتى جاعدايلار بار. مۇنداعى بارلىق كابينەتتەر كەڭ جولاقتى ينتەرنەت جەلىسىنە قوسىلعان. سونداي-اق قوس سپورت زالى مەن مۋلتيمەديالىق بولمەلەرى دە جان-جاقتى جابدىقتالعان. ال مەكتەپتىڭ ات شاپتىرىم اۋلاسىندا فۋتبول, باسكەتبول جانە تەننيس الاڭدارى جاساقتالعان.
جوعارىدا ايتىلعان ءدوڭ-تاۋ كەن بايىتۋ كومبيناتىنىڭ جۇمىسشىلارىنا ارنالعان 120 پاتەرلىك بەس قاباتتى تۇرعىن ءۇي «نۇرلى جەر» مەملەكەتتىك باعدارلاماسى اياسىندا بوي كوتەرگەن. ءدال وسى كۇنى حرومتاۋدا اتا-اناسىنىڭ قامقورلىعىنسىز قالعان جاسوسپىرىمدەرگە 12 ميللليون تەڭگەنىڭ سەرتيفيكاتى تابىس ەتىلدى. اتالعان قاراجات ۇلكەن ومىرگە قادام باسقالى وتىرعان جاس ورەندەردىڭ بانكىدە اشىلعان ەسەپشوتتارىنا اۋدارىلماق.
مىنە وسىلايشا اقتوبە ايماعىندا استانا كۇنى قۇرمەتىنە تابانى كۇرەكتەي 35 نىسان پايدالانۋعا بەرىلدى. بۇل مەيلىنشە قوماقتى تارتۋ ەكەنى انىق.
تەمىر قۇسايىن