بۇگىن ۇكىمەت ۇيىندە قر پرەمەر-ءمينيسترى باقىتجان ساعىنتاەۆ باسقارما توراعاسى اگريس پرەيمانيس باستاعان «شەتەلدىك ينۆەستورلار كەڭەسىنىڭ قازاقستاندىق اسسوتسياتسياسىنىڭ» (شيك قا) باسقارما مۇشەلەرىمەن كەزدەسۋ وتكىزدى, دەپ حابارلايدى primeminister.kz.
كەزدەسۋ بارىسىندا شەتەلدىك ينۆەستورلار كەڭەسىنىڭ 31-پلەنارلىق وتىرىسىن وتكىزۋدىڭ قورىتىندىلارى شىعارىلىپ, مەملەكەت, قوعام جانە بيزنەس ءۇشىن زاماناۋي سىن-تەگەۋرىندەردىڭ وزەكتىلىگىن قوسا العاندا, قازاقستاننىڭ ادام كاپيتالىن دامىتۋ ماسەلەلەرى تالقىلاندى.
قر-داعى «كناۋف» كومپانياسىنىڭ توراعاسى ديميتري پروپپ بىلىكتى مامانداردى دايارلاۋ باعدارلاماسى رەتىندە قوسارلى ءبىلىم بەرۋدى ودان ءارى دامىتۋ پەرسپەكتيۆالارى تۋرالى ايتىپ بەردى. «بەيكەر جانە ماكەنزي» بولىمشەسىنىڭ ديرەكتورى كۋرتيس ماستەرس پەن «ەرنست ەند يانگ» كومپانياسىنىڭ قازاقستان جانە ورتالىق ازيا بويىنشا باسقارۋشى سەرىكتەسى ەرلان دوسىمبەكوۆ ەۋروپا ەلدەرىندە كاسىبي-تەحنيكالىق ءبىلىم بەرۋدى دامىتۋ تاجىريبەسىمەن ءبولىسىپ, ۇنەمى دامۋشى زاماناۋي قوعام جاعدايىندا ادام كاپيتالىن ارتتىرۋعا ارنالعان باسقا دا قۇرالدار تۋرالى اڭگىمەلەدى.
ساراپشىلاردىڭ پىكىرىنە سايكەس, ادام كاپيتالىن دامىتۋ ماسەلەسى شيك قا نەگىزگى مىندەتتەرىنىڭ ءبىرى. بۇدان وزگە, سوڭعى كەزدەرى بۇل ماسەلە ەلدى دامىتۋدىڭ جانە الەمدىك ەكونوميكالىق ارەنادا كوركەيتۋدىڭ مىندەتتى شارتى رەتىندە انىقتالعان. اتاپ ايتقاندا, ادام كاپيتالىن دامىتۋ بۇكىل قوعامنىڭ الەۋەتىن ارتتىرۋعا, سونداي-اق جالپى العاندا ەل رەسۋرسىن كەڭەيتۋگە اكەلەدى. ءوز كەزەگىندە, ەۋرازيا توبىنىڭ باقىلاۋ كەڭەسىنىڭ مۇشەسى س. تەمىرعاليەۆ, «شەتەلدىك ينۆەستورلار كەڭەسىنىڭ قازاقستاندىق اسسوتسياتسياسىنىڭ» ديرەكتورى ج. بايداشەۆا يننوۆاتسيالىق تەحنولوگيالاردى ەنگىزۋ جانە ەكونوميكانى تسيفرلاندىرۋدى ەسكەرە وتىرىپ, جوو جانە كاسىبي ءبىلىم بەرۋدى جەتىلدىرۋ جونىندەگى ءوز ۇسىنىستارىن ايتتى.
قاراستىرىلعان ماسەلەلەر بويىنشا ءبىلىم جانە عىلىم ءمينيسترى ە. ساعاديەۆ تۇسىنىك بەردى, ول شيك قا مۇشەلەرىنە پروفەسسورلىق-وقىتۋشىلىق قۇرامدى ونلاين وقىتۋ سالاسىندا ىنتىماقتاستىق ورناتۋدى ۇسىندى.
«ەگەر مەگاترەند تۋرالى ايتار بولساق, قازىر وقىتۋدىڭ ەڭ جىلدام ءارى قۋاتتى ترەندى – بۇل ونلاين وقىتۋ. ءبىز پىسىقتالعان جاھاندىق رەسۋرستاردى پايدالانا وتىرىپ, كادرلاردى, مۇعالىمدەردى تولىق ونلاين دايارلاۋدى ەنگىزىپ, ءوزىمىزدىڭ قازاقستاندىق open-university قۇرعىمىز كەلەدى. بۇل قىمبات بولمايدى, بۇل وتە قولايلى جانە قولجەتىمدى, ءبىلىم بەرۋ ساپاسى دا ءبىز ويلاعاننان ارتادى. قازىر بۇل جۇمىستارعا كىرىسىپ تە كەتتىك, مۇنى ءبىر جىل ىشىندە ءبىتىرۋىمىز كەرەك. وقىتۋشىلاردى ونلاين وقىتۋ بويىنشا بۇل ايماقتا ءبىرىنشى بولعىمىز كەلەدى», — دەدى مينيستر ە. ساعاديەۆ.
تالقىلاۋ قورىتىندىسى بويىنشا باقىتجان ساعىنتاەۆ قر بعم اسسوتسياتسيامەن بارلىق ماسەلەلەردى پىسىقتاپ, ادام كاپيتالىن ارتتىرۋ بويىنشا بىرلەسكەن جۇمىستاردى جوسپارلاۋدى تاپسىردى.