نۇرسۇلتان نازارباەۆ «№1 وسكەمەن قالالىق اۋرۋحاناسى» كوممۋنالدىق مەملەكەتتىك كاسىپورنىنىڭ بازاسىندا قۇرىلعان قازاقستانداعى تۇڭعىش روبوتتاندىرىلعان حيرۋرگيا ورتالىعىنىڭ جۇمىسىمەن تانىستى. ورتالىقتى ارالاۋ بارىسىندا مەملەكەت باسشىسىنا زاماناۋي وپەراتسيالىق-تسيفرلىق كەشەننىڭ جۇمىسى مەن ونىڭ دامۋ پەرسپەكتيۆالارى جونىندە باياندالدى.
سونىمەن قاتار, قازاقستان پرەزيدەنتى تەلەكوپىر رەجىمىندە وبلىستىڭ اياگوز جانە زىريان اۋداندارىنداعى ينسۋلتتىك ورتالىقتاردىڭ ۇجىمدارىمەن اڭگىمەلەستى.
ەلباسى شالعاي ەلدى مەكەندەردە مەديتسينالىق ورتالىقتار سالۋ ماقساتىمەن مەملەكەت تاراپىنان اتقارىلىپ جاتقان جۇمىستاردىڭ ناتيجەلەرىنە توقتالدى.
مەملەكەت باسشىسى جۇرەك-قان تامىرى اۋرۋلارىن ەمدەۋ ساپاسىن جاقسارتۋدىڭ جانە بالا مەن انا ءولىمىنىڭ الدىن الۋدىڭ ماڭىزدىلىعىن اتاپ ءوتتى.
– قازاقستاننىڭ ءاربىر وبلىسىندا جۇرەك-قان تامىرى اۋرۋلارىنان قايتىس بولاتىنداردىڭ سانىن ازايتۋ ماقساتىمەن جۇرەككە وتا جاسايتىن مەديتسينالىق ورتالىقتار سالىندى. قازىرگى ۋاقىتتا ءولىم-ءجىتىم كورسەتكىشىن تومەندەتە الدىق, – دەدى قازاقستان پرەزيدەنتى.
سونىمەن قاتار, نۇرسۇلتان نازارباەۆ سالاماتتى ءومىر سالتىن ناسيحاتتاۋ ارقىلى ءتۇرلى اۋرۋلاردىڭ الدىن الۋ قاجەتتىگىن ايتتى.
– ءبىزدىڭ دەنساۋلىعىمىزدىڭ 10-15 پايىزى عانا دارىگەرلەر مەن مەديتسيناعا, قالعانى ءوزىمىزدىڭ ءومىر ءسۇرۋ سالتىمىزعا بايلانىستى. بولاشاق نارەستەنىڭ دەنساۋلىعى انانىڭ دەنساۋلىعىنا بايلانىستى ەكەنىن ءتۇسىندىرۋ قاجەت, – دەدى مەملەكەت باسشىسى.
مەملەكەت باسشىسى دەنساۋلىق ساقتاۋ سالاسىنداعى روبوتتاندىرىلعان حيرۋرگيا جۇيەلەرىنىڭ تيىمدىلىگىنە توقتالدى.
وسىعان وراي ەلباسى مەديتسينا سالاسىنداعى كادرلاردى ساپالى دايارلاۋدى قامتاماسىز ەتۋدىڭ قاجەتتىگىن دە اتاپ ءوتتى.
سوڭىندا قازاقستان پرەزيدەنتى ورتالىقتىڭ قىزمەتكەرلەرىنە جانە ەمدەلۋشىلەرگە زور دەنساۋلىق پەن تابىس تىلەدى.