اقتوبەدە مۇمكىندىگى شەكتەۋلى بالالارعا ارنالعان ونەر مەكتەبى ەسىگىن ايقارا اشتى. مۇندا بالالار دومبىرا مەن بي ۇيىرمەلەرىنە قاتىسىپ, اعىلشىن ءتىلىن ۇيرەنەدى. ەرەكشە ءبىلىم بەرۋدى قاجەت ەتەتىن بالالار ورتالىققا اقىسىز قابىلدانادى. سونداي-اق, دەنە كەمىستىگى بار بالالار دا ۇيىرمەلەرگە قاتىسا الادى. ولار ساۋ بالالارمەن قاتار اقىلى بولىمدە ءبىلىم الادى.
«مۋزىكانىڭ ادام دەنساۋلىعىنا وڭ اسەر ەتىپ, اسىرەسە, بالالاردىڭ ەستە ساقتاۋ قابىلەتىن دامىتىپ, كوڭىل-كۇيىنىڭ جاقسارۋىنا ىقپال ەتەتىنى بارشاعا ايان. «ونەر-جاندى ەمدەۋ قۇرالى» دەپ ايتادى ەمەس پە؟ ەرەكشە بالالارعا دومبىرا اسپابىن مەڭگەرتۋ ارقىلى دەنساۋلىعىن جاقسارتۋعا سەپتىگىمدى تيگىزسەم دەگەن ماقساتىم بار. ەستۋ قابىلەتى ناشار بالالارعا دومبىرا ۇيرەتۋدىڭ ارنايى ادىستەمەسىن ويلاپ تاپتىم. دومبىرادا ويناۋدى نوتامەن ەمەس, تۇستەر ارقىلى ۇيرەتەمىن»,-دەيدى ورتالىق باسشىسى گۇلسانا ماعزىمبەتوۆا.
گۇلسانا - كاسىبي مۋزىكانت, مەكتەپتە مۋزىكا پانىنەن ساباق بەرگەن تاجىريبەلى ۇستاز. قازىرگى كەزدە ول سۇيىكتى ءىسىن جەكە كاسىپپەن ۇشتاستىرۋدى ماقسات تۇتىپ, ءوز ونەر ورتالىعىن اشتى. ونەر مەكتەبىنىڭ جۇمىسى ەرەكشە كۇتىمدەگى بالالاردىڭ قوعامعا بەيىمدەلۋىنە, ولاردىڭ دەنساۋلىعىن جاقسارتۋعا باعىتتالعان. ورتالىقتا 3 مۇعالىم جۇمىس ىستەيدى. بۇگىندە مەكتەپتە 13 وقۋشى ءبىلىم الۋدا. ولاردىڭ جەتەۋى- مۇمكىندىگى شەكتەۋلى بالالار. ۇيىرمەگە قاتسىسۋشىلاردىڭ جاس ەرەكشەلىگىنە شەكتەۋ قويىلمايدى. ورتالىققا كەلۋشىلەردىڭ ەڭ جاسى – ءتورت جاستا, ەرەسەك ادامدار دا دومبىرا ۇيرەنۋگە ىقىلاس تانىتۋدا.
«ونەر مەكتەبىن اشۋعا وڭىرلىك «اتامەكەن» كاسىپكەرلەر پالاتاسىنىڭ كومەگى كوپ ءتيدى. بيزنەس-جوسپاردان باستاپ, كاسىپتى قالاي جۇرگىزۋ كەرەكتىگىن ۇيرەتتى. اۆتورلىق قۇقىمدى السام, فرانشيزا اشىپ, باسقا قالالاردان بولىمشەلەر اشسام دەيمىن. بۇل رەتتە دە كاسىپكەرلەر پالاتاسى جاردەمدەسىپ جاتىر»,-دەيدى گۇلسايان.
ونەر مەكتەبىنىڭ جۇمىسى –الەۋمەتتىك كاسىپكەرلىك باعىتىنا جاتادى. بۇل سالا ەلىمىزدە ەندى-ەندى دامىپ كەلەدى. الەۋمەتتىك كاسىپكەرلەر ءبىر جاعىنان قوعامنىڭ ءالسىز توبىنا جاتاتىن مۇمكىندىگى شەكتەۋلى جاندارعا كومەك كورسەتسە, ەكىنشى جاعىنان تۇرعىنداردى جۇمىسپەن قامتيدى. الايدا, مۇنداي كاسىپكەرلەردى زاڭمەن قولداۋ, سالىقتىق جەڭىلدىك بەرۋ قاراستىرىلماعان. وسى باعىتتا زاڭ شىعارىلاتىن بولسا, الەۋمەتتىك كاسىپپەن اينالىساتىن جانداردىڭ قاتارى كوبەيەر ەدى,- دەيدى كاسىپكەرلىك پالاتا ماماندارى.
تەمىر قۇسايىن,
«ەگەمەن قازاقستان»