گاسترولدىك ساپارعا شىققان انشىلەر كوبىنە وبلىس ورتالىعىمەن شەكتەلەدى. الىستاعى اۋىلدارعا باراتىندارى نەكەن-ساياق. سوڭعى جىلدارى اتىراۋعا كەلگەن ونەرپازدار اۋدانداردى دا ارالاي باستادى. وعان وبلىس باسشىلىعىنىڭ قولداۋ كورسەتۋى دە وڭ ىقپالىن تيگىزىپ وتىر.
ء داستۇرلى ءانشى, قازاقستاننىڭ ەڭبەك سىڭىرگەن قايراتكەرى گۇلميرا سارينا وبلىستىق مادەنيەت, ارحيۆتەر جانە قۇجاتتاما باسقارماسىنىڭ قولداۋىمەن ماحامبەت, يساتاي, قىزىلقوعا اۋداندارىنا ارنايى بارىپ, كونتسەرتتىك باعدارلاما ۇسىندى. اتىراۋ قالاسىنداعى قۇرمانعازى مادەنيەت سارايىندا دا ءماندى كەش ءوتتى.
– اتىراۋ – رۋح قونعان باتىرلار مەن جىر قونعان اقىنداردىڭ ەلى. مۇنداي كيەلى مەكەنگە كەلۋ ءۇشىن ۇلكەن دايىندىق كەرەك دەپ ويلادىم. ءساتى ەندى ءتۇسىپ, جايىق جاعاسىنداعى جۇرتپەن جەكە كونتسەرتىمدە العاش رەت جۇزدەستىم, – دەيدى گۇلميرا سارينا. «ساعىنىش» دەپ اتالعان ءان كەشىندە دينا نۇرپەيىسوۆا اتىنداعى قازاق حالىق اسپاپتار وركەسترىنىڭ سۇيەمەلدەۋىمەن جاندى داۋىستا ونەر كورسەتكەن ءانشىنى اتىراۋلىقتار جىلى قابىلدادى. گۇلميرا ايىمعازىقىزى قۇر قول كەلمەي, قازاق سالتىمەن سىيىن دا الا كەلىپتى. ول – «اتىراۋ – ايبارىم» دەپ اتالاتىن جاڭا ءان. اقىن ءاليا داۋلەتباەۆانىڭ سوزىنە جازىلعان ءان كونتسەرتتە العاش رەت ورىندالدى. تىڭداعان جاننىڭ رۋحىن وياتىپ, جىگەر بەرەتىن تۋىندىعا كورەرمەن دە ريزا بولدى.
شارادا اقىندار «دارىن» مەملەكەتتىك جاستار سىيلىعىنىڭ يەگەرى قالقامان سارين, تولەگەن ايبەرگەنوۆ اتىنداعى سىيلىقتىڭ يەگەرى جۇلدىزاي ىسقاق ولەڭ وقىدى. باتىس ءان مەكتەبىنىڭ بەلدى وكىلى قايرات كاكىموۆ ءانىن اۋەلەتتى. جايىق جاعاسىنا «ساعىنىشىن» الا جەتكەن انشىگە ەل ريزا بولىپ, قوشەمەت كورسەتتى.
باقىتگۇل باباش,
«ەگەمەن قازاقستان»
اتىراۋ