بۇگىن ەلىمىزدە بۇقارالىق اقپارات قۇرالدارى قىزمەتكەرلەرىنىڭ, سونىمەن بىرگە بايلانىس سالاسى ماماندارىنىڭ كاسىبي مەرەكەسى اتالىپ وتەدى. اقپارات تاراتۋ, جەتكىزۋ قاي كەزەڭدە دە قوعام ومىرىندە ايرىقشا ورىن العان بولسا, بۇگىنگى جاھاندانۋ داۋىرىندە ونىڭ ماڭىزدىلىعى بىرنەشە ەسە ارتا ءتۇستى.
قازىرگى كۇنى اقپاراتتىق-كوممۋنيكاتسيالىق تەحنولوگيالار الەمدىك دامۋدىڭ العىشارتىنا اينالىپ وتىر. وسى ورايدا قوعامنىڭ جاڭارىپ, دامۋىنا ىقپال ەتەتىن بىردەن-ءبىر كۇش – جۋرناليستيكا بولىپ قالا بەرەرى ءسوزسىز.
تسيفرلاندىرۋدىڭ سالدارىنان كوپتەگەن ماماندىقتاردىڭ قاتاردان شىعىپ قالاتىنىن ايتۋدا زەرتتەۋشىلەر. الايدا اقپارات سالاسىنىڭ ماماندارى دارىگەرلەر مەن مۇعالىمدەر سياقتى قاشاندا ماڭىزدى بولا بەرمەك. ەلباسى ايتقانداي, «ححI عاسىردا مەديا سالاسى الەمدەگى وقيعالاردى تاراتۋشى بولىپ قانا قويماي, كوبىنە ونىڭ جەكەلەگەن ەلدەردە جانە تۇتاس الەمدە قالاي ورىستەپ وتىرعانىن ايقىندايتىن جەتەكشى كۇشكە اينالدى».
وسى ورايدا اقپاراتتىق قاۋىپسىزدىك دەگەنىمىز ۇلتتىق قاۋىپسىزدىك ماسەلەسى ەكەنىن قاشاندا العا تارتاتىن مەملەكەت باسشىسىنىڭ تىكەلەي قامقورلىعىنىڭ, قولداۋىنىڭ ارقاسىندا تاۋەلسىزدىكتەن بەرى ەلىمىزدىڭ اقپاراتتىق كەڭىستىگىندە ۇلكەن ءدۇمپۋ بولعانىن اتاپ ايتۋ ءلازىم. گازەت-جۋرنال, تەلەارنا مەن راديو قاتارى الدەنەشە ەسەگە كوبەيىپ, وتاندىق باق نارىعىندا باسەكە قىزا باستادى.
سوناۋ توقسانىنشى جىلداردىڭ وزىندە مەملەكەت باسشىسىنىڭ نۇسقاۋلارى بويىنشا اقپارات سالاسىنىڭ دامۋىنا تىكەلەي ىقپال ەتكەن ماڭىزدى شەشىمدەر قابىلداندى. سونىڭ ىشىندە باق-تى قوسىمشا قۇن سالىعىنان بوساتۋعا قاتىستى جەڭىلدىكتەر جاسالدى. «باق تۋرالى» زاڭ قابىلدانۋىمەن ەلىمىزدە مەملەكەتتىك ەمەس اقپارات قۇرالدارىنىڭ دامۋىنا جول اشىلدى. سالا قىزمەتكەرلەرىنە ارنايى پرەزيدەنت سىيلىعى مەن گرانتتارى تاعايىندالىپ, جىل سايىن ۇزدىكتەر ەڭبەگى لايىقتى باعاسىن الۋدا.
ەلوردادا «قازمەديا ورتالىعى» اتتى زاماناۋي مەديا ورتالىق بوي كوتەرگەننەن بەرى وتاندىق تەلەارنالار مەن راديولاردىڭ ساپاسى تەحنيكالىق جاعىنان عانا ەمەس, مازمۇندىق جاعىنان دا بىرنەشە ەسەگە كۇشەيدى.
وسىدان ەكى جىل بۇرىن ەلباسىنىڭ تىكەلەي تاپسىرماسىمەن اقپارات جانە كوممۋنيكاتسيالار مينيسترلىگى قۇرىلىپ, ونىڭ الدىنا بىرقاتار مىندەتتەر قويىلعانى بەلگىلى. ءوز كەزەگىندە, مينيسترلىك وسى ماقسات-مىندەتتەردى ورىنداۋ بويىنشا اۋقىمدى شارالاردى جۇزەگە اسىرۋدا. سونىڭ ىشىندە, مەملەكەتتىك تەلەارنالاردى, راديو مەن باسپا باق-تى, ينتەرنەت-رەسۋرستاردى جاڭعىرتۋ بويىنشا ۇلكەن جۇمىستار جۇزەگە استى. اقپارات جانە كوممۋنيكاتسيالار سالالارىنا قاتىستى زاڭ جوباسى قابىلداندى. ماسس-مەديا ءۇشىن اكىمشىلىك جۇكتەمەلەر مەن شەكتەۋلەردى ازايتۋ بويىنشا بىرقاتار جەڭىلدىكتەر جاسالدى.
جۋرناليستەر قاۋىمىنىڭ ەڭبەگىن لايىقتى باعالاۋ ماقساتىمەن وتكەن جىلى اقپارات جانە كوممۋنيكاتسيالار مينيسترلىگى «تۇمار» جانە «ۇركەر» سىيلىقتارىن تاعايىندادى. «نۇر وتان» پارتياسىنىڭ «نۇر سۇڭقار» سىيلىعى, سونىمەن قاتار كوپتەگەن ۇيىمدار مەن مەكەمەلەر تاراپىنان تاعايىندالعان ماراپاتتار دا ءداستۇرلى تۇردە تابىستالىپ كەلەدى.
الاش قايراتكەرى مىرجاقىپ دۋلاتوۆ ايتپاقشى, «قاي ەلدىڭ ءباسپاسوزى كۇشتى بولسا, سول ەلدىڭ ءوزى دە كۇشتى». تاۋەلسىزدىگىمىزدىڭ تۇعىرىن بەكىتىپ, ەلدىگىمىزدى نىعايتۋ جولىنداعى بۇگىنگى كۇندە ء«تورتىنشى بيلىك» دەگەن بەيرەسمي اتاۋعا يە قاۋىمعا جەدەل ءارى شىنايى حابار تاراتۋمەن بىرگە مەملەكەتتىك مۇددەگە قوعامدى جۇمىلدىرۋ, ۇلتتىڭ بىرلىگىن نىعايتۋ سياقتى جاۋاپتى مىندەتتەر جۇكتەلىپ وتىر. وتاندىق باق بۇل مىندەتتى ابىرويمەن اتقارىپ كەلەدى دەپ ايتۋعا تولىق نەگىز بار.
قامبار احمەت,
«ەگەمەن قازاقستان»