پارلامەنت سەناتىنىڭ توراعاسى قاسىم-جومارت توقاەۆ ماروككو كورولدىگىنىڭ قازاقستانداعى توتەنشە جانە وكىلەتتى ەلشىسى ابدەلجاليل ءساۋبريدى ونىڭ ءوتىنىشى بويىنشا قابىلدادى.
توراعا قازاقستان ماروككونى بۇۇ جانە باسقا حالىقارالىق ۇيىمدارىنداعى ماڭىزدى ارىپتەس رەتىندە قاراستىراتىنىن اتاپ ءوتتى. ونىڭ ايتۋىنشا, ورتالىق ازياداعى بىردەن-ءبىر - استانادا ەلشىلىك اشۋ تۋرالى ماروككو ۇكىمەتىنىڭ شەشىمىن قازاقستاندا ءتيىستى دەڭگەيدە باعالايدى. ماروككودا دا ديپلوماتيالىق وكىلدىكتىڭ قۇرىلۋى دا الىس ەمەس.
ق.توقاەۆ بۇۇ باس اسسامبلەياسىنىڭ 72-ءشى سەسسياسىندا ماروككونىڭ ۆيتسە-پرەزيدەنت لاۋازىمىنا سايلانۋىمەن قۇتتىقتادى, بۇل بەيبىتشىلىكتى قولداۋ ماسەلەلەرى, كليماتتىڭ وزگەرۋلەرى مەن تەرروريزممەن كۇرەس سالالارىنداعى بۇۇ قىزمەتىنە ماروككونىڭ ۇلەسىن حالىقارالىق قوعامداستىقتىڭ مويىنداۋى بولىپ تابىلادى.
ەلشى بۇۇ قاۋىپسىزدىك كەڭەسىندەگى سىندارلى ىنتىماقتاستىق پەن ماروككو ۇستانىمدارىن قولداۋىنا بايلانىستى قازاقستانعا العىسىن ءبىلدىردى.
پارلامەنتارالىق ىنتىماقتاستىقتى تالقىلاي كەلىپ, جۇزدەسۋشىلەر بايلانىستاردى ودان ءارى دامىتۋ جانە بارلىق دەڭگەيدەگى دەلەگاتسيالار الماسۋدىڭ قاجەتتىگىن اتاپ ءوتتى.
ق.توقاەۆ بيىل قازان ايىندا ء«دىني كوشباسشىلار قاۋىپسىز الەم جولىندا» تاقىرىبى بويىنشا استانادا وتەتىن الەمدىك جانە ءداستۇرلى دىندەر ليدەرلەرىنىڭ كەزەكتى سەزىنە ازىرلىك تۋرالى ديپلوماتتى جان-جاقتى حاباردار ەتتى. «قاتىسۋشىلاردىڭ جوعارى دەڭگەيى مەن اۋقىمدى سيپاتى تالقىلاۋعا شىعارىلاتىن تاقىرىپتاردىڭ ماڭىزدىلىعىن عانا ەمەس, ديپلوماتيانىڭ كوپتاراپتى ورتالىقتارىنىڭ ءبىرى رەتىندەگى قازاقستاننىڭ حالىقارالىق بەدەلىن دە پاش ەتىپ وتىر», - دەدى سەنات باسشىسى.