25 قاڭتار – ەلباسى ن.نازارباەۆ نيۋ-يوركتە شىعاتىن 5,6 ميلليون وقىرمانى بار «Businesweek» جۋرنالىنا سۇحبات بەرىپ, ەلىمىزدىڭ تاۋەلسىزدىك جىلدارى جەتكەن جەتىستىگى مەن استانا تۋرالى جان-جاقتى باياندادى.
30 قاڭتار – استانادا پرەزيدەنت ن.نازارباەۆتىڭ قاتىسۋىمەن اكىمدەردىڭ رەسپۋبليكالىق كەڭەسى ءوتتى. جيىندا تاۋەلسىزدىكتىڭ ون جىلىندا اتقارىلعان جۇمىستار سارالانىپ, اكىمدەرگە جاڭادان 11 ءتۇرلى ناقتى مىندەت جۇكتەدى.
19 ناۋرىز – پرەزيدەنت جارلىعىمەن «استانانىڭ گۇلدەنۋى – قازاقستاننىڭ كوركەيۋى» اتتى استانا قالاسىن الەۋمەتتىك-ەكونوميكالىق جاعىنان دامىتۋدىڭ مەملەكەتتىك باعدارلاماسى بەكىتىلدى.
30 ناۋرىز – قازاقستان رەسپۋبليكاسى پرەزيدەنتىنىڭ ۇسىنىسىمەن «بولاشاق» حالىقارالىق ستيپەندياتتارىنىڭ قاۋىمداستىعى قۇرىلدى. 26 ءساۋىر – ىستامبۇلدا تۇركى تىلدەس مەملەكەتتەر باسشىلارىنىڭ VII ءسامميتى ءوتتى. مارتەبەلى باسقوسۋدا قازاقستان پرەزيدەنتى نۇرسۇلتان نازارباەۆ ازياداعى بەيبىتشىلىك پەن تۇراقتىلىق حارتياسىن ازىرلەۋدى ۇسىندى.
9 مامىر – استانادا «وتان قورعاۋشىلار» مەموريالدىق كەشەنى اشىلدى.
13 مامىر – ەسىلدىڭ وڭ جاعالاۋىندا قاھارمان قولباسشى, قازاقتىڭ سوڭعى حانى – كەنەسارى قاسىم ۇلىنىڭ ەڭسەلى ەسكەرتكىشى اشىلدى. 18 مامىر – موڭعول دالاسىندا تۇرعان كوك تۇركىلەر كوسەمى كۇلتەگىن ەسكەرتكىشىنىڭ كوشىرمەسى قازاق ەلىنىڭ ورداسى – استانا قالاسىنا جەتكىزىلىپ, ءمۇسىن ل.ن.گۋميلەۆ اتىنداعى ەۇۋ-ءنىڭ باس عيماراتىنا ورنالاستىرىلدى.
1 ماۋسىم – مينسكىدە ەۋرازەق مەملەكەتتەرى باسشىلارى كەڭەسىنىڭ وتىرىسى ءوتتى. توراعا بولىپ ن.ءا.نازارباەۆ سايلاندى.
9 ماۋسىم – استانادا «اتامەكەن» قازاقستان كارتاسى ەتنوگرافيالىق-مەموريالدىق كەشەنى اشىلدى.
10 ماۋسىم – استانا قالاسى ءوزىنىڭ كەزەكتى تۋعان كۇن مەرەكەسىن تويلادى. سالتاناتتى شاراعا ماسكەۋ مەرى يۋ.لۋجكوۆ, دۋشانبە مەرى م.ۋبايدۋللوەۆ, ەرەۆان مەرى ر.نازاريان, انكارا مەرى م.گوكچەك قاتىستى.
19 ماۋسىم – استانا كۇنى مەرەكەسىنىڭ اياسىندا تمد-نىڭ ءىرى قالالارى حالىقارالىق اسسامبلەياسىنىڭ V سەسسياسى ءوتتى. اسسامبلەيا قۇرامىنا كىرۋگە تىلەك بىلدىرگەن ياكۋتسك, ۆولوگدا, كراسنويارسك, ەليستا, مۋرمانسك, پەنزا سياقتى قالالاردىڭ ءوتىنىشى ءبىراۋىزدان قابىلداندى.
26 ماۋسىم – استانادا «SOS قازاقستان بالالار قالاشىعى» اشىلدى. سالتاناتتى جيىندا ءسوز سويلەگەن ەلباسى نۇرسۇلتان نازارباەۆ قالاشىقتى اشۋعا كومەك بەرگەن حالىقارالىق «SOS Kinderdorf» قايىرىمدىلىق قورىنىڭ باسشىسى گەلمۋت كۋتينگە شىن جۇرەكتەن العىس ايتتى.
29 ماۋسىم – مەملەكەت باسشىسى «استانا – جاڭا قالا» ارنايى ەكونوميكالىق ايماعىن قۇرۋ تۋرالى» جارلىققا قول قويدى.
16 شىلدە – پرەزيدەنت نۇرسۇلتان نازارباەۆ گرەك ەلىنىڭ ەڭ جوعارى ناگرادالارىنىڭ ءبىرى – قۇتقارۋشى وردەنىمەن ناگرادتالدى.
27 تامىز – قازاقستان رەسپۋبليكاسى تاۋەلسىزدىگىنىڭ 10 جىلدىعىنا وراي پرەزيدەنت جارلىعىمەن «قازاقستان رەسپۋبليكاسىنىڭ تاۋەلسىزدىگىنە 10 جىل» مەرەكەلىك مەدالى تاعايىندالدى. مەدالدىڭ سىرتقى بەتىنىڭ جوعارعى جاعىنا - «قازاقستان رەسپۋبليكاسىنىڭ تاۋەلسىزدىگىنە 10 جىل» جازۋى, ال تومەنگى بولىگىندە «10 لەت نەزاۆيسيموستي رەسپۋبليكي كازاحستان» دەگەن جازۋ ورنالاسقان.
22 قىركۇيەك – ريم پاپاسى يوانن پاۆەل II باس قالامىزعا ۇشىپ كەلدى. حالىقارالىق اۋەجايدان مارتەبەلى مەيماندى پرەزيدەنت ن. نازارباەۆ باستاعان رەسمي ادامدار كۇتىپ الدى. قازاق دالاسىنا العاش رەت اياق باسقان ۆاتيكان مەملەكەتىنىڭ باسشىسى ىستىق ىقىلاسپەن قارسى العان قاۋىمعا العىس ايتىپ, قازاق توپىراعىن ءسۇيدى. ەرتەڭىنە, «وتان-انا» ەسكەرتكىشىنىڭ الدىندا 20 مىڭعا جۋىق ادامعا ۋاعىز ايتتى.
17 قازان – استانادا «قازاقستان جانە نازارباەۆ: وزگەرىستەر قيسىنى» كىتابىنىڭ تانىستىرۋ ءراسىمى ءوتتى.
29 قاراشا – ماسكەۋدە قازاقستان پرەزيدەنتى نۇرسۇلتان نازارباەۆ رەسەي پرەزيدەنتى ۆلاديمير پۋتينمەن كەزدەسىپ, رەسەيدىڭ بايقوڭىر عارىش ايلاعىن جالداۋ اقىسىن تولەۋ جونىندەگى كەلىسىمگە قول قويدى.
8 جەلتوقسان – قازاقستان رەسپۋبليكاسىنىڭ پرەزيدەنتى ن.ءا. نازارباەۆ پەن اقش پرەزيدەنتى دج.بۋش ۇزاق مەرزىمدى ستراتەگيالىق سەرىكتەستىكتى نىعايتۋ تۋرالى مالىمدەمەگە قول قويدى.
16 جەلتوقسان – استانادا قازاقستان تاۋەلسىزدىگىنىڭ 10 جىلدىعىنا ارنالعان سالتاناتتى جينالىس بولىپ ءوتتى. وندا رەسپۋبليكا پرەزيدەنتى نۇرسۇلتان نازارباەۆ ءسوز سويلەدى.
30 جەلتوقسان – مەملەكەت باسشىسىنىڭ جارلىعىمەن قازاقستان حالقىنىڭ دەنساۋلىعىن جاقسارتۋ, دەنساۋلىق ساقتاۋ جۇيەسىن قولداۋ جانە سالاماتتى ءومىر سالتىن ناسيحاتتاۋ ماقساتىندا الداعى «2002 جىل – دەنساۋلىق ساقتاۋ جىلى» بولىپ جاريالاندى.
دايىنداعان بەكەن قايرات ۇلى,
"ەگەمەن قازاقستان"