«سۇيەر ۇلىڭ بولسا, سەن ءسۇي, سۇيىنەرگە جارار ول» دەپ حاكىم اباي ايتقانداي, مىنە, ۇلتتىق بىرىڭعاي تەستىلەۋ ناۋقانىنىڭ بەل ورتاسىنا كەلگەندە ەڭ جوعارى بالل جيناعان وقۋشىنىڭ ەسىمى دە بەلگىلى بولدى. بيىل ماكسيمالدى 140 بالدى العاش رەت الماتى قالاسىنداعى 123 مەكتەپ-گيمنازياسىنىڭ تۇلەگى شيارا قۇدايبەرگەنوۆا جيناپ وتىر.
ءبىز الماتىلىق وقۋشى شيارا ابدىراحىمقىزىمەن تەلەفون ارقىلى سويلەسىپ, ەلىمىزدەگى ەڭ جوعارى كورسەتكىشكە قول جەتكىزۋىمەن وقىرماندار اتىنان قۇتتىقتاعان ەدىك. شيارا تەستىلەۋ سىناعىن قازاق ۇلتتىق اگرارلىق ۋنيۆەرسيتەتىنىڭ بازاسىندا 25 ماۋسىمدا تاپسىرعانىن ايتتى.
ۇزدىك ءبىلىم ناتيجەسىن كورسەتكەن تۇلەك 2000 جىلى تاراز قالاسىندا دۇنيەگە كەلگەنىن, الايدا اتا-اناسىنىڭ الماتىعا كوشىپ كەلۋىنە بايلانىستى مەكتەپ تابالدىرىعىن الىپ مەگاپوليستە اتتاعانىن, بيىل بىتىرگەن №123 مەكتەپ-گيمنازياسىندا 5-سىنىپتان باستاپ وقىعانىن جەتكىزدى.
– وتباسىمىزدا اكەم – كاسىپكەر, انام – ءۇي شارۋاشىلىعىندا. ءىنىمنىڭ دە ساباق ۇلگەرىمى جاقسى. مەن 10 سىنىپتا ءبىر-ەكى تورتتىك باعا الىپ قالىپ, «التىن بەلگى» يەگەرى بولا المادىم. ال ءىنىم «التىن بەلگى» الادى دەپ ويلايمىن. تەستىلەۋ سىناعىنا جان-جاقتى, كەشەندى تۇردە ازىرلەندىم. قوسىمشا كۋرستارعا دا باردىم. سونىڭ ناتيجەسىندە جوعارى بالعا قول جەتكىزدىم دەپ ويلايمىن. بۋرابايدا وتكەن فەستيۆالدا بي ونەرىنەن جۇلدەگەر بولدىم, بىلتىر «ينابات» اتتى سۇلۋلىق سايىسىندا جەڭىمپاز اتاندىم. بۇل سايىسقا اۋەزوۆ اۋدانىنىڭ ۇزدىك مەكتەپتەرىنىڭ ارۋلارى قاتىسقان بولاتىن. جالپى ادەبي كىتاپتاردى وقىعاندى ۇناتامىن. پوەزيادان مۇقاعاليدىڭ جىرلارىن جاقسى كورەمىن, – دەيدى شيارا.
ول كەلەشەك ماماندىعىن تاڭداپ تا قويعان ەكەن. تالاپكەر استاناداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن الماتىداعى سۇلەيمەن دەميرەل ۋنيۆەرسيتەتىنىڭ بىرىندە «لوگيستيكا» ماماندىعىنا وقۋدى جوسپارلاپ وتىرعانىن ايتتى.
«مەملەكەت باسشىسىنا ەلىمىزدىڭ جاستارى مەن بىلىمىنە ايرىقشا قولداۋ كورسەتىپ وتىرعانى ءۇشىن راحمەت ايتامىن. سونداي-اق ءوزىمنىڭ جانە اتا-انامنىڭ اتىنان 11 جىل بويى ءبىلىم نارىمەن سۋسىنداتقان مۇعالىمدەرگە, سونىڭ ىشىندە مەكتەپ ديرەكتورى باعيلا اشىمباەۆاعا, سىنىپ جەتەكشىسى سالتانات جانگەلديناعا جانە ماتەماتيكا ءپانىنىڭ مۇعالىمى گۇلبارشىن مامىتوۆاعا, «اراي-تەست» ورتالىعىنىڭ ۇستازدارىنا ريزاشىلىعىمدى بىلدىرەمىن», دەيدى جاس تۇلەك.
شيارا قۇدايبەرگەنوۆا ءوزىن شاھار باسشىسى باۋىرجان بايبەكتىڭ قابىلداعانىن, ەلباسىنىڭ باستاماسىمەن قازاق تىلىنە اۋدارىلىپ, جارىق كورگەن داۆوستاعى دۇنيەجۇزىلىك ەكونوميكالىق فورۋمنىڭ نەگىزىن سالۋشى, بەلگىلى ەكونوميست كلاۋس شۆابتىڭ ء«تورتىنشى ونەركاسىپتىك رەۆوليۋتسيا» اتتى كىتابىن سىيعا تارتقانىن دا جەتكىزدى.
ءبىز ەلىمىزدەگى ەڭ جوعارى بالدى جيناعان جاس تۇلەككە ساتتىلىك تىلەدىك.
ايتا كەتۋ كەرەك, بيىل الماتىلىق وقۋشىلار ورتاشا بالل كورسەتكىشى بويىنشا (101,2) ەلىمىزدە العاشقى ورىندا تۇر. ال جوعارى بالعا جەتەعابىل 139 بالدى №162 مەكتەپ-گيمنازيادان داۋلەت حامزين مەن №104 جالپى ءبىلىم بەرەتىن مەكتەپتەن ايگەرىم يباعاليەۆا ەسىمدى تۇلەكتەر جينادى. الماتىلىق 314 مەكتەپ ءبىتىرۋشىنىڭ 130 بەن 140 بالل اراسىندا جيناۋى دا جاقسى كورسەتكىش ەكەنى انىق.
دۋمان اناش,
«ەگەمەن قازاقستان»