قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا قازاقستان پرەزيدەنتىنىڭ بۇقارالىق اقپارات قۇرالدارى سالاسىنداعى سىيلىقتارى مەن گرانتتارىن تاپسىرۋ جانە العىسىن جاريالاۋ راسىمىنە قاتىستى, دەپ حابارلايدى اقوردانىڭ ءباسپاسوز قىزمەتى.
ءراسىم بارىسىندا گۇلشارا ابدىقالىقوۆا سىيلىق لاۋرەاتتارى مەن گرانت يەگەرلەرىن, مەملەكەت باسشىسىنىڭ العىسىن العان شىعارماشىلىق ۇجىمداردى, سونداي-اق قازاقستاننىڭ بارشا جۋرناليستەر قاۋىمىن كاسىبي مەرەكەسى – بايلانىس جانە اقپارات سالاسى قىزمەتكەرلەرىنىڭ كۇنىمەن قۇتتىقتادى.
– وتاندىق جۋرناليستەر, باسپاگەرلەر, تەلەۆيدەنيە مەن راديو قىزمەتكەرلەرى اقپارات جەتكىزۋمەن قاتار, مەملەكەت پەن قوعامدى بايلانىستىراتىن التىن كوپىر قىزمەتىن دە اتقارادى. شىعارماشىلىق سالاسىنداعى ءدال وسى ادامدار ەلىمىزدە جانە الەمدە بولىپ جاتقان ماڭىزدى وقيعالار جونىندە بارىنەن بۇرىن ءبىلىپ, جۇرتشىلىققا جەتكىزىپ وتىرادى, – دەدى گۇلشارا ابدىقالىقوۆا.
سونىمەن قاتار, مەملەكەتتىك حاتشى ەلىمىزدە كەيىنگى جىلدارى باق سالاسىنداعى باسەكەلەستىكتىڭ ارتقانىنا, شىعارماشىلىق باستامانىڭ جاندانعانىنا توقتالىپ, ەلىمىزدەگى مەملەكەتتىك ساياسات پەن جۇزەگە اسىرىلىپ جاتقان رەفورمالار باعىتىنىڭ شىنايى قابىلدانۋى جۋرناليستەردىڭ ساپالى جۇمىستارىنا بايلانىستى بولعاندىقتان وسى سالانىڭ ماماندارىنان جوعارى كاسىبيلىك تالاپ ەتىلەتىنىن ايتتى.
– قازاقستاندىق بۇقارالىق اقپارات قۇرالدارىنىڭ قىزمەتىن ىنتالاندىرۋ ماقساتىمەن ەلباسىنىڭ ارنايى سىيلىعى جاريالاندى. بۇگىن قالىپتاسقان ءداستۇر بويىنشا ۇزدىك جۋرناليستەر مەن شىعارماشىلىق ۇجىمداردى ماراپاتتايمىز, – دەدى گۇلشارا ابدىقالىقوۆا.
***
مەملەكەت باسشىسىنىڭ وكىمىمەن پرەزيدەنت سىيلىعى ء«ىnformburo.kz» ينتەرنەت-پورتالىنىڭ باس رەداكتورى ميحايل ۆيكتوروۆيچ دوروفەەۆكە, «استانا» رەسپۋبليكالىق تەلەارناسىنىڭ باس ديرەكتورى ءلاززات مۇراتقىزى تانىسبايعا بەرىلدى.
گرانتتار «حابار» رەسپۋبليكالىق تەلەارناسىنىڭ ساراپتامالىق باعدارلامالار ءبولىمىنىڭ ءتىلشىسى ايگۇل نۇرحانقىزى ادىلوۆاعا, «قازاقستان» ۇلتتىق تەلەارناسى اقپاراتتىق-ساراپتامالىق باعدارلامالار ديرەكتسياسى ديرەكتورىنىڭ ورىنباسارى مەيىرجان الىبەك ۇلى جيەنالىگە تاپسىرىلدى.
قازاقستان رەسپۋبليكاسى پرەزيدەنتىنىڭ العىسى «الماتى» تەلەارناسىنىڭ, «استانا اقشامى» رەسپۋبليكالىق قوعامدىق-ساياسي گازەتىنىڭ, «بالدىرعان» رەسپۋبليكالىق بالالار جۋرنالىنىڭ, «وزبەكستان ۇلتتىق تەلەراديوكومپانياسىنىڭ» شىعارماشىلىق ۇجىمدارىنا جاريالاندى.