اق حالاتتى ابزال جان كورسەك الەمنىڭ ءالسىز دانەكەرشىسى كوز الدىمىزعا كەلەتىنى راس. ولاردىڭ ءىس-ارەكەتى ادامنىڭ جانىنا اراشا, تانىنە تىرەك. سونداي جانداردىڭ قاتارىندا قاراعاندى وڭىرىنە اتى ءمالىم مايتالمان مامان – زەينەلقايىن ايتباەۆانى ايتۋعا بولادى.
ەڭبەك جولىن قاراعاندى قالاسىنداعى مەملەكەتتىك مەديتسينا ينستيتۋتىن ءبىتىرىپ, بالالار دارىگەرى بولىپ باستاعان زەينەلقايىن ايتباەۆا بۇگىندە جاس دارىگەرلەرگە جول باسى, ءوز قاتارىنىڭ ورتاسى دەسەك ارتىق ايتقاندىق ەمەس. 1971 جىلدان مايقۇدىقتا ورنالاسقان № 3 بالالار اۋرۋحاناسىندا جانە № 2 بالالار ەمحاناسىندا بالالار دارىگەرى بولىپ ەڭبەك ەتىپ كەلە جاتقان ونىڭ تاجىريبەسى مەن ءتالىمى تالاي جانداردى اجال اۋزىنان الىپ قالعانى امبەگە ايان.
جەمىستى باستالعان جۇمىسى قاراعاندى وبلىسى بويىنشا دەنساۋلىق ساقتاۋ سالاسىندا جوعارى باعالانىپ, 1985-1990 جىلدارى ءبىر اۋىزدان قازكسر جوعارعى كەڭەسىنىڭ دەپۋتاتى بولىپ سايلانۋى زەينەلقايىن كۇلماعانبەتقىزىنىڭ قوعامداعى ىسكەرلىك كەلبەتىن ايقىنداي تۇسەدى. «قاراعاندى قالاسىنىڭ وكتيابر اۋدانىندا كەڭەس دەپۋتاتى بولدىم. 2004 جىلدان بەرى زەينەتتەمىن, ەل يگىلىگىنە توككەن تەردىڭ جەمىسىن كورۋدەمىز. بۇگىنگە دەيىن قولىمىز بوس وتىرماي, تاجىريبەمىزدى جاس دارىگەرلەرگە ۇيرەتىپ, بالالاردىڭ دەنساۋلىعىن ساقتاۋ ءۇشىن استانا قالاسىندا بالالار دارىگەرى بولىپ ەڭبەك ەتىپ كەلەمىن», دەيدى ەڭبەك ارداگەرى ز.ايتباەۆا.
ول اعىمداعى جىلدىڭ 16-18 مامىرىندا الماتى قالاسىندا وتكەن ۇلتتىق مەديتسينا قاۋىمداستىعىنىڭ IX باس اسسامبلەياسى اياسىندا وتكەن حالىقارالىق كونفەرەنتسياسىنا شاقىرۋ قۇرمەتىنە يە بولعانىن ايتادى.
گەرمانيا, فرانتسيا, بولگاريا, قىتاي جانە ەۋرازيا ەكونوميكالىق وداعىنا مۇشە (رەسەي, قىرعىزستان, بەلارۋس جانە ارمەنيا) مەملەكەتتەردىڭ ماماندارى قاتىسقان كونفەرەنتسيانىڭ باستى تاقىرىبى توتەنشە جاعدايلار كەزىندە بولاتىن مەديتسينالىق-سانيتارلىق زارداپتاردى جويۋ, مەديتسينالىق كومەكتى شۇعىل ۇيىمداستىرۋدىڭ ماسەلەلەرى توڭىرەگىندە ءوربىدى. سونىمەن قاتار ارنايى تاكتيكالىق دارىستەر وقىلىپ, دەنساۋلىق ساقتاۋعا بايلانىستى كورمە ۇيىمداستىرىلدى. «ونىڭ بارلىعى ەلباسى جولداۋلارىندا باسا ايتىلاتىن, حالىقتىڭ دەنساۋلىعىن ساقتاۋداعى مەديتسينا قىزمەتكەرلەرىنىڭ ۇلكەن جاۋاپكەرشىلىگىنەن تۋىندايدى», دەيدى زەينەلقايىن كۇلماعانبەتقىزى.
وسى كونفەرەنتسيانىڭ اياسىندا «ۇلتتىق مەديتسينا» قاۋىمداستىعىنىڭ «التىن دارىگەر» ناگراداسىنا يە بولدى.
«ەلباسىمىزدىڭ ساليقالى ساياساتىنىڭ ارقاسىندا ەلىمىزدىڭ دەنساۋلىق ساقتاۋ سالاسى جۇيەلى تۇردە دامىپ كەلەدى. قازاقستاننىڭ تۇكپىر-تۇكپىرىندە وزىق تەحنولوگيالارمەن جابدىقتالعان جاڭا مەديتسينالىق مەكەمەلەر اشىلۋدا. بۇل جەتىستىكتەرگە قوسقان كىشكەنتاي دا بولسىن ۇلەسىمىز بارىنا شىن قۋانامىز», دەيدى اق حالاتتى ابزال جان.
جۇمىستا جەمىستى, وتباسىندا تابىستى بولۋى زاڭدى. 1969 جىلى تولەگەن ايتان ۇلى ەسىمدى ازاماتپەن وتباسىن قۇرعان مەيىرلى مەدبيكە زەينەلقايىن كۇلماعانبەتقىزى باقىتتى انا, ادال جار بولدى.
بۇگىندە قوساعىمەن قوڭىر تىرلىك كەشىپ كەلە جاتقان جايساڭ جاندار بالالارىنىڭ قىزىعىن كورىپ, ولاردى دا ادالدىققا, ادامگەرشىلىككە, ءومىر تازالىعىنا, ادەپتىلىككە باۋلىپ كەلەدى.
ميراس اسان, «ەگەمەن قازاقستان»