الەمدىك ەكونوميكالىق داعدارىستىڭ سالقىنى ءالى دە ەسىپ تۇرعانىنا قاراماستان, سوڭعى جىلدارى قوناقۇيلەر بيزنەسىندە سەرپىلىس بار. الماتىداعى ازيادا مەن ۋنيۆەرسيادا, استانادا وتكەن ەكسپو سياقتى اۋقىمدى شارالار ىشكى تۋريزمگە قوزعاۋ سالعانى انىق. ەلىمىزدىڭ ءار تۇكپىرىنەن اعىلعان جەرلەستەرىمىز ايگىلى جۇلدىزدى وتەلدەردى ەمەس, باعاسى مەن ساپاسى كوكەيگە قوناتىن قوناقۇيلەردى قولايلى سانايدى. الايدا ەكسپو سياقتى اۋقىمدى شارالار قىرىق جىلعىسىن الدىمەن بولجايتىن الەمدىك برەندتەردى قازاقستانعا الىپ كەلدى. وتكەن جىلدىڭ وزىندە ەلىمىزدە The Rits Carlton Astana St.Regis Hotels & Resorts Astana سىندى كوپتەگەن ءتورت جانە بەس جۇلدىزدى قوناقۇيلەر اشىلدى. وسىنداي جاعدايدا وتاندىق قوناقۇيلەر قانداي ساياسات ۇستانۋى ءتيىس.
ونىڭ ۇستىنە حالىقارالىق وقيعالار ءوتتى دە كەتتى. شەتەلدىك تۋريستەر لەگى سايابىرسىدى. وعان قوسا تۇتىنۋشىلىق نارىقتىڭ دا قاۋقارى ازايىپ تۇر. ءبىراز جىل بۇرىن باستالعان قارجىلىق داعدارىس ينۆەستيتسيانىڭ كولەمىن ازايتتى. دەمەك بۇل ينۆەستورلار مەن بيزنەس توپتاردىڭ ءىسساپارلارىنا دا تۇساۋ سالىپ وتىر. سوندىقتان بۇل سالانىڭ ساراپشىلارى قازىر بولجام ايتۋعا اسا ق ۇلىقتى ەمەس.
وسىعان قاراماستان استاناداعى وتاندىق بەس جۇلدىزدى قوناقۇيلەر ايتارلىقتاي دامىدى. قازىر باتىستىق برەندتەرگە باعاسىمەن دە, قىزمەتىمەن دە باسەكە تۋعىزا الادى. الماتىدا بۇل ماسەلە ابدەن تەڭدەستىرىلگەن. پرەميۋم ساناتىنداعى قوناقۇيلەرىنىڭ سانىمەن, ساپاسى جانە نومىرلەرىنىڭ كوپتىگىمەن بۇكىل ەلدە كوش باستاپ تۇر. الداعى ۋاقىتتا الماتىدا تاعى دا بىرنەشە تانىمال حالىقارالىق قوناقۇيلەر جەلىسى اشىلادى دەپ كۇتىلۋدە. كەرىسىنشە ايماقتاردا جاعداي الا-قۇلا. ماسەلەن, باتىس قازاقستاندا بەس جۇلدىزدى قوناقۇيلەر دە حالىقارالىق قوناقۇيلەر جەلىلەرى دە ءالى دە كوپ ەمەس. كەرىسىنشە, اقتاۋ قالاسىندا جوعارى ساناتتاعى جاتىن ورىندار جەتكىلىكتى بولسا دا, ءتورت جانە بەس جۇلدىزدى قوناقۇيلەر شەتىنەن اشىلىپ جاتىر. ال اتىراۋ قالاسىنا كەلسەك, قوناقۇيلەر بيزنەسى تىكەلەي «تەڭىز» بەن «قاشاعان» كەن ورىندارىنىڭ كەلەشەگىنە قارايلايدى.
قىسقاسى, قازاقستاندا بۇل بيزنەس ىرعاقتى دامىپ جاتقانىمەن, بىركەلكى ەمەس. ەلىمىزدىڭ حالىقارالىق جانە ايماقتىق تۋريستىك بيزنەستى دامىتۋعا الەۋەتى مەن ارەكەتى بولسا-داعى, قازىر تەك ىسكەرلىك تۋريزم عانا جاندانىپ تۇر. حالىقارالىق قوناقۇيلەر جەلىسى مەن بەس جۇلدىزدى برەندتەردىڭ عانا ايى وڭىنان تۋىپ تۇرعانىن وسىمەن بايلانىستىرۋ كەرەك.
سونداي-اق قوناقۇيلەردىڭ كوپشىلىگى قازىر قولايلى كونفەرەنتس-زالدارىمەن دە ۇپايىن تۇگەندەۋدە. ماسەلەن, Crown Star («قازاقستان» قوناقۇيى) باس ديرەكتورى شەيحمۋس ەسين ءماجىلىس زالدارىنا ترافيكتىڭ ءوسىپ بارا جاتقانىن العا تارتادى. قازىرگى تاڭدا قوناقۇيلەردىڭ تابىسى وسى باعىتتا قۇيىلىپ وتىر. ويتكەنى سوڭعى جىلدارى ەلىمىزدە ءتۇرلى شەبەرلىك-ساباقتار, سەمينارلار وتكىزۋ سانگە اينالعان. سول سياقتى ايگىلى بلوگەرلەر, جازۋشىلار مەن سۇرانىسقا يە پسيحولوگتار باعاسى مەن جاسايتىن جاعدايى كوڭىلگە قوناتىن قوناقۇيگە توقتايدى. ولاردىڭ تىڭداۋشىلارى مەن تالىمگەرلەرى سول جەردەن تاماقتانادى, سول قوناقۇيگە تۇنەيدى. دەمەك بيزنەستىڭ ءدال وسى تۇرىمەن اينالىساتىن مەنەدجەرلەرگە جارناما تاسىلدەرىن وزگەرتۋگە تۋرا كەلمەك.
ال قوناقۇي بيزنەسى قوسالقى بيزنەس تۇرلەرىن, جاپسارلاس جاعدايلاردى دا الىپ جۇرۋگە تۋرا كەلەتىن جانە جىلدام اقتالمايتىن بيزنەس بولعاندىقتان, وعان قۇلاش ۇرىپ جاتقان جەرگىلىكتى ينۆەستورلار از.
ماسەلەن, قازىرگى جاعدايدا وتاندىق ىسكەرلەرگە ۇلكەن قوناقۇيلەر سالعاننان گورى قايتارىمى تەز قولجەتىمدى حوستەلدەر, جالعا بەرىلەتىن جاتاقحانالار, كىشىگىرىم پاتەرلەرى بار تۇرعىن ۇيلەر سالعان ءتيىمدى. بۇعان شىققان قاراجات ءارى كەتسە 7-8 جىلدا قايتادى. 200 ءنومىرلى قوناقۇيلەرگە سالىنعان قاراجاتتىڭ قايتارىمىن ونداعان جىلدار بويى كۇتۋگە تۋرا كەلمەك.
بىراق وسىنىڭ بارىنە قاراماستان سوڭعى جىلدارى ەلىمىزدە قوناقۇيلەردىڭ تاۋلىكتىك باعاسى اسا وزگەرە قويعان جوق دەۋگە بولادى. ۇلتتىق ۆاليۋتانىڭ ءحالى نەشىك بولىپ, تالاي رەت قۇبىلعاندا دا وتەلدەردىڭ باعاسى تۇراقتى بولدى. رەسمي دەرەكتەرگە سۇيەنسەك, 2017 جىلى قوناقۇيلەردىڭ باعاسى ونىڭ الدىنداعى جىلمەن سالىستىرعاندا 4,4 پايىزعا عانا قىمباتتاعان. ال بۇل كەزەڭدە ينفلياتسيا 7,1 پايىز بولدى. كەرىسىنشە, كەيبىر وڭىرلەردە قوناقۇيلەردە قونۋ باعاسى ارزانداعان. مۇنى باسەكەلەستەردىڭ كوبەيىپ, سۇرانىستىڭ ازايۋىمەن بايلانىستىرعان ءجون. ەڭ قىزىعى, سوڭعى جىلدارى ەلورداداعى قوناقۇيلەردىڭ باعاسى ورتا ەسەپپەن 26,6 پايىزعا قىمباتتاعان.
قىسقاسى, قوناقۇيلەر سانى كوبەيە بەرسىن, قونۋ باعاسى مەيلى ارزانداسىن, مەيلى قىمباتتاسىن, بىراق قوناقتار ءۇشىن بۇگىندە برەندتەر ەشقانداي ماڭىزدى ەمەس. سەبەبى پاتەرلەرىن جالعا بەرەتىن جەكەمەنشىك سەكتور وتاندىق قوناقۇيلەر بيزنەسىنىڭ نەسىبەسىنە كادىمگىدەي ورتاقتاسىپ وتىر. ماسەلەن, جوعارىدا اتاپ وتكەن ەكسپو, ۋنيۆەرسيادا سياقتى قايتا اينالىپ كەلمەيتىن شارالار حوستەلدەر مەن بيۋدجەتتىك قوناقۇيلەردىڭ جەتكىلىكسىز ەكەندىگىن كورسەتىپ بەردى.
ال ەلىمىزگە ىسساپارلارمەن كەلەتىن بيزنەس-قاۋىمداستىقتىڭ وكىلدەرى وزدەرى بىلەتىن برەندتەردەن باسقاعا اياق باسپايدى. كورپوراتيۆتىك توپتار بولسا سول قالاداعى نارىقتىڭ اۋجايىن زەرتتەيدى, باعالارىن باعامدايدى. ۇجىمنىڭ, ۇيىمنىڭ قاراجاتىن ۇنەمدەۋ ماقساتىندا «باعا جانە ساپا» ماسەلەسىنە توقتام جاسايدى. قازىر قوناقۇي بيزنەسىمەن اينالىسىپ وتىرعاندار ءۇشىن كليەنت ۇستاۋدىڭ بىرنەشە نۇسقاسى بولسا, ءبىرىنشىسى – باعانى باسەكەلەستەردەن 5-10 پايىزعا بولسا دا ارزانداتۋ. ەندىگى جەردە وتاندىق وتەلدەردىڭ جەرگىلىكتى ويىنىندا وسى ماسەلە قاپەردە ۇستالىنۋى ءتيىس دەسەدى ساراپشىلار.
قالاي دەسەك تە, ۇلكەن قالالارداعى جۇلدىزدى قوناقۇيلەردە ۇلكەن باسەكە بار. كوزگە كورىنبەيتىن كليەنت ءۇشىن شايقاس ۇنەمى جۇرە بەردى. ال ساپارلاپ جۇرگەندەردى باعا عانا قىزىقتىرمايدى, سەرۆيستىڭ تولىق پاكەتى مەن قىزمەت كورسەتۋ دەڭگەيى دە ويلاندىرادى.
ايناش ەسالي, «ەگەمەن قازاقستان»
الماتى