جەكسەنبى كۇنى فۋتبولدان الەم چەمپيوناتىنىڭ توپتىق كەزەڭىندەگى ەكىنشى تۋر ويىندارى اياقتالدى. ەكى تۋر قورىتىندىسى بويىنشا, ساۋد ارابياسى, ەگيپەت, ماروككو, پەرۋ, كوستا-ريكا, وڭتۇستىك كورەيا, پاناما, تۋنيس جانە پولشا قۇرامالارى مۋنديالمەن قوش ايتىساتىنى بەلگىلى بولدى. ال «H» توبىنداعى ءۇش بىردەي قۇرامانىڭ ياعني, سەنەگال, جاپونيا جانە كولۋمبيانىڭ پلەي-وفف ساتىسىنا جولداما الۋعا ءالى دە بولسا مۇمكىندىكتەرى بار.
ەكى ويىننىڭ بىرىندە جەڭىسكە جەتىپ, ەكىنشىسىندە تەڭ تۇسكەن ازيا قۇرلىعىنىڭ وكىلى جاپونيا ءۇشىنشى تۋر ويىندارى الدىندا «H» توبىندا كوش باستاپ تۇر. ەندى جاپونيا بەيسەنبى كۇنى سوڭعى تۋردا پولشا قۇراماسىمەن وينايدى. بۇل ماچتا كۇنشىعىس ەلىنىڭ فۋتبولشىلارىنا تەڭ ناتيجە دە جەتكىلىكتى. ال پولشا ءۇشىن بۇل كەزدەسۋدىڭ ەشقانداي ماڭىزى جوق. جەڭسە دە, جەڭىلسە دە ەلدەرىنە قايتۋعا قامدانادى. جاپونيا فۋتبولشىلارى 2002 جىلى ءوز ەلدەرىندە وتكەن بىرىنشىلىكتەگى جانە 2010 جىلى وار-داعى ناتيجەسىن قايتالاۋعا جاقىن تۇر. سول ەكى چەمپيوناتتا «سامۋرايلار» ەلى 1/8 فينالعا دەيىن جەتكەن بولاتىن.
جالپى, جاپونيا قۇراماسى بيىلعى الەم بىرىنشىلىگىنە جاقسى دايىندىقپەن كەلدى. ناۋرىز ايىندا كۇنشىعىس ەلىنىڭ فۋتبولشىلارى ەكى جولداستىق كەزدەسۋىن وتكىزدى. قارسىلاستارى الەم بىرىنشىلىگىنە شىعا الماعان قۇرامالار بولسا دا, ەكى ويىندا دا جەڭىسكە جەتە المادى. مالي قۇراماسىنا قارسى وتكەن ويىندا سوڭعى مينۋتتا جەڭىلىستەن امان قالسا (1:1), ۋكراينادان 1:2 ەسەبىمەن جەڭىلىپ قالدى. اتالعان ويىنداردا جاپونيالىقتاردىڭ بىرقاتار نەگىزگى فۋتبولشىلارى قاتىسپاسا دا, قۇرامانى مۋنديالعا الىپ شىققان باس جاتتىقتىرۋشى ۆاحيد ءحاليلحودجيچتىڭ وتستاۆكاعا كەتۋىنە سەبەپ بولدى. جاپونيا الەم چەمپيوناتىنا ەكى اي قالعاندا باپكەر اۋىستىرىپ, ءتورت جىلدىقتىڭ نەگىزگى ويىنىنا تىڭ سەرپىلىسپەن كەلدى.
قازىرگى تاڭدا قۇرامادا دوپ تەبەتىن ويىنشىلاردىڭ كەيبىرەۋى ەۋروپا جاسىل الاڭدارىندا ويناپ ءجۇر. مىسالى, اعىلشىن پرەمەر-ليگاسىنداعى مايا ەسيدا جانە شيندجي وكازاكي جەكە تانىستىرۋدى قاجەت ەتپەيتىن فۋتبولشىلار. سيندزي كاگاۆا جاراقاتىنا بايلانىستى ءبىراز ۋاقىت الاڭعا شىقپاسا دا, «بورۋسسيا» كلۋبىنىڭ جەتەكشى فۋتبولشىسى سانالادى. يوشينوري مۋتو («ماينتس»), حيروكي ساكاي («مارسەل»), تاكاسي ينۋي («ەيبار») سەكىلدى فۋتبولشىلار وسى ماۋسىمدا وزدەرىنىڭ جارقىن ويىندارىن وتكىزۋدە. كەيسۋكە حوندا مەكسيكاعا, يۋتو ناگاتومو «گالاتاسارايعا» اۋىسىپ, كارەراسىن اياقتايتىن تۇسقا جاقىنداسا دا, ءالى كۇنگە دەيىن قۇرامانىڭ نەگىزگى تىرەگى سانالادى. جالپى, جاپونيا بيىلعى بىرىنشىلىككە تاجىريبەلى قۇرامىن الىپ كەلدى. قۇرامىنداعى 10 فۋتبولشىنىڭ جاسى 30-دان اسسا, 7 فۋتبولشىسى قۇراما ساپىندا 80-نەن اسا ويىن وتكىزگەن.
سەنەگال تاعى دا سەنساتسيا جاساۋعا جاقىن2002 جىلى وڭتۇستىك كورەيا مەن جاپونيادا وتكەن XVII الەم چەمپيوناتىنداعى سەنەگال قۇراماسىنىڭ سەنساتسياسىن فۋتبول جانكۇيەرلەرى ءالى ۇمىتا قويماعان بولار. ازيا قۇرلىعىندا وتكەن بىرىنشىلىكتە سەنەگال «ا» توبىندا ۇپاي جاعىنان دانياعا ەسە جىبەرىپ, ءبىر جەڭىس, ەكى تەڭ ويىنمەن دوپ دوداسىنىڭ 1/8 كەزەڭىنە جولداما الدى. پلەي-وفف ساتىسىندا شۆەتسيا قۇراماسىن 1:2 ەسەبىمەن جەڭىپ, ءتۋرنيردىڭ شيرەك فينالىنا شىقتى. بۇل افريكا قۇرلىعىنان كەلىپ, الا دوپ الامانىنا تۇڭعىش رەت قاتىسىپ جاتقان قۇراما ءۇشىن سەنساتسيالىق ناتيجە ەدى. بىراق 1/8 فينالدا تۇركيا قۇراماسىنا تاپ كەلىپ, 0:1 ناتيجەسىمەن جەڭىلىپ قالدى.
اراعا 16 جىل سالىپ سەنەگال قۇراماسى فۋتبولدان الەم چەمپيوناتىنا قايتا ورالدى. ءدال قازىر سەنەگال 2002 جىلعى جەتىستىگىن قايتالاۋىنا مۇمكىندىگى تۋىپ تۇر. ءبىر قىزىعى, چەمپيونات باستالماي تۇرىپ فۋتبول ماماندارى بۇل توپتان كولۋمبيا مەن پولشا قۇراماسى پلەي-وفف ساتىسىنا ەش قيىندىقسىز شىعادى دەپ بولجاعان. الايدا ءبىرىنشى تۋردا ۇزدىك سانالعان ەكى قۇراما دا جەڭىلىپ قالدى. «H» توبىندا سىنعا ءتۇسىپ جاتقان افريكا قۇرلىعىنىڭ وكىلى العاشقى تۋردا پولشا قۇراماسىنان 2:1 ناتيجەسىمەن باسىم تۇسسە, ءدال وسىنداي ەسەپپەن جاپونيا كولۋمبيا فۋتبولشىلارىن جەڭدى. ەكىنشى تۋر ويىندارىندا سەنەگال مەن جاپونيا قۇرامالارى تارتىستى وتكەن كەزدەسۋدە 2:2 ەسەبىمەن تەڭ تارقاستى. سەنەگال سوڭعى تۋردا كولۋمبيا فۋتبولشىلارىمەن جولىعادى.
سەنەگال ساپىندا دا وزگە افريكالىق قۇرامالار سياقتى جۇلدىز فۋتبولشىلارى بار. مىسالى, «ليۆەرپۋل» كلۋبىنداعى ۇزدىك شابۋىلشىلاردىڭ ءبىرى ساديو مانە, مۋسسا سوۋ («بۋرساسپور»), مامە ديۋف («ستوك سيتي»), كەيتا بالدە («موناكو»), ديافرا ساكو («رەنن»), مباي نيانگ («تورينو») بار. قورعانىستاعى كاليدۋ كۋليباليگە قازىر الەمنىڭ ۇزدىك كلۋبتارى كوز تىگىپ وتىر. «ناپولي» قورعاۋشىسىنا انگليانىڭ بارلىق توپ كوماندالارى, سونداي-اق «بارسەلونا» كلۋبى دا «قۇدا ءتۇسىپ» وتىر. «ناپولي» بولسا فۋتبولشىنىڭ باعاسىن 100 ميلليون ەۋرودان كوپ دەپ باعالاۋدا. جۋىردا كۋليبالي سەنەگال تاريحىنداعى ەڭ قىمبات فۋتبولشى اتانۋى مۇمكىن. ول ءۇشىن قۇراماسى توپتىق كەزەڭنەن ءوتىپ, پلەي-وففقا جولداما الۋ كەرەك.
كولۋمبياعا ەندى جەڭىس كەرەكوسىدان ءتورت جىل بۇرىن برازيليادا وتكەن الەم چەمپيوناتىنىڭ شيرەك فينالىنا دەيىن جەتكەن كولۋمبيا قۇراماسى ءۇشىن بيىلعى بىرىنشىلىك ءساتسىز باستالدى. العاشقى تۋردا-اق جاپونيادان جەڭىلىپ, كوش سوڭىنا ءتۇسىپ قالدى. ال ەكىنشى تۋردا پولشا قۇراماسىن 3:0 ەسەبىمەن جەڭىپ, پلەي-وفف كەزەڭىنە جولداما الۋ ءۇمىتىن قايتا جاقتى. ەندى 1/8 فينالعا شىعۋ ءۇشىن كولۋمبيا سوڭعى تۋردا سەنەگال قۇراماسىن جەڭۋ كەرەك.
كولۋمبيانىڭ شابۋىل شەبىندە ءالى كۇنگە دەيىن فالكاو مەن باككا سەكىلدى تاجىريبەلى فۋتبولشىلار دوپ تەبەدى. سونىمەن قاتار «سەۆيليا» ساپىندا ءوزىنىڭ ۇزدىك ماۋسىمىن وتكىزگەن لۋيس مۋريەلدى ەرەكشە اتاپ وتۋگە بولادى. جارتىلاي قورعانىستاعى حامەس رودريگەس سوڭعى ءتورت جىلدا ەكى كوماندا اۋىستىرسا دا, ونىڭ تاجىريبەسى كوماندانى العا سۇيرەيتىنى انىق. مىسالى, جەكسەنبى كۇنى پولشاعا قارسى وتكەن ويىندا حامەس رودريگەس ماتچتىڭ ۇزدىك ويىنشىسى اتاندى.
كولۋمبيا قۇراماسى تۋرالى ءسوز قوزعالعاندا باس جاتتىقتىرۋشى حوسە پەكەرماندى ايتپاي كەتۋگە بولماس. 2012 جىلى قۇراما ءتىزىمىن ءوز قولىنا العان مامان 2014 جىلى كولۋمبيانى تاريحتا العاش رەت شيرەك فينالعا شىعاردى. الەم چەمپيوناتىندا تاجىريبەسى بار باس جاتتىقتىرۋشى 2006 جىلى ارگەنتينا قۇراماسىمەن كەلىپ, شيرەك فينالدا الاڭ يەلەرى گەرمانيادان ويىن سوڭىداعى پەنالتي سەرياسىندا عانا جەڭىلگەن ەدى. پەكەرمان بيىل شيرەك فينالدان ءوتىپ, كولۋمبيامەن فينالعا دەيىن جەتۋدى كوزدەپ وتىر.
«التىن بۋىن» مۋنديالمەن قوشتاستىبيىلعى الەم چەمپيوناتىنا ىرىكتەۋ كەزەڭدە قازاقستان قۇراماسىمەن ءبىر توپقا تۇسكەن پولشا 2002 جىلدان بەرى جاھاندىق دوپ دوداسىنىڭ توپتىق كەزەڭىنەن وتە الماي ءجۇر. فينالدىق كەزەڭدەگى توپتىق ويىننىڭ ەكەۋىندە دە جەڭىلگەن پولياكتار بيىلعى چەمپيوناتتى دا ەرتە اياقتاۋعا ءماجبۇر بولدى. بۋىن الماسۋ ءداۋىرى پولشا قۇراماسىنا دا كەلىپ جەتكەن سىڭايلى. ويتكەنى ەكى جىل بۇرىن وسى قۇراممەن ەۋروپا چەمپيوناتىنا قاتىسقان پولياكتار شيرەك فينالدان ارى اسا الماعان ەدى. قازىرگى تاڭدا قۇراماداعى 10-نان اسا فۋتبولشى سوڭعى بەس جىلدان بەرى قۇرامادا ۇزدىكسىز ويناپ كەلەدى.
كەزىندە «دورتمۋند ۇشتىگى» اتالىپ كەتكەن فۋتبولشىلار قازىر باسقا كلۋبتاردا ويناعانىمەن, قۇرامادا بۇل تريو ساقتالىپ قالعان. قورعانىستا پيشچەك, جارتىلاي قورعانىستا بلاشچيكوۆسكي جانە شابۋىلداعى لەۆاندوۆسكي قۇرامانىڭ نەگىزىن قۇرايدى. لەۆاندوۆسكيدىڭ شابۋىلداعى سەنىمدى سەرىگى اركاديۋش ميليك ەۋرو-2016 تۋرنيرىنە «اياكس» شابۋىلشى رەتىندە كەلىپ, كوپشىلىكتىڭ نازارىن وزىنە اۋدارتا العان-دى. بىراق قازىرگى ۋاقىتتا ونىڭ جاعدايى دا اسا ءماز ەمەس. وسىلايشا پولشانىڭ «التىن بۋىنى» سانالعان بۇل قۇرامعا الەم جانە ەۋروپا چەمپيوناتىنىڭ التىنى بۇيىرماي كەتەتىن ءتۇرى بار.
ءالي بيتورە, «ەگەمەن قازاقستان»