ۆەنگريانىڭ دەر قالاسىندا گرەك-ريم كۇرەسىنەن وتكەن «التىن گران-پري» تۋرنيرىندە باق سىناعان قازاقستاننىڭ ۇلتتىق قۇراما كومانداسى توعىز جۇلدەنى يەلەنىپ, ەلگە ولجالى ورالدى.
ماجارستانداعى جارىستا جانسەرىك سارسەنبيەۆ (55 كيلو), مەيىرجان شەرماحانبەت (67 كيلو), تەمىرلان شادۋكاەۆ (77 كيلو) جانە نۇرماحان تىناليەۆ (130 كيلو) ءوز سالماق دارەجەلەرىندە قارسىلاس شاق كەلتىرمەي, جەڭىس تۇعىرىنىڭ ەڭ بيىك ساتىسىنا كوتەرىلسە, قورلان جاقانشا (55 كيلو) مەن ەرۇلان ىسقاقوۆ (97 كيلو) فينالدا عانا ۇتىلدى. ال المات كەبىسباەۆ (67 كيلو), دەمەۋ جادىراەۆ (72 كيلو) جانە ميراس بارشىلىقوۆ (77 كيلو) قولا جۇلدەنى ەنشىلەدى.
وسىلايشا 4 التىن, 2 كۇمىس جانە 3 قولا مەدالدى يەلەنگەن قازاقستان قۇراماسى وسى ءتۋرنيردىڭ كوماندالىق ەسەبىندە ەكىنشى ورىنعا جايعاستى. ءبىرىنشى ورىن جارىس قوجايىندارىنا بۇيىرسا, يران بالۋاندارى ءۇشىنشى ساتىعا تۇراقتادى.
عالىم سۇلەيمەن, «ەگەمەن قازاقستان»