استانا تاۋەلسىزدىك كۇنى سالتاناتىنا كەلەتىن مەيمانداردى قارسى الۋعا قازىردىڭ وزىندە دايىن. ەلوردانىڭ اۋەجايى ارقىلى كەلەتىن جولاۋشىلار اعىنى قۇقىق قورعاۋ ورگاندارىنىڭ تىڭعىلىقتى نازارىندا بولماق.
كەشە ءىىم كولىكتەگى ىشكى ىستەر دەپارتامەنتىنىڭ باستىعى گەنەرال-مايور قانات توقسەيىتوۆتىڭ, كىىد باسقارۋ شتابىنىڭ باستىعى پولكوۆنيك جايدار قاراساەۆتىڭ جانە استانا حالىقارالىق اۋەجايىنىڭ قاۋىپسىزدىك جونىندەگى ۆيتسە-پرەزيدەنتى مارات شىڭعىسوۆتىڭ قاتىسۋىمەن وتكەن كەزدەسۋدە باقىلاۋ ءىسىن جاقسارتۋ ماسەلەلەرى كەڭىنەن ءسوز بولدى.
ەلوردانىڭ اۋە قاقپاسىنىڭ تەحنيكالىق جاراقتاندىرىلۋى تالقىلاۋدىڭ باستى تاقىرىپتارىنىڭ بىرىنە اينالدى. الداعى جىلى بەينەباقىلاۋ جۇيەسى تولىقتاي جاڭارتىلىپ, اۋەجاي عيماراتىندا قوسىمشا بەينەكامەرالار ورناتىلاتىن بولادى. سونىمەن بىرگە قوسىمشا پوليتسيا بەكەتتەرىن قويۋ ارقىلى اۋەجاي عيماراتى ىشىندەگى نىسانداردى باقىلاۋدىڭ كۇشەيتىلەتىنى دە اتاپ ءوتىلدى. تاعى ءبىرى جاڭالىق, جولاۋشىلار قولجۇگىن قاراۋ جۇيەسى بويىنشا ەنگىزىلمەك.
اتقارىلعان جۇمىستار از ەمەس. اۋەجايدا جۇرگىزىلىپ جاتقان قاۋىپسىزدىك شارالارىنىڭ ءوزى-اق ءبىزدىڭ زاڭ بۇزۋعا جول بەرمەيتىنىمىزدىڭ تاعى ءبىر دالەلى بولىپ تابىلادى, دەپ اتاپ كورسەتتى ق.توقسەيىتوۆ كەزدەسۋ كەزىندە. سونداي-اق ول حالىقارالىق اۋەجاي ۇجىمىن الدا كەلە جاتقان تاۋەلسىزدىك مەرەكەسىمەن قۇتتىقتادى.
«ەگەمەن-اقپارات».