ماڭعىستاۋلىق مەملەكەتتىك قىزمەتشىلەر قوس مەرەكەنى اتاپ ءوتتى

وڭىردە مەملەكەتتىك قىزمەتشىلەردىڭ ناقتى سانى - 2830 ادام. ونىڭ ىشىندە ايەل ادام سانى - 1659 نەمەسە 58,6%. ال, مەملەكەتتىك قىزمەتشىلەردىڭ 90%-نىڭ  جوعارعى ءبىلىمى بار. ماڭعىستاۋداعى مەملەكەتتىك قىزمەتشىلەردىڭ ورتاشا جاسى – 37,6 جاس.

جىل باسىنان بەرى ماڭعىستاۋ وبلىسىندا جەرگىلىكتى اتقارۋشى ورگانداردىڭ مەملەكەتتىك قىزمەتشىلەرىنە جالاقى شكالاسىن ەنگىزۋ ءۇشىن پيلوتتىق جوبا جۇزەگە اسىرىلدى. مەملەكەتتىك قىزمەتشىلەردى مەريتوكراتيا قاعيداتى بويىنشا قايتا دايارلاۋ, بىلىكتىلىگىن ارتتىرۋ جانە مانساپتىق جەتىلدىرۋ ءۇشىن بارلىق جاعدايلار جاسالدى. بۇگىنگى كۇنى شتات سانى 93,3% قۇرايدى. قازاقستان رەسپۋبليكاسىنىڭ زاڭناماسىن ءبىلۋ ءۇشىن تەستىلەۋگە قاتىسۋعا نيەت بىلدىرۋشىلەردىڭ سانى الدىڭعى جىلمەن سالىستىرعاندا 2,5 ەسە وسكەن.

العاشقى بولىپ ءسوز العان ماڭعىستاۋ وبلىسىنىڭ اكىمى ەرالى توعجانوۆ, تاۋەلسىز ەلىمىزدەگى جاسامپازدىق جوبالاردى, باياندى باعدارلامالاردى جۇزەگە اسىرۋ جولىنداعى جۇمىستاردىڭ ەڭ العى شەبى مەن جاۋاپتى ۋچاسكەلەرىندە ەڭبەك ەتىپ جاتقان مەملەكەتتىك قىزمەتشىلەردىڭ ەڭبەگى وراسان ەكەندىگىن اتاپ ءوتتى. سانالى ءومىرىن مەملەكەتتىك قىزمەتكە ارناپ, ونىڭ دامۋىنا زور ۇلەس قوسقان ارداگەرلەر دە, بۇل سالاداعى قىزمەتىن جاڭادان باستاپ كەلە جاتقان, ەرتەڭىنەن زور ءۇمىت كۇتتىرەتىن جاستار دا بارشىلىق ەكەندىگىن اتاپ ءوتتى.

بيىلعى جىلى ايماق تاريحىندا تۇڭعىش رەت مەملەكەتتىك ورگانداردىڭ ەكى وكىلى باۋىرجان تۇياقوۆ پەن رامير الەكپەروۆ «قازاقستان رەسپۋبليكاسىنىڭ ۇزدىك ازاماتتىق قىزمەتشىسى» رەسپۋبليكالىق بايقاۋىنىڭ جەڭىمپازى اتاندى. وبلىستىق جارىستىڭ جەڭىمپازدارى امانعالي نۇرداۋلەت پەن رەنات شامۋحانوۆ العىس حاتتارمەن ماراپاتتالدى. سونداي-اق, مەملەكەتتىك قىزمەتشىلەرگە ماڭعىستاۋ وبلىسىنىڭ اكىمىنىڭ ديپلومدارى تابىس ەتىلدى.

گۇلايىم شىنتەمىرقىزى,

«ەگەمەن قازاقستان»

ماڭعىستاۋ وبلىسى