پرەمەر-مينيستر باقىتجان ساعىنتاەۆ اقمولا وبلىسىنا جۇمىس ساپارى اياسىندا مامانداندىرىلعان حالىققا قىزمەت كورسەتۋ ورتالىعىندا بولدى, وندا ء«بىر تەرەزە» قاعيداتى بويىنشا مەملەكەتتىك قىزمەت كورسەتۋ ادىستەرىمەن جانە وڭىردە جالپى «تسيفرلىق قازاقستان» مەملەكەتتىك باعدارلاماسىن ىسكە اسىرۋ بارىسىمەن تانىستى.
پرەمەر-مينيسترگە وپەراتسيالىق زالدىڭ جانە دايىن قۇجاتتاردى بەرۋ زالىنىڭ جۇمىسى تانىستىرىلدى. ەلەكتروندىق كەزەك جۇيەسىن ەنگىزۋدىڭ ارقاسىندا قىزمەتتەردى الۋ ۋاقىتى قىسقارتىلدى. مەملەكەتتىك قىزمەتتەردىڭ جاڭا ستاندارتتارىنا سايكەس مامانداندىرىلعان حقكو-دا كۇتۋدىڭ ماكسيمالدى ۋاقىتى قۇجاتتاردى وتكىزگەن كەزدەن باستاپ 90 مينۋتتان اسپاۋى كەرەك, ال قۇجاتتى وتكىزگەنگە دەيىنگى كۇتۋ ۋاقىتى — 20 مينۋتتان اسپاۋى ءتيىس. ءبىر ازاماتتىڭ قۇجاتتارىن قابىلداۋ ۋاقىتى دا شەكتەۋلى, بۇل دا 20 مينۋتتان اسپاۋى ءتيىس.
«ازاماتتارعا ارنالعان ۇكىمەت» مەملەكەتتىك كورپوراتسياسى» كەاق بولىمشەسىنىڭ ديرەكتورى ب. اقان مامانداندىرىلعان حقكو 2017 جىلعى جەلتوقسان ايىندا پايدالانۋعا بەرىلگەنىن مالىمدەدى. وسى جىلدىڭ بەس ايىندا 21 مىڭنان استام مەملەكەتتىك قىزمەت كورسەتىلدى, سونىڭ ىشىندە كولىكتى تىركەۋ بويىنشا — 16 مىڭنان استام, جۇرگىزۋشى كۋالىگىن بەرۋ بويىنشا — 5 مىڭعا جۋىق.
العاشقى مامانداندىرىلعان حقكو 2012 جىلدىڭ جەلتوقسان ايىندا پيلوتتىق رەجيمدە قاراعاندىدا اشىلدى. بيزنەس-پروتسەستەردى اۆتوماتتاندىرۋ, مەملەكەتتىك ورگانداردىڭ بارلىق دەرەكقورلارىن جانە اقپاراتتىق جۇيەلەرىن بىرىكتىرۋ, سونداي-اق جۇرگىزۋشى كۋالىگىن الۋ جانە كولىك قۇرالدارىن تىركەۋگە قاجەتتى بارلىق كەزەڭدەردى ءبىر كەشەنگە بىرىكتىرۋدىڭ ناتيجەسىندە اتالعان قىزمەتتەردى كورسەتۋ ۋاقىتى ورتا ەسەپپەن 2 ساعاتقا قىسقارتىلدى. بۇگىنگى تاڭدا قازاقستاندا حالىققا قىزمەت كورسەتۋدىڭ 13 مامانداندىرىلعان ورتالىعى جۇمىس ىستەيدى.مۇندا پرەمەر-مينيسترگە «تسيفرلىق قازاقستان» مەملەكەتتىك باعدارلاماسىنىڭ وڭىردە ىسكە اسىرىلۋى تۋرالى باياندالدى.
وبلىس اكىمىنىڭ ورىنباسارى ۆ. كرىلوۆ اقمولا وبلىسىندا تسيفرلاندىرۋ ءبىلىم بەرۋ, دەنساۋلىق ساقتاۋ, ينتەللەكتۋالدى كولىك جۇيەسى, تۇرعىن ءۇي-كوممۋنالدىق شارۋاشىلىعى, قوعامدىق قاۋىپسىزدىك جانە Smart اۋدان سەكىلدى باعىتتاردا جۇرگىزىلىپ جاتقانىن اتاپ ءوتتى.
ءبىلىم بەرۋ سالاسىندا كەزەك قالىپتاستىرۋ پروتسەستەرىن اۆتوماتتاندىرۋ, مەكتەپ جاسىنا دەيىنگى بالالار ۇيىمدارىنا باعىت بەرۋ جانە بالالاردى مەكتەپكە قابىلداۋ جونىندەگى جوبالاردى ىسكە اسىرۋ باستالدى.
«بۇل جۇيە شىلدە ايىندا وبلىستىڭ قالالار مەن اۋدان ورتالىقتارىنداعى 145 مەكتەپكە دەيىنگى ۇيىمىندا ىسكە قوسىلادى جانە بالالاردى تۋىلعان كەزىنەن باستاپ كەزەككە ەلەكتروندى تۇردە تۇرعىزۋعا, بالاباقشاعا جولدامانى اۆتوماتتى تۇردە الۋعا, ۇيدەن شىقپاي-اق ورىندى اۋىستىرۋعا, بالانىڭ ەلەكتروندىق پاسپورتىن: پورتفوليوداعى بالالاردىڭ بارلىق جەتىستىكتەرى, ءبىلىم بەرۋ تراەكتورياسى, بالالاردى مەكتەپكە دەيىنگى تاربيەلەۋ باعدارلامالارىندا وقىتۋ, وقىتۋداعى پروگرەسس جانە دامۋ بويىنشا ۇسىنىمداردى الۋعا مۇمكىندىك بەرەدى», دەدى ۆ.كرىلوۆ.
وبلىس اكىمدىگىنىڭ دەرەكتەرى بويىنشا, ءبىلىم بەرۋ جۇيەسىن تسيفرلاندىرۋ جوبالارىن ىسكە اسىرۋمەن جۇزەگە اساتىن ەلەكتروندى قۇجاتتار اينالىمى مۇعالىمدەردىڭ جۇكتەمەسىن 40% ازايتادى, ءبىلىم الۋشىلاردىڭ ءبىلىم ساپاسىن 80% دەيىن ارتتىرادى, مەملەكەتتىك قىزمەتتەر كورسەتۋدە سىبايلاس جەمقورلىق قاتەرلەرىن 70% تومەندەتەدى.
بۇدان وزگە, پرەمەر-مينيسترگە كوكشەتاۋ قالاسىندا قوعامدىق كولىكتە ءجۇرۋ قۇنىن تولەۋدى باقىلاۋعا مۇمكىندىك بەرەتىن ءموبيلدى قوسىمشا تانىستىرىلدى. جوبانى ىسكە اسىرۋ 2018 جىلدىڭ سوڭىنا دەيىن جوسپارلانعان. جۇيەدە جولاقى تولەۋدىڭ قولما-قول اقشالاي دا, قولما-قول اقشاسىز دا تۇرلەرى پايدالانىلىپ, ەسكەرىلە الادى.
قولما-قول اقشاسىز تولەۋ ءۇشىن ءتۇرلى تولەم تاسىلدەرى قولجەتىمدى: جاناسۋسىز كولىك كارتالارى, بانك كارتالارى, جاناسۋسىز بانك كارتالارى, الەۋمەتتىك كارتالار جانە ءموبيلدى تولەمدەر (NFC). جوبانى ەنگىزۋدىڭ ءبىرىنشى كەزەڭىندە اۆتوبۋستاردى كوندۋكتورمەن قوسا, تاسىمالداناتىن كولىك تەرمينالدارىمەن جابدىقتاۋ كوزدەلىپ وتىر. ودان سوڭ تۇرعىندار جەتكىلىكتى مولشەردەگى كولىك كارتالارىن العان سوڭ جۇمىس رەجيمى كوندۋكتورسىز جۇيەگە كوشىرىلەدى.تسيفرلاندىرۋ جوبالارى مەملەكەتتىك-جەكەمەنشىك ارىپتەستىك قاعيداتى بويىنشا دا بەلسەنە ىسكە اسىرىلىپ جاتقانىن ايتا كەتكەن ءجون. ماسەلەن, وسى جىلدىڭ سوڭىنا دەيىن ءمجا اياسىندا «MultiRadar SD580» ءتيپتى جىلدامدىق رەجيمىن بۇزۋدى انىقتاۋ جۇيەسىنىڭ 3 جيىنتىعىن ىسكە قوسۋ جوسپارلانىپ وتىر. اتالعان جوبانى ىسكە اسىرۋ ءۇشىن 124 بەينەكامەرا ورناتىلادى.
ۆ.كرىلوۆ سونىمەن قاتار تكش سالاسىنداعى تسيفرلاندىرۋ تۋرالى ايتىپ بەردى, ول ەنەرگيا رەسۋرستارىن ەسەپتەۋ قۇرىلعىلارىن جالپى ۇيگە ورناتۋ ارقىلى ولاردى كەيىننەن بىرىڭعاي ينتەللەكتۋالدى اقپاراتتىق جۇيەگە بەرۋمەن, بىرىڭعاي ەسەپتەۋ-قارجى ورتالىعىن قۇرۋمەن, ە-كسك ءموبيلدى قوسىمشاسىمەن قۇرىلىس مونيتورينگىن كىرىكتىرۋمەن ىسكە اسىرىلادى. 2025 جىلعا دەيىن 948 ۇيگە ورتاق جىلۋ ەنەرگياسىن ەسەپتەۋ قۇرىلعىسى, 2024 اۆتوماتتى جىلۋ پۋنكتى, 2098 ەبەاج ورناتىلادى. ەنەرگيا رەسۋرستارىن ەسەپتەيتىن بۇل قۇرىلعىلار بىرىڭعاي ينتەللەكتۋالدى اقپاراتتىق جۇيەگە كىرىكتىرۋ ماقساتىندا ديستانتسيالىق دەرەكتەردى بەرۋ قۇرالدارىمەن جابدىقتالاتىن بولادى.
ەسكە سالايىق, «تسيفرلىق قازاقستان» مەملەكەتتىك باعدارلاماسى پرەزيدەنتتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىن ورىنداۋ اياسىندا ازىرلەنگەن. ماقساتى — ورتاشا مەرزىمدىك پەرسپەكتيۆادا تسيفرلىق تەحنولوگيالاردى پايدالانۋ ارقىلى حالىقتىڭ ءومىر ءسۇرۋ ساپاسىن جاقسارتۋ جانە ەكونوميكانىڭ دامۋ قارقىنىن ۇدەتۋ, سونىمەن قاتار قازاقستان ەكونوميكاسىنىڭ ۇزاقمەرزىمدى پەرسپەكتيۆادا بولاشاقتىڭ تسيفرلىق ەكونوميكاسىن قۇرۋدى قامتاماسىز ەتەتىن جاڭا دامۋ تراەكتورياسىنا كوشۋى ءۇشىن جاعدايلار تۋدىرۋ.