قىزىلوردا وبلىسىندا وتكەن «تسيفرلاندىرۋ: ايماقتاردىڭ دامۋى ءۇشىن جاڭا مۇمكىندىكتەر» اتتى ينتەرنەت-فورۋمىنا رەسەي, تاتارستان, بەلارۋس, ۋكراينا جانە قىتاي ساراپشىلارى مەن «Huawei», «Dell», «سكولكوۆو» سەكىلدى تسيفرلاندىرۋ سالاسىنىڭ الەمدىك جەتەكشى كومپانيالارىنىڭ وكىلدەرى قاتىستى دەپ حابارلايدى Egemen.kz ءتىلشىسى.
فورۋمنىڭ اشىلۋ سالتاناتىندا وبلىس اكىمى قىرىمبەك كوشەرباەۆ: ادامزات ءتورتىنشى ونەركاسىپتىك رەۆوليۋتسياعا قاراي قادام باستى. ونىڭ ءوز قاعيدالارى بار. ونلاين مەن وففلاين اراسىنداعى شەكارالار جويىلىپ, كيبەرفيزيكالىق جۇيەلەردىڭ زامانى كەلە جاتىر,-دەدى. -وسىعان وراي جۇيەدەگى سالالاردىڭ قۇرىلىمى مەن مەملەكەتتەردىڭ ءرولى وزگەرۋدە. تسيفرلىق تەحنولوگيالار جاڭا زاماننىڭ «مۇنايى» اتاندى. حالىقارالىق ساراپشىلاردىڭ بولجامى بويىنشا, 2020 جىلعا قاراي الەمدىك ەكونوميكانىڭ 25 پايىزى تسيفرلىق فورماتقا كوشەدى. 2018 جىلى تسيفرلاندىرۋعا وبلىستىق بيۋدجەتتەن 2,4 ميلليارد تەڭگە قاراستىرىلدى. اقىلدى باسقارۋ, ءبىلىم, دەنساۋلىق ساقتاۋ, تۇرعىن ءۇي-كوممۋنالدىق شارۋاشىلىق, كولىك, قاۋىپسىزدىك جانە بيزنەس سالالارىندا 50 جۋىق جوبا جۇزەگە اسىرىلۋدا.
وبلىس باسشىسى اتقارىلىپ جاتقان جۇمىستاردى وسىلايشا جۇلگەلەپ بەردى.
باقتيار تايجان,
«ەگەمەن قازاقستان».
قىزىلوردا وبلىسى.