بۇگىندە الماتى وبلىسىندا 438 مەشىت يماندىلىق مەكەنى بولىپ, مۇمىندەرگە ەسىگىن ايقارا اشقان. بۇل دەرەكتەر ءدىن ىستەرى جانە ازاماتتىق قوعام ءمينيسترى دارحان كالەتاەۆتىڭ الماتى وبلىسىنا جاساعان جۇمىس ساپارى بارىسىندا ءمالىم بولدى.
مينيستر وبلىس اكىمى اماندىق باتالوۆپەن بىرگە وبلىستىق ءدىن ىستەرى باسقارماسىنىڭ جانىنان اشىلعان ورتالىقتاردىڭ جۇمىسىمەن تانىستى. اشىلعانىنا كوپ بولماعان ءدىن سالاسىنداعى ماسەلەلەردى زەرتتەۋ ورتالىعى مەن ءدىني ەكسترەميزم قۇرباندارى مەن دەسترۋكتيۆتى اعىم ۇستانۋشىلارىن وڭالتۋ ورتالىعى قازىرگى تاڭدا وزەكتى جۇمىس اتقارىپ وتىر. اسىرەسە دەسترۋكتيۆتى اعىم ۇستانۋشىلارىمەن جەكە جۇمىس جۇرگىزۋدىڭ ارقاسىندا تەرىس ءدىني اعىم جەتەگىندە جۇرگەن جاستاردىڭ كوزقاراسىن وزگەرتىپ, قالىپتى ومىرگە ورالتۋعا قول جەتتى.
مينيستر ساپارىنا وراي وبلىس اكىمى اماندىق باتالوۆ وڭىردە ءدىن سالاسىندا اتقارىلىپ جاتقان جۇمىستارعا توقتالىپ ءوتتى. وڭىردە كونفەسسياارالىق تۇراقتىلىق پەن كەلىسىمدى ساقتاۋ باعىتىندا ناتيجەلى جۇمىس جۇرگىزىلۋدە. ال وزەكتى ماسەلە رەتىندە يمامداردىڭ ءبىلىمىن جەتىلدىرۋ مەن كادرلىق ماسەلەلەردى شەشۋ جايى ايتىلدى.
ەسەپ بويىنشا تىركەلگەن مەشىتتەردەگى 533 يمامنىڭ ءجۇز ەلۋ تورتىندە عانا جوعارى ءدىني ءبىلىم بار. ال 88 ءدىن قىزمەتكەرى مەدرەسە بىتىرگەن بولسا, ارنايى وقىتۋ كۋرستارىنان وتكەندەردىڭ سانى – 219. سونداي-اق ورتا ءبىلىمدى 71 يمام ۋاعىز ايتىپ ءجۇر. جالپى وڭىردە ءدىن ماماندارىنا دەگەن سۇرانىس بار. قازىر وبلىستاعى 11 مەشىتكە يمام جەتىسپەيدى ەكەن.
قالماحانبەت مۇقامەتقالي,
«ەگەمەن قازاقستان»
الماتى وبلىسى