«نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ الماتى وبلىسىنا جۇمىس ساپارىمەن كەلىپ, ايماقتا «تسيفرلى قازاقستان» باعدارلاماسى اياسىندا اتقارىلىپ جاتقان جۇمىس بارىسىمەن تانىستى.
مەملەكەتتىك باعدارلامالاردىڭ جۇزەگە اسىرىلۋى جولىندا قولعا الىنعان شارالاردىڭ كوش باسىنان تابىلاتىن «نۇر وتان» پارتياسى ايماقتاردا ءىت-سىنىپ پەن ءىت-ورتالىق اشىپ, جاستاردى تسيفرلى ورتاعا بەيىمدەۋ مەن وقىتۋ جۇمىستارىن باستادى.
پارتيا توراعاسىنىڭ ءبىرىنشى ورىنباسارى ماۋلەن اشىمباەۆ تالدىقورعان قالاسىندا اشىلعان وسىنداي ارناۋلى ورىنداردىڭ جۇمىسىمەن تانىستى. ساپار بارىسىندا ول وبلىس اكىمى اماندىق باتالوۆپەن بىرگە بىرقاتار الەۋمەتتىك نىسانداردا دا بولىپ, پارتيانىڭ وبلىستىق اكتيۆىمەن كەزدەستى. بۇعان دەيىن تالدىقورعان قالاسىنداعى اگروتەحنيكالىق جانە پوليتەحنيكالىق كوللەدجدەردىڭ بازاسىندا ەكى ءىت-ورتالىق اشىلىپ, وندا ىنتالى جاستار تەگىن ءبىلىم الۋدى باستاپ كەتكەن ەدى. ال جاقىندا تاعى ءبىر ورتالىق وقۋشىلار سارايىندا اشىلدى. بۇل ورتالىقتا جىل سوڭىنا دەيىن 1000-عا جۋىق مەكتەپ وقۋشىسى STEM وقىتۋ جۇيەسى بويىنشا زاماناۋي باعدارلامالاۋ تىلدەرىن ۇيرەنىپ, تەگىن ءبىلىم الادى.
STEM وقىتۋ باعدارلاماسىن «بولاشاق» باعدارلاماسىنىڭ تۇلەكتەرى, ءبىر توپ ونەرتاپقىشتار ويلاپ تاپقان. بۇل باعدارلاما بويىنشا بالالار كوماندالىق جۇمىس بويىنشا تاجىريبەلەرىن شىڭداپ, عىلىمي-تەحنيكالىق ءبىلىمدى شىنايى ومىردە قولدانۋدىڭ قىر-سىرىن مەڭگەرەدى. بۇگىندە بۇل باعدارلاماعا بىرقاتار شەت مەملەكەتتەر دە قىزىعۋشىلىق تانىتىپ وتىر. ءتىپتى جوبانىڭ ۇلگىلەرىن ساتىپ الۋعا اقش, سينگاپۋر, ۇلىبريتانيا, اۋستراليا, قىتاي, وڭتۇستىك كورەيا جانە يزرايل ەلدەرىنەن ۇسىنىس ءتۇسىپ جاتىر. جالپى جەتىسۋ جەرىندە بالالارعا ارنالعان وقۋ ورتالىعىنىڭ سانى كوبەيىپ, الداعى ءۇش جىلدا 62 وسىنداي سىنىپ پەن روبوت تەحنيكاسىنا ارنالعان 19 كابينەت اشىلماقشى.
– قازىرگى كەزدە تەحنولوگيانىڭ قارقىندى دامۋىنا بايلانىستى كەيبىر ماماندىقتار ءوزىنىڭ ماڭىزدىلىعىن جوعالتىپ, ءتىپتى بىرقاتارى مۇلدەم جويىلۋدا. ال كەرىسىنشە ءىت سالاسىنىڭ بىلگىرلەرىنە دەگەن سۇرانىس ۋاقىت وتكەن سايىن ارتىپ كەلەدى. سوندىقتان ءبىز جاستارىمىزعا بولاشاعى بار ماماندىقتاردى وقىتۋدى قولعا الدىق. مۇنداي جوبالار ارقىلى پارتيا «تسيفرلى قازاقستان» باعدارلاماسىن جۇزەگە اسىراتىن بىلىكتى ماماندار دايارلاپ, ونىڭ ءتيىمدى ورىندالۋىنا دا ءوز ۇلەسىن قوسپاق, – دەدى «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ وقۋشىلار سارايىندا اشىلعان ورتالىقتىڭ جۇمىسىمەن تانىسا كەلە.
پارتيا توراعاسى ءبىرىنشى ورىنباسارىنىڭ ايتۋىنشا, الداعى ءۇش جىلدا ەلىمىزدە تەگىن ءبىلىم بەرەتىن 1000 ءىت-سىنىپ اشۋ جوسپاردا تۇر. «تسيفرلى قازاقستان» باعدارلاماسى اياسىندا قولعا الىنعان بۇل جوبا بويىنشا جىلىنا 150 مىڭ بالا وقىتىلادى. ال ارناۋلى ءبىلىم بەرەتىن وقۋ ورىندارىندا ءبىلىم الىپ جاتقان جاستاردىڭ ءىت-ماماندىقتى تەرەڭ يگەرۋىنە جان-جاقتى قولداۋ جالعاسا بەرەدى. سونداي-اق ەلىمىزدەگى جۇمىسسىز جاستاردىڭ دا جاڭا ماماندىققا بەيىمدەلۋى تەگىن جۇزەگە اسپاقشى. بۇل باعىتتاعى جۇمىستارعا «اتامەكەن» ۇلتتىق كاسىپكەرلەر پالاتاسى قولداۋ كورسەتەدى. بۇل جونىندە پارتيا مەن پالاتا اراسىندا ەكىجاقتى كەلىسىم بار ەكەن.
تالدىقورعانداعى ساپارى بارىسىندا ماۋلەن اشىمباەۆ ءوڭىردىڭ كاسىپكەرلەرىمەن كەزدەسىپ, پارتيا تاراپىنان كاسىپكەرلىك سالانى قولداۋ ماسەلەسىن ءسوز ەتتى. ءوز كەزەگىندە جەرگىلىكتى كاسىپكەرلەر پارتيانىڭ شاعىن جانە ورتا بيزنەستى قولداۋ ماقساتىندا قولعا العان بىرىڭعاي گەواقپاراتتىق ونلاين سەرۆيس پورتالىن قۇرۋ باستاماسى تۋرالى پىكىرلەرىن ءبىلدىرىپ, بۇل جوبا كوممەرتسيالىق جەر تەلىمدەرىنە قاتىستى سىبايلاس جەمقورلىقتىڭ ايتارلىقتاي ازايۋىنا جانە اتالعان جۇمىستاردىڭ اشىق ءارى ءادىل جۇرگىزىلۋىنە ۇلكەن سەپتىگىن تيگىزەتىنىنە سەنىم ءبىلدىردى.
– كەز كەلگەن مەملەكەتتىڭ تۇراقتى دامۋىنىڭ نەگىزى شاعىن جانە ورتا بيزنەس ەكەنى بەلگىلى. مەملەكەتكە تۇسەتىن سالىق پەن جۇمىس ورىندارىنىڭ سانى جاعىنان دا بۇل سالانىڭ ماڭىزى زور. وسى باعىتتا الماتى وبلىسىندا اۋقىمدى جۇمىستار اتقارىلىپ جاتقانىن كورىپ وتىرمىز. «نۇر وتان» پارتياسى دا ەلباسىنىڭ تىكەلەي تاپسىرماسىمەن بىرقاتار ناقتى جوبالاردى قولعا الدى. سونىڭ اياسىندا كوممەرتسيالىق ماقساتتاعى جەر تەلىمدەرى بويىنشا كاسىپكەرلەرگە قاجەتتى بارلىق اقپاراتتار قولجەتىمدى بولاتىن بىرىڭعاي پورتال قۇرىلادى, – دەدى ماۋلەن اشىمباەۆ كاسىپكەرلەرمەن كەزدەسۋدە.
سونىمەن قاتار پارتيا توراعاسىنىڭ ءبىرىنشى ورىنباسارى «رۋحاني جاڭعىرۋ» باعدارلاماسىنىڭ وبلىستىق جوبالىق كەڭسەسىندە بولىپ, ونىڭ جۇمىسىمەن تانىستى.
قالماحانبەت مۇقامەتقالي,
«ەگەمەن قازاقستان»
الماتى وبلىسى