الەم چەمپيوناتى كەزىندە كوپتەگەن رەكوردتار جاڭارىپ, بۇرىن-سوڭدى بولماعان ناتيجەلەر تىركەلىپ جاتىر. ارينە, بۇل الەم فۋتبولى ءۇشىن اسا قاتتى تاڭعالاتىن جاعداي ەمەس. ءتورت جىل سايىن ءبىر بولاتىن فۋتبول تويىندا تالاي جىلنامالارعا ەنگەن سانداردىڭ وزگەرەتىنى بۇرىننان بار. ال بۇل جولعى چەمپيوناتتا ۇلتارازدىق قاقتىعىس قىلاڭ بەردى.
«داۋدىڭ باسى دايرابايدىڭ كوك سيىرى» دەمەكشى, داۋدىڭ باسى شەردان شاكيريدىڭ كوك بۋتسيى بولىپ تۇر. شۆەيتساريا ۇلتتىق قۇراماسىنىڭ ويىنشىسى اياق كيىمىنە كوسوۆو مەملەكەتىنىڭ كوك جالاۋىن جابىستىرىپ شىعىپتى. ال البانيا مەن سەربيانىڭ كوسوۆو ءۇشىن ءالى دە قىرعي-قاباق ەكەنى انىق. 2008 جىلى كوسوۆو تاۋەلسىزدىك الىپ, سەربيانىڭ بوداندىعىنان بوسادى. ال شەردان شاكيريدىڭ اكەسى كوسوۆونىڭ تاۋەلسىزدىگى ءۇشىن كۇرەسىپ, سەربيا بيلىگى تاراپىنان ابدەن قىسىم كورگەن. ءتىپتى اكەسى ءالى كۇنگە دەيىن قاماۋدا وتىر. سەربتەر مەن البانداردىڭ اراسى ءالى كۇنگە دەيىن سۋىق. ول ەندى جاسىل الاڭدا دا كورىنىس بەردى.
2014 جىلى ەۋرو دوداسىنىڭ ىرىكتەۋ ماتچىندا سەربيا مەن البانيا قۇرامالارى كەزدەسىپ, ويىن سوڭىنا دەيىن اياقتالماي قالدى. ەكى كوماندانىڭ جانكۇيەرلەرى سوزگە كەلىپ, ارتى توبەلەسكە ۇلاستى. تريبۋنادان ۇشىپ تۇسكەن كوسوۆونىڭ جالاۋىن سەربيا اياقدوپشىسى ج ۇلىپ الىپ, الاڭ جيەگىنە تاستاي سالدى. وسى كەزدە تريبۋناداعى كيكىلجىڭ جاسىل الاڭعا دا جەتتى. تورەشى مارتين اتكينسون ويىندى توقتاتىپ, فيفا-عا شاعىم ءتۇسىردى. كەيىننەن البانيا قۇراماسىنا 3:0 ەسەبىمەن تەحنيكالىق جەڭىس جازىلدى. مىنە, سودان بەرى قوس مەملەكەتتىڭ سپورتشىلارى حالىقارالىق ارەنادا كەزدەسە قالسا, وسىنداي وقىس وقيعالار تىركەلەدى.
ەندى, بۇل قاقتىعىس كۇتپەگەن جەردەن بولدى. جاسىل الاڭعا شىققان سەربيا مەن شۆەيتساريا اراسىنداعى ويىندا مۇنداي ساياسي جاعداي شىعادى دەپ ەشكىم ويلامادى دا. الايدا شۆەيتساريا ساپىندا ونەر كورسەتەتىن بىرنەشە ويىنشىنىڭ ۇلتى – البان. شەردان شاكيري مەن گرانيت دجاككا شۆەيتساريا قۇراماسىنىڭ وسى ويىندا سوققان 2 گولىنىڭ اۆتورلارى. ەكەۋى دە گول سوعىسىمەن قولدارىن كەۋدەلەرىنە ايقاستىرىپ قويىپ, البانيانىڭ جالاۋىنداعى قىران قۇستى بەلگىلەپ, ء«بىز ازاتپىز» دەگەندى ۇعىندىردى.
بۇل ارەكەتتى تىلشىلەر ءىلىپ اكەتىپ, اقپاراتتىق مايدانعا سالدى. سەربتەر البانداردى, الباندار سەربتەردى قارالاپ جازدى. ەندى رەسەيدەگى فۋتبول تويىنىڭ ابىرويىنا نۇقسان كەلتىرگەنى ءۇشىن فيفا ەكى مەملەكەتتىڭ ويىنشىلارىنا ەسكەرتۋ جاسايدى. ال شەردان شاكيري مەن گرانيت دجاككا مۋنديالدان مۇلدە قۋىلىپ كەتۋى دە مۇمكىن.
سەربيا مەن شۆەيتساريا ويىنى باستالىسىمەن ستاديونعا جينالعان سەربيالىق فاناتتار شەردان شاكيري مەن گرانيت دجاككاعا دوپ كەلگەندە ىسقىرىپ, شۋلاي باستادى. بۇل جاعدايدان حابارى بار شۆەيتساريالىق فاناتتار نە ىستەرىن بىلمەي دال بولدى. ال ودان كەيىن بلەريم دجەمايليگە قارسى سەربتەر ويىن ءتارتىبىن بۇزعاندا شۆەيتساريا جانكۇيەرلەرى دە شەت قالا المادى.
شۆەيتساريا قۇراماسىنىڭ كوپتەگەن ويىنشىسى سەربياعا قاباعى قاتۋلى, ىشتەرىندە نازى بار كەيىپتە جۇرگەنى بەلگىلى ەدى. ۆالون بەحراميدىڭ قولىندا كوسوۆو جالاۋى بەينەلەنگەنىن بارشا قاۋىم بۇرىننان بىلەدى. ال فابيان شەر مەن حاريس سەفەروۆيچتەردىڭ اتا-انالارى بوسنيادا تۋىپ-وسكەن. بلەريم دجەمايليدىڭ دە البانياعا تىكەلەي قاتىسى بار.
مىنە, شۆەيتساريا مەملەكەتى كەزىندە يۋگوسلاۆيادان قاشىپ كەتكەن بوسقىندارعا پانا بولعان ەل ەكەنى وسىدان بىلىنەدى. ەندى بۇل وقيعاعا بايلانىستى فيفا جاقىن ارادا شەشىم شىعارادى. ناتيجەسى قالاي بولارىن كورە جاتارمىز. بالكىم, حالىقارالىق فۋتبول قاۋىمداستىعى تويدىڭ ءسانىن كەتىرمەس ءۇشىن, ەشكىمگە ءمىن تاقپاس. ونىڭ ۇستىنە گول سوققان گرانيت دجاككا دا, شەردان شاكيري دە «بۇل ارەكەتىمىز تەك بىزگە سەنگەن وتانداستارىمىزعا كورسەتىلگەن قۇرمەت ەدى» دەپ بىردەي اقتالدى.
ەرمۇحامەد ماۋلەن,
«ەگەمەن قازاقستان»