سەزدىڭ رەسمي اشىلۋ راسىمىندە قر پرەمەر-ءمينيسترى باقىتجان ساعىنتاەۆ مەملەكەت باسشىسى نۇرسۇلتان نازارباەۆتىڭ دەلەگاتتارعا جولداعان حاتىن وقىپ بەردى.
«قۇرمەتتى «اتامەكەن» ۇكپ V سەزىنىڭ قاتىسۋشىلارى, حانىمدار مەن مىرزالار!
قر «اتامەكەن» ۇلتتىق كاسىپكەرلەر پالاتاسىنىڭ V سەزىنىڭ اشىلۋىمەن بارشاڭىزدى شىن جۇرەكتەن قۇتتىقتايمىن.
بيىل «اتامەكەن» ۇلتتىق كاسىپكەرلەر پالاتاسىنىڭ قۇرىلعانىنا بەس جىل تولادى. وسى ۋاقىت ىشىندە پالاتا ءوزىن بيزنەس قاۋىمداستىعىنىڭ قۇقىقتارىن قورعاۋ جونىندەگى تاۋەلسىز ينستيتۋت رەتىندە ايقىندادى. ۇلتتىق پالاتا مەملەكەتتىك ورگاندار مەن كاسىپكەرلەر اراسىندا ءتيىمدى ىنتىماقتاستىق ورناتۋعا ارنالعان بايلانىستىرۋشى بۋىن رەتىندە جۇمىس ىستەدى. ۇلتتىق پالاتا ەلىمىزدىڭ تۇراقتى دامۋىنا ۇلكەن ۇلەس قوساتىنىنا سەنىمدىمىن.
قۇرمەتتى حانىمدار مەن مىرزالار!
كاسىپكەرلىك — ەكونوميكانىڭ ناقتى لوكوموتيۆى جانە قوزعاۋشى كۇشى. قازاقستان ءۇشىن ىسكەرلىك بەلسەندىلىكتىڭ دامۋى وتە ماڭىزدى. ءبىز اتالعان باعىتتا بىرلەسىپ ۇلكەن تابىستارعا قول جەتكىزەمىز.
قازاقستان دۇنيەجۇزىلىك بانكتىڭ «Doing Business» رەيتينگىسىندە سوڭعى 10 جىلدا 64-تەن 36-ورىنعا دەيىن كوتەرىلدى. ەلىمىزدە ماكروەكونوميكالىق تۇراقتىلىق قامتاماسىز ەتىلىپ, بيزنەس احۋال جاقسارا تۇسۋدە. ءجىو ءوسىمى 4% قۇرايدى, بۇل الەمدىك ورتاشا كورسەتكىشتەن جوعارى.
قۇرىلىمدىق جانە ۇلتتىق رەفورمالار جۇزەگە اسىرىلۋدا, ينۆەستيتسيالىق احۋالدى جاقسارتۋ بويىنشا جۇيەلى جۇمىستار جۇرگىزىلۋدە, جاڭا سالىق جانە كەدەندىك كودەكستەر كۇشىنە ەندى, كاسىپكەرلىكتى رەتتەۋ ماسەلەلەرى بويىنشا زاڭنامالىق تۇزەتۋلەر پاكەتى قابىلداندى. وندا بيزنەس قاۋىمداستىقتىڭ ۇسىنىستارى بارىنشا ەسكەرىلگەن. اتالعان جۇمىس جالعاسادى جانە كەڭەيتىلەدى. وتاندىق بيزنەسمەندەر, «اتامەكەن» ۇكپ وسى ماڭىزدى پروتسەسكە بەلسەنە قاتىسۋى ءتيىس.
ءبىزدىڭ ستراتەگيالىق ماقساتىمىز — قازاقستاننىڭ وزىق دامىعان 30 ەلدىڭ قاتارىنا قوسىلۋى. بۇل ءۇشىن ەلىمىزدىڭ ءجىو-دە شوب ۇلەسىن 50%-كە دەيىن ۇلعايتۋ قاجەت. سونىمەن قاتار, ءتورتىنشى ونەركاسىپتىك رەۆوليۋتسيا جاعدايىندا ءبىز ەكونوميكانى جەدەل جاڭعىرتۋعا, جاڭا تەحنولوگيالار مەن يننوۆاتسيالاردى ەنگىزۋگە بەت الدىق. الەۋمەتتىك باستامالار اياسىندا شاعىن نەسيە بەرۋ ۇلعايتىلۋدا, «باستاۋ» جوباسى سەكىلدى ماڭىزدى ءىس-شارالار جۇزەگە اسىرىلىپ جاتىر. تەك وسى جىلى كاسىپكەرلىك نەگىزدەرىنە 160 اۋىلدىق اۋداندار مەن 40 شاعىن قالانى قامتي وتىرىپ, 30 مىڭ اۋىل تۇرعىنىن وقىتۋ كوزدەلگەن. بارلىق العا قويىلعان ماقساتتار مەن مىندەتتەردى جۇزەگە اسىرۋ ءۇشىن ۇكىمەت پەن «اتامەكەن» پالاتاسىنىڭ بىرلەسكەن جانە ءبىرىزدى جۇمىس اتقارۋى قاجەت.
بۇگىندە ۇلتتىق پالاتا ءوزىن قازاقستاندىق بيزنەس-قاۋىمداستىقتى بىرىكتىرۋدىڭ نەگىزى رەتىندە تانىتتى. ۇيىم — ەل دامۋىنىڭ ستراتەگيالىق رەفورمالارىن ىلگەرىلەتۋ مەحانيزمى سانالادى. بۇل بارلىق وتاندىق كاسىپكەرلەردى بىرىكتىرەتىن تمد-داعى جالعىز قۇرىلىم, زاڭ جۇزىندە بەكىتىلگەن كەڭ فۋنكتسيالارى مەن وكىلەتتىكتەرى بار.
بۇل سەزد پالاتانىڭ بەس جىلدىق جۇمىسىنىڭ قورىتىندىسىن شىعارۋدىڭ ماڭىزدى شاراسى بولاتىنىنا سەنىمدىمىن. بۇل قازاقستاندىق بيزنەستى دامىتۋدىڭ جاڭا پەرسپەكتيۆالىق باعىتتارى مەن سالالارىن انىقتاۋعا جول اشادى. ەلىمىز قازاقستان رەسپۋبليكاسىنىڭ يگىلىگى مەن وركەندەۋى ءۇشىن جەمىستى ەڭبەك پەن جەتىستىكتەر تىلەيمىن», — دەلىنگەن مەملەكەت باسشىسىنىڭ جولداعان حاتىندا.
ەسكە سالا كەتەيىك, بۇگىن «اتامەكەن» ۇلتتىق كاسىپكەرلەر پالاتاسىنىڭ V سەزى ءوتىپ جاتىر.
اباي اسانكەلدى ۇلى,
«ەگەمەن قازاقستان»